Ezaya 57 - Amazwi Yakwe Leza 2013

Aina Izlaeli yano yakapepa utuluwi yalapeziwa

¹ Umuntu mololoke akafwa, lelo kusiya nanti wenga uwakuti ailuke nanti ukusakamala foo. Antu yololoke lino yasendwa, ala yakululwa uku ui, apakuti iyaya yikala umu longo.

² Antu yano yakaikala imikalile isuma, yene yakasyukila uwikalo usuma, ni syuko lya kupuza lino yafwa.

³ Lelo mwe ana ya alozi mwe! Izini kuno mwe luko lwa ukakasi mwe, yacilende mwe!

⁴ Aweni fwandi wino mukuseka mwati musyenteka nu tunwa? Aweni wino mukumyantwila ululimi?

⁵ Amwemwe kwene mwemuno mukucita ivya uwelewele umu miti, imitelebinte nu mu miti yonsi ivumbilikizye. Mwemuno mukaoca ana inu impolelwa umu mikonko nu mu mipokapoka ya mawe.

⁶ Mukatoola na mawe atelepe ayano mwafukamila. Mukaitulwila penepo amawengwa nu kutuula amawila ya vyakulya. Uzye mwemo mukati natemwa vivyo, vwile?

⁷ Mwemo mukaya napapela ya myamba, apano mupanga imisanzi yakucitilapo ivya ukakasi nga nu kutuulilapo impolelwa.

⁸ Uku matundu ya viseko vinu na maingwe, ali kuno mukaimikila utuluwi twinu. Lyene nemo mutacinsumbako na mano. Mukazula insalu zinu alino muya na pa misanzi inu ikulu na akundwe inu yano mukapangana nayo ukucita ivya ukakasi.

⁹ Mukatala imuinonya amafuta ni vintu vyuze ivya cinunu cisuma, alino imuya umu kupepa Moleki kaleza kaluwi. Apakuzana tuleza kwene utuluwi tuno mukapepa, mwemo mukatala imutuma inkombe izya kutali. Ala mukazituma sile waku mazyamo.

¹⁰ Nanti angala mukatonta uli apakulondelezya utuluwi, mutange mutale mutonte foo. Mwemo mukalola ukuti utuluwi kwene tuto, tuleza twinu utwipisye tulamupeela amaka, nupya aici nu ukasu kwene mutakwata.

¹¹ Aweni fwandi wino oopanga nu kuzakaza kunoli, apakuti wize unsangukile vikwene vii, ukane nu kunjiusya icakuti lyene watunjima ni ncende apakunjika, umu mwenzo wako? Uzye namanye umulandu wakuti nkutumile cele, icingalenga ukuti utangoopa?

¹² Lyene fwandi umaleka ukuti inike ulungami wako apaswe, ni vicitwa vyako ivya uwelewele.

¹³ Ndi walaizya tumalola ndi cakuti utuluwi twako utwipe tumakutuula! Umuza ulatuulula tonsi pyu, umupu ulatusenda. Lelo wiyo wensi uwataila munondi, alapyana insi. Umwamba wane uwamuzilo ulaya uwakwakwe.

Antu asuma yalamyalalikwa

¹⁴ Yawe walanda wati, “Lekini antu yane yaweluluke kunondi. Panzini umuseo ukalamba. Mu uzifye, mufumyemo na vyonsi vino vingayacilikila inzila.”

¹⁵ Pano nemo ne Leza Wapapelapela nemuno nikala umu ncende yamuzilo, nkaamwa ukuti Wamuzilo wilya, nkuti, “Nkaikala umu ncende yapapelapela yamuzilo. Lelo nkaikala na antu aicefya nupya afuke myenzo, kuti aicefya yayo njapupuzule imyenzo.

¹⁶ “Pano nene napeela antu yane umi. Ali cino fwandi ntalatala njalemanizye, nanti ukuyasokela lyonsi foo.

¹⁷ “Nemo nayasokile apamulandu wa uyi wao. Ali pakuyakatusizya icipyu nayafumyako na mano. Lelo nalyo kwene imitwe yao yakomile wi we, yatwalilile nu kucita ivyacicitecite.

¹⁸ “Nemo nalola vino yacita, lelo ndayapozya. Ndayatungulula nu kuyazwilizya. Ndamyalalika yano yalalosya.

¹⁹ Nemo naletela yonsi pyu ulongo, yayo yano yali umupipi, nga na yayo ali ukutali kwene! Ala nemo ndapozya antu yane.”

²⁰ Lelo antu aipe yakoline na yemba akasunkana, wino amaimbi yasitala yata kutengana, yano yakavundula amatipa ni ntikitili.

²¹ Aipe yene kusi kuleka yatale yasyukile ulongo. Avino Yawe walanda.