Ezaya 54 - Amazwi Yakwe Leza 2013

Yawe watemwa antu yakwe aina Izlaeli

¹ Umila kapundu nu luzango we ng'umba wemuno usivyala ana. Pongomoka impooma ya luzango nu kusansamuka! Pano wemo ulakwatisya ana ukuluta na pa mwanaci wino iya atatala wasya.

² Vungulula incende yi taalu lyako muno ukaikala. Konzolola insalu zi taalu kutali, utalimfye ni myando yako. Pampamila ni mpopo zyako ningo.

³ Pano lyene ulasalanganila ku kayeya nu ku katutu. Umutundu wako ulapokolola imitundu yuze nanti imisumba ino antu yutuka mwenemo.

⁴ Utoopa foo pano insonyi zitalakulema, utalazewana foo. Nupya ulilila nu ku nsonyi zya ukazyana wako. Utalaiusya nu kuzewana kwakwe unamfwilwa wako.

⁵ Pano uwakuumba kwene aliwe alaya uwako. Izina lyakwe a Yawe Wamaka yonsi. Ali Katuula wako Wamuzilo wakwe Izlaeli, akaamwa Leza wa nsi yonsi.

⁶ Nacendi we Izlaeli Yawe akukwama, uwele wa mwanaci wino yatazyela, wino akucula umwenzo. Uzye kwene umuntu angatazyela umuci uwamu ulumendo wakwe? Vivyo ivyavwanga Yawe.

⁷ Kwene natala nakutazyela pa kasita kanono, lelo namakuwezya ku luse lwane ulutaikulila.

⁸ Natazile nakufisa usyu wane pa kasita kanono, pano nalunkwime sile uku cipyu. Lelo ninkuyela uluse pamulandu ni citemwiko cane ca pee. Ivyalanda Yawe Katuula wako.

⁹ Lyene indi vino nali umu manda yakwe Nowa lino nalafile umulapo inti, “Mulamba wakwe Nowa atalatala aunzye insi nupya. Ali vino nalapa na pilelo pamulandu ni cipyu cino nakukwatile, kumwi ni vikali vyuze vino nakupangile.

¹⁰ Pano imyamba ingasunkana nu twamba tungatenta, lelo icitemwiko cino nakukwatila citalatala cifume kunuli. Nanti sile upangano walongo uno napangana nawe utalatala utelengane foo.” Yayo ali mazwi yano ne Yawe nkukutezela.

¹¹ We mulanda we wemuno ukuyungana ni vinkunka, wemuno usimyalalikwa, lelo lyene ndakuulila amawe yako pa mawe yauze amutengo yakwe daimondi. Alino nu mufula wako pa mawe amutengo yakwe safilo.

¹² Insonsi zya mang'anda yako zilakuulilwa na mawe amutengo yakwe lubi, impongolo zyako nazyo ndazipangila na mawe ayengese, ilinga lyako nalyo ndalikuulila na mawe amutengo.

¹³ Ana yako yonsi yalasambilila kuli ne Yawe, isyuko lyao lilakula wakwe cimwi.

¹⁴ Ulakuulilwa apa ulungi, ulacingililwa nu ku ntazi. Utalatala uvwe intete. Yalakucingilila kuli vyonsi ivingakoofya. Vitalakupalama foo.

¹⁵ Ndi cakuti yamwi yakukatukila, asi nene ndalenga foo. Na wiyo wensi wino wakutandika, wene alailetelela sile umweneco.

¹⁶ Sitala lola! Anene naumvile musyanyi, kavukuta wa moto uwa makala, muno akafumyamo ivyanzo ivyakusula. Lelo pa kasita kali kamwi kwene anene nauumba nu mononyi kwene akavyonona. Icanzo consi cino yasuzile apakukulwisya, cilaposiwa ukuomba. Nanti sile ululimi lonsi luno lulakulolwela umu cilye apa kukusinila, yalalusinila ululio kwene. Vivyo vyonsi ali visuma vino aomvi yakwe Yawe yasyukila. Ali vilwilo vino ndayalambula.

¹⁷ Kuu kuli kulanda kwakwe Yawe.