Ezaya 51 - Amazwi Yakwe Leza 2013

Amazwi akutekezya Yelusalemu umwenzo

¹ Yawe wavwanga wati, “Uvwini kunondi mwe yano mukalonda ukupusuka, mwemuno mukasi mwilile kunondi uku kulenga uwazwilizyo. Iusini iciliwe cino mwatuntuka kweneko nga ni mbu muno yakwimvile.

² Mwelenganye apa cikolwe cinu Abulaamu, na Sala kuno mwatuntuka. Lino naamile Abulamu, wene atakweti umwana, lelo namupuusile ulutembo nu kumupeela ikwata. Lyene nasandulula ni vizikulula vyakwe.

³ “Icumi cumi nemo nkatezela umusumba wa Zioni. Indatezela nu muntu ali wensi wino wikala umu vitalang'anda vya uko. Nanti angala impanga yao yononeka, nemo ndaisangula wa mpanga ino nacisile umu Edeni. Mulaya sile ukuzanga wakwe cimwi nga nu kwimba inyimbo zya kundumbanya nu kuntaizya.

⁴ “Kutikini kuno ndi mwe mitundu ya antu! Mwe antu yane muvwe kuli vino nkulanda. Pano impolelwa yafuma kunondi, nga nu pinguzi wane ulakozezya imitundu uluswepo.

⁵ Ndakalauka zuwazuwa ukuleta upinguzi wane, nu ufyusi wane, uliza wa luswepo. Ikasa lyane lilapingwila imitundu. Aikala umu vilila yataila kunondi, yataila amaka yane.

⁶ Tumpulini amanso inu umwiyulu, mulolekesye na pansi. Amayulu yalaongoloka wa vyunsi, insi nayo ilasizya wa nsalu, na aikalansi yalafwa wa tuzizi. Lelo ufyusi wane ulaelelela pee, nga nu ulungami wane nao utalasila.

⁷ “Uvwini kunondi mwe muno mwamanya ulungami, mwemuno mukawaka Isunde lyane umu myenzo inu. Mutezya mwaoopa umusaalula wa antu, mutasakamala nu ku ntusi zyao.

⁸ Pano akazizi kalayalya wa nsalu, kalalya ungati amavumbu ya mfwele. Lelo ulungami wane wene ulaelelela pee nu ufyusi wane umwalondenkanila inkulo.”

⁹ Katuka fwandi zyuka we Yawe Leza witu! Ndanga utwazwe kweneko, utupususye uku maka yako. Kalambana ndi vino wacisile uku myaka yampiti mpiti. Uzye asi wewe kwene wasandozile icilyanyi ci Laabu tupimfya tupimfya?

¹⁰ Uzye asi wewe kwene wakamizye yemba, nu kulepula umuseo umu manzi, apakuti antu yano wakulwile yalambe?

¹¹ Fwandi antu yano wakulwile yalasuka yawele, umu musumba wa Yelusalemu. Yaliza ale yakwimbila inyimbo, yakumila nu tupundu. Yalasansamuka pee, yatalatala nupya yaye inkumba ulili foo, nupya kutalaya nantu ukucula.

¹² Yawe nupya wavwanga wati, “Kapela wa maka kuno muli anene. Nga fwandi nupya ungaoopa uli umuntu umwina kufwa, wino waviilwe uku muntu? Wiyo alafoota sile nu kuuma wi sote?

¹³ Uzye limwi mwatimwilila Yawe wino wamupanzile? Wiyo wino wanzika amayulu nu kusimpa insi ii? Uzye pacani cino mungikalila ntetentete amanda yonsi, umukoopa sile ukali wa antu akamucuzya, akalonda ukumulovya?

¹⁴ Anyepwe yano yaya umu ng'anda yaminyololo yasya yakululwe, nupya yene yatalafwa mu ncende muno yayalilwa, nanti ukuulilwa vyakulya, awe.

¹⁵ “Anene ne Yawe, Leza wako. Anene nkasunkanya yemba, apakuti amayimbi yakatuke yaitamola. Izina lyane anene Yawe Wamaka yonsi!

¹⁶ Anene kwene nasapalalika amayulu, nu kusimpisya imifula yansi. Anene kwene nkanena aina Izlaeli inti, ‘Mwemo mwemwe antu akwane mpo, amwemwe napiile amasunde yane, nupya amwemwe nkasunga uku maka yane sile.’ ”

Ucuzi umu Yelusalemu wasila

¹⁷ Zyuka we Yelusalemu, vwandamuka! Uvwile ukali lino Yawe watazile akupamola cipyu cipyu. Wene wakuumile cakuti wapempenuka, nu kupempezyoka kwati awino watakoleka!

¹⁸ Apa antu yako kutali nanti wenga wakuti akulemelele pi kasa apakuti akutungulula.

¹⁹ Apa mipamba iyo iili ino yakuponile, umwi auwa uwakononekelwa kwa mpanga uku ulwi wa nkondo. Uze nao auwa uwakulola kuno antu yako yakucula ku cipowe. Fwandi kutalolike nanti wenga uwa kukuvwila uluse awe.

²⁰ Mu vinzyoko vyonsi vya miseo, mwalambalile ana yako afwile ulwezwe. Yali kwati impelembe zino zyatizilemwa umu masumbo. Yene yatiyakoleka ku cipyu cakwe Yawe nu kukalipila kwakwe.

²¹ Mwe ina Izlaeli mwemuno mukucula, mwemuno mukupempezyoka kwati antu yano yatiyakoleka waini,

²² Yawe Simwandalali, Kakulula wa antu yonsi, akuti, “Lyene nemo indi pakufumya intazi kuno muli, zino namutulikile uku cipyu cane. Mutalatala muvwe ukali nupya foo. Mutalaauvwa ukali ukalenga ukuti mwapempezyoka.

²³ Namaleka yano yakamucuzya ayano lyene yacule. Pano alio kwene ayano yamulambalikanga mu miseo, nu kumulyatola kwati mwemwe vikona.”