Ezaya 49 - Amazwi Yakwe Leza 2013

Izlaeli ali luswepo ku antu amu nko zyonsi

¹ Uvwini kuno mwe antu mwemuno mwikala ukutali, mwe mitundu ya kutalitali. Yawe wansolwile lino ntali mvyalwe, wansonsile ukuya umuomvi wakwe.

² Wene waleka na kanwa kane kuti kaye akakalipisye wa lupanga, nupya umweneco aliwe amansunganga. Wancita wa luceto ulusongole, wamfisa nu munyambi yakwe.

³ Wanenyile ati, “We Izlaeli, wewe muomvi wane. Antu yamandumbanyanga pamulandu wako.”

⁴ Lelo nemo navwanzile inti, “Naicuzizye sile ukuombesya. Namazile sile amaka yane ukwaula umuzano. Lelo kwene insambu zyane zili kuli Yawe, ni cilambu cane cili kuli Leza wane.”

⁵ Yawe aliwe wambumvile mu ndilwa yakwe mayo kuti nje umuomvi wakwe, kuti mbwezye umutundu wakwe Yakobo kunoli, nga nu kukonganika aina Izlaeli apipi na aliwe. Pano nacindamikwa mu manso yakwe Yawe, nupya nkazana amaka muli Yawe Leza wane.

⁶ Yawe wavwanga wati, “Ukuya umuomvi wakututulula inko zyakwe Yakobo, nu kuwezya aina Izlaeli kwacepesya, kutakulinzile foo. Fwandi namalunda penepo nu kukucita uluswepo lwakukozezya ainamasi, apakuti ufyusi wane ufike uku mpela ya nsi.”

⁷ Yawe wavwanga wati, Umuntu umwi wino antu yasuulisya wakwe cimwi, wino imitundu ya antu yapatisya, wino na yamwene alukang'ansi yateeka uzya, ali wino Yawe Katuula nupya Wamuzilo wilya wakwe Izlaeli, akunena ati, “Lino yamwene yalalola kuno wakululwa, yene yalakatuka nu kukucindika. Intunguluzi nazyo kwene zilakatuka nu kukufukamila, apa kukucindika. Pano uwakusolola anene, ne Yawe uwatailwa, Wamuzilo wilya wakwe Izlaeli.”

Ukukuululula umusumba wa Yelusalemu

⁸ Yawe wavwanga wati, “Akasita ka kumupususya ndi kafika, nemo ndamulola luse luse nu kwasuka impooma zinu, ndi mwalila iyoyomba. Nemo ndamulinda nu kumucingilila. Mulaleka nu kuti ince ncite upangano, apakasi kao nani. Ndaleka kuti muce mwikale nupya mu mpanga yaupyanyi ino yasyala ntangali ntangali.

⁹ Ndanena amu ng'anda yaminyololo inti, ‘Fuminimo!’ Na yano ikala umu kanda nayo ndayanena inti, ‘Sokolokini, izini pano apaswe.’ Yalaya wa mfwele zino zikulya umulemvwe pa myamba isanzuke.

¹⁰ Yatalatala yuvwe inzala nanti ulusala nupya, nanti ukucula nupya ku cipuki na kasanya. Pano wiyo wino akayatezela alayatungulula ku tufukoka twa manzi.

¹¹ “Imyamba yane yonsi ndaisangula imiseo, nu kuteyanyizizya antu yane cikuma wa nzila, wakuti yace yasalala mu myamba.

¹² Yamwi yalafuma ukutali, Yamwi ku katutu, yamwi ku uwondaka, yamwi yalafuma ku kayeya ku Aswani.”

¹³ Imbilini mwazanga, mwe viumbwa vyamu mayulu! Pongomoka nu luzango nawe we nsi. Mwe myamba saulini inyimbo, pano Yawe watamyalalika antu yakwe, nu kutezela alanda akwakwe.

¹⁴ Lelo antu aku Zioni yavwanga yati, “Yawe watutazyela! Swemo watwilila sile!”

¹⁵ Acino Yawe nawe wayaasuka ati, “Uzye kwene nyina angilila umwanakwe wino akoonka? Uzye wene angata ukutemwa umwanakwe wino waivyalila? Lelo kwene nanti angilila, nemo ntalatala imwilile.

¹⁶ Yelusalemu, ala nemo ntange nkwilile foo, pano nemo nakulemba nu mu ndupi zyane. Iviumba vyako nkuvilola insita zyonsi.

¹⁷ “Yano yakwiza ku kukukuula cipya cipya yali mu nzila. Alino yano yakuongololanga yamafumamo yapite.

¹⁸ Tumpula amanso nu kucelecensya monsi, Antu yako yonsi yakukongana, yakwiza kunuli. Ne Yawe Leza wa umi, nalapa ukuti, antu yako yalaya wa ciyembelo. Nupya ulaleka yaloleke wa candaluwa cakwe nawinga.

¹⁹ “Nanti angala wizile uya wa citalang'anda, wemuno yakutazyezile umwaulamo akantu, ndakai umacepesya cakuti utangasunga aikazi yako. Na yayo akononyile yalayapusizya ukutali nawe.

²⁰ Ana yako yonsi yano yavilwe umu nsita yako ya ulanda yalakunena ale ukuvwa, yati, ‘Mpanga yatitucepela wakwe cimwi, utupeele ncende nayuze yakwikalamo.’

²¹ Alino nawe umu mwenzo wako ulaasuka uti, ‘Uzye aweni uwamvyalila ana yaa? Nemo ntakweti umwana, nali ing'umba. Uzye aweni fwandi uwakuzya ana yaa? Walanga nafwilwa. Lyene yaa yafuma kwi?’ ”

²² Yawe Simwandalali akuti, “Ndakapizya Akulukuwa, nu kutumpula ulunga lwane uku mutundu wane. Nayo yamaleta ana yako aonsi ale yatiyayasunsa pa viye vyao, nga na ana yako anaci, ale yatiyayapakatila mu minwe.

²³ Yamwene yalaya ali yaso akukulela. Yanamwene nayo yalaya ali yanyoko akukulela. Yalakufukamila mpaka yasimpa nu tupuma twao pansi. Yalamyantila nu lukungu ku ngazo zinu. Alino lyene ulamanya ukuti nene indi Yawe. Yayo akapaalila munondi insonyi zitalayalema awe.”

²⁴ Uzye kungaya angapokolola umuzya wino icita caticilema? Uzye umuzya angafyombotoka mu minwe ya cita?

²⁵ Lelo Yawe wavwanga wati, “Endi, azya yalapokololwa mu minwe ya vita, ni visampwe vilapokololwa ku antu ankalwe. Nemo ndalwisya yayo akamulwisya, alino ndatuula na ana inu.

²⁶ Yayo akamucuzya ndayatunkizya iminyefu iyakwao. Yalakoleka nu wazi wakwao aeneco, kwati antu yano yakoleka waini. Lyene antu yonsi yalamanya ukuti nene indi Yawe. Yalasininkizya ukuti nene Mukuluzi winu, Wamaka wilya wakwe Yakobo.”