Ezaya 55 - Amazwi Yakwe Leza 2013

Ivisuma vino asuma yasyukila

¹ Mwensi mwemuno mukacula ku lusala izini ku manzi! Nanti mutakweti impiya izini sile. Izini mukale cakulya kwaula impiya, mulye. Mukale ni cakumwa ni ziya ukwaula kulipila.

² Icani cino mungasumbila impiya pali vino visi vilyo, na malipilo inu pa vintu vino visiikusya? Munguvwe, muntezye, nga muce mukakwate ivyakulya visuma nu kuipakizya vyakulya vilyompe.

³ Teini amatwi mwize kunondi, munguvwe pakuti imyenzo inu isyukile uumi. Namapangana namwe upangano wa pee, uwaluse uno nalavile Davidi.

⁴ Lola ninkucita kambone wa mitundu, intunguluzi na kateeka wa mitundu.

⁵ Wemo ulaama umutundu uno utatazile umanyikwe. Imitundu ino itamanyikwa iliza ulwilo kunuli, apamulandu sile wakwe Yawe wako, Wamuzilo wakwe Izlaeli, iyo ino ilakucindika.

⁶ Londini Yawe apa nsita ino angazanwa, mwamini lino ali mupipi.

⁷ Umwipe ate imisango yakwe, ni ntalanganyi nayo amapange yakweyo. Kayale sile yasenukile kuli Yawe, ukuti ayelele uluse, kuti Leza witu nawe alayelela cuze.

⁸ Pano ukwelenganya kwane nu kwelenganya kwinu ni nzila zyane asi vinu foo. Kuu kuli kulanda kwakwe Yawe.

⁹ Ndi vino iyulu lyatumpuka sana ukuluta insi, ali vino ni nzila zyane zyaluta inzila zinu apakalamba. Ni myelenganyizizye yane nayo yaluta imyelenganyizizye inu.

¹⁰ Ndi vino imvula na mawe ya mvula vikapona ukufuma mupela nu kuswilila foo, suka sile vyatala vyakontelela impanga, vyaleka yavunda, vyamezya imbezu, nu kupeela katovya icakulya,

¹¹ ali vino ni zwi lyane nalyo lisiweluluka kunondi, suka lyatala lyacita vino nkulonda, lyamalila nu mulimo uno nalitumile.

¹² Icumi cumi mulafuma nu luzango, yalamutwala umulongo. Imyamba ni milundu vilapunda nu luzango apa nkolelo inu. Ni miti yonsi yamu mutengo ilakomela inkufi.

¹³ Apakamela imyunga palamela imilemo imipaini. Alino apakamela lwenya palamela cipupa ca muti ununkile wakwe cisu. Na vivyo vyonsi vilaletela Yawe ululumbi. Cilaya icintu cimwi cakwiusya pee, cino citalafuma penepo.