Ezaya 50 - Amazwi Yakwe Leza 2013

¹ Yawe wavwanga wati, “Uzye kalata wakutaana wino natelilepo mayo winu ali kwi? Nanti uzye akuli weni uwankongwesizye, kuno nakazizye mwemwe? Awe, mwemo yamukazizye uku uzya pamulandu wa maifyo inu, nga nyoko nawe yamusenzile pamulandu wa nkota zinu.

² Uzye pacani cino ntazanyilepo nanti wenga lino nizile? Uzye pacani cino kutali nanti wenga wakwasuka lino nalaizye? Uzye ikasa lyane lyali ilipi ilyakuposiwa kumutuula? Uzye ntakwata amaka akumutuula? Apakukalipa kwane sile, nemo ningakamya yemba ni nguzi cakuti ni nswi zyonsi izyaya mwenemo zikamilwe, apamulandu nu kuulizya amanzi, zifwe nu kufwa uku lusala.

³ Nemo nkavimba iyulu ku mfinzi, nu kulizwika visamu wa muntu akulosya.”

Ukuyela kwa muomvi wakwe Yawe

⁴ Yawe Simwandalali wampile ululimi lwa kumanya vyakulanda, apakuti ningakomelezya yayo atovoke. Cila katondo akanzyula, nu kuleka amatwi yane yatezye, wa muntu akusambilila.

⁵ Yawe Simwandalali wankomwile amatwi, ntamusangukile nanti kumufutatila.

⁶ Nafutatile itundu lyane kuli yayo angumanga, na matama yane nisile kuli yano yanjipanga vilezu Ntafisanga usyu wane kuli yayo ansaalulanga nu kunswila amati.

⁷ Lelo kwene nemo Yawe Simwandalali akantuula. Ali cino nani ntakwata insonyi. Icaleka nalenga ukuti impumi yane ikome, iye ndi wakwe cilwala. Pano namanya ukuti ntalazewana foo.

⁸ Ala nemo kavwangila wane ali mupipi, aweni fwandi angandololwesya? Katwimilile nawe apali ponga. Uzye similandu unji aweni? Kapalame kunondi tuvwe.

⁹ Yawe Simwandalali aliwe akangazwa. Uzye lyene aweni angampeela umulandu? Yonsi kwene yalasila wa nsalu. Yalalowa wa cizwalo cino vipepelya vyalya.

¹⁰ Uzye aweni uwa munomuli akaoopa Yawe, nu kuyela amazwi ya muomvi wakwe? Wiyo wensi akapita umu mfinzi, wino atakweti uluswepo, kapaalile mwi izina lyakwe Yawe, nu kusintilila muli Leza wakwe.

¹¹ Lelo mwemo mwensi, mwemuno mwakozya umoto, nu kusonkelezya ivisonsololwa, lyene ingilini mu cimbilimbili ca moto winu, uwa visonsololwa vino mupembelile. Vii ali vino ikasa lyane lilamucitila. Mulalambalala mu ucuzi utaikulila.