Ezaya 5 - Amazwi Yakwe Leza 2013

Ulwimbo lwapa calo ca matingi

¹ Kanimbile cuza wane ulwimbo lwa citemwiko cino wakwatila icalo cakwe ca matingi. Ala cuza wane wakweti icalo cakwe ca matingi, cico icali pa mwamba uwa muvundo.

² Watipozile umusili, afumya mwenemo amawe nga alemamo na matingi asuma wakwe cimwi. Alino akuulilila ni cimpinda, nga alino afukula nu mwakufenelamo amatingi. Alino atandika nu kulolela apakuti iviseekwa vikace. Lelo iviseekwa navyo viza vyaya sile ivikantuke.

³ “Ale lyene fwandi, mwe ina Yelusalemu tuputwilini umulandu wakwe cuza wane ni calo ca matingi.

⁴ Uzye mwe, icani cino casyala cino nemo naposiwe ukucitila icalo cane? Umulandu cii uno icalo cane caseekela iviseekwa vikantuke, icakuti mukane nu kuseeka iviseekwa ivisuma vino nemo nkalolela?

⁵ “Fwandi lyene vino nemo namacita icalo cane ica matingi aevi. Namafumya icimpinda nu kuongolola ulupungu lwa mawe, uleke inyama zya mpanga zingile zyalya mwenemo nu kulyatolola mwenemo.

⁶ Namaleka cisapilwe. Nemo nsikutungwilanga mwenemo nanti sile ukutukolela. Namaleka ukuti cimelelwe yankololo ni myunga. Namalesya ni mvula ukutonyelela mwenemo.”

⁷ Aina Izlaeli ali calo ca matingi cakwe Yawe Wamaka yonsi, nga Ayuda nayo ali matingi kwene yano wene walima. Wene walolelanga kuti alole ndi cakuti yamacita ivilungame. Lelo yene yatandika ukukomola antu! Walolelanga kuti alole kuno yamacita ivilungame. Lelo wene uvwanga sile impoma zya antu yauze yano yafyengelekezyanga!

Intipu zino yapilwe pali vino yacitanga

⁸ Kalanda kuli mwemwe mwemuno mukalunda kukuula amang'anda pa mang'anda yano mwakwata. Apa vyalo vino mwakwata mwemo mukalundilapo navyuze, icakuti lyene auzo iyasuka yuulilwa napakwikala. Lyene mwemwe mwenga sile mwasuka mwikala mu mpanga.

⁹ Ali cino lyene Yawe Wamaka yonsi wasuka walapa, ala nkuyuvwila na matwi yane ati, “Amang'anda avule yalononeka. Yalaya amatongwa.

¹⁰ Icalo ca matingi icakwata amaekita yaili umu utali mulafuma sile mwenemo ivifenwa vya matingi ivingalingana sile na malita yani na citika. Umu matepe ikumi lyonga a mbezu mulazombola sile uzombozi wi tepe lyonga mpo.”

¹¹ Kalanda kuno muli mwemuno mukazyuka katondotondo nu kutandika ukumwa waini, lyene imucelwa ukuwela ku mang'anda usiku pamulandu wa kukoleka.

¹² Musitala imusumba na mano ku kucita ivikalonda Yawe. Lelo mukasumba amano ku viila nu kulizya ivyakulizyalizya.

¹³ Uli mulandu kwene uno mwasya musendwe uku uzya. Intunguluzi zinu zilafwa uku vipowe, na antu yauze yalafwa uku nzala.

¹⁴ Umu cumi umukolomilo wa mfwa ukulolela, nga watiwasama akanwa apakuti uyatunkile. Apa kumila iumba lya yasambazi yamu musumba ni nkutwi yakwe celico iluvwika.

¹⁵ Apa antu yonsi avilumba yalacefiwa, na manso yakwe wiyo wensi uwavilumba yalatongoleka.

¹⁶ Yawe Wamaka yonsi akalanga ucindami wakwe umu vintu ivilungame vino akacita. Leza wamuzilo alalanga usuma wakwe umu kucita ulungami ku antu yakwe.

¹⁷ Umu vitotela vyamu musumba ali muno utufwele tulailyokezya umulemvwe. Ali muno nu twana twa mbuzi tulaalila mwenemo.

¹⁸ Kalanda kunomuli mwemuno mwasyala akasiki uku kwifya.

¹⁹ Apali ponga na yayo atemwa ukuvwanga yati, “Si Leza ale acincile ale, apitisye ukucita vino akalonda ukucita, uleke tumulozye. Leza wamuzilo uwa ina Izlaeli si alukucita vino wapanga ukucita! Katulole ivyaya mu mano yakwe.”

²⁰ Kalanda kuno muli mwe yaunteleu, mwe yamulengulula mwe. Mwemo mukatola iviipe, imulola ngati ivisuma. Alino nu kutoola ivisuma avino mwemo imucita ukuya iviipe! Imusangula imfinzi aino iya uluswepo kuno muli, alino uluswepo nalo iluya imfinzi! Ivilule avino mwemo imusenula ivyakulya mpe, alino ivyakulya mpe imuvisangula ivilule!

²¹ Kalanda kuno muli mwemuno mukailola ukuti mwakwata amano nu kuti mwacenjela wakwe cimwi!

²² Kalanda kuno muli mwemuno mukailola ukuti mwemwe yapezyepezye uku kukoleka uwengwa! Mwe muno mukaelenganya ukuti amwemwe mwaposya nanti munguminkanya ivyakumwamwamwa, asi cimwi!

²³ Kalanda kunomuli mwemuno mukapoka amafukakanwa uku antu amilandu. Umulungami, asi nu mulandu wene imumufyenga.

²⁴ Caleka fwandi icisinte cao cilalowa, nga na maluwa awalule ningo yalasendwa wa lukungu, ndi vino insawa zikapya uku cimbilimbili ca moto, ni sote ilyume likapya nu lupya. Apa mulandu wakuti yasuula iceo cakwe Yawe Wamaka yonsi, yacita imisuula ku Wamuzilo wakwe Izlaeli.

²⁵ Fwandi Yawe watasokela antu yakwe. Wene watazunzula ikasa lyakwe apakuti ayapame. Imyamba imatelengananga. Alino ivyala vya antu yayo amafwanga, vimasyalanga ntangali ntangali umu miseo yamu musumba kwati sile ivikona. Yawe atalatala ate ukusoka. Alasyala sile ndi muno walawazunzwila ikasa kuti ayapamola.

²⁶ Yawe watatumpula icimanyililo apa kwama antu ya mutundu wapatali. Akuyalizizya nu muluvi apakuti yize ukufuma mu mpela zya nsi. Awe na cendi, ayayo yakukalauka na pakwiza.

²⁷ Pasi nanti wenga uwa munoyali uwatatemboka nanti ukupumika, pasi nanti wenga akusipula nanti kukasula. Pasi nanti umusipi uteluke mu musana, nanti umukonda wa ndyatu uputuke.

²⁸ Inceto zyao pasi pakusongola. Yene yatiyazumba na malapwa yao. Inkamba zya mfwalasi zyao zyakoma wi we. Alino imipeto ya maceleta yao ikuzinguluka wakwe nkungulupya.

²⁹ Asilika yayo yakung'anza wakwe yacisama ati yalema inyama nu kuzitakanya, apakuti kutaya nanti umwi uwakuzipokolola.

³⁰ Mu wanda ulya wemo ulapamola aina Izlaeli wakwe vino yemba akacita. Lolekesyini impanga ino tuli mwenemo! Imfinzi sile na malanda ali vino vili mwenemo! Imfinzi aino yatiyandatila apa luswepo.