Ezaya 47 - Amazwi Yakwe Leza 2013

Ukupingulwa kwakwe Babiloni

¹ Yawe wavwanga wati, “We mukazyana atatala wamanya umonsi, we Babiloni, senka apa cilimba cako cawene. Ikala pansi pa luvukutu. We Babiloni ikala pansi, pano antu yatalakwama nupya ukuti wewe mutelepelele nupya umuyembe.

² Toola sile umwanansyo uwasya usu! Zuula icitambala cako ku mutwe. Pimpula ivyakuzwala vyako vifike umu mpamba, utandike nu kulamba sile inguzi.

³ Ali pakuti antu yakulole tupu, ni nsonyi kazikuleme wakwe cimwi. Nemo nkulandula sile, nu wakundesya kusi.”

⁴ Wamuzilo wilya wakwe Izlaeli ali Mukuluzi witu, ni zina lyakwe a Yawe Wamaka yonsi.

⁵ Wene akunena Babiloni ati, “Ikala sile cele, umu mfinzi, we mukazyana mwali. Antu yatalatala yakwame ukuti wewe namwene wa mawene, awe.

⁶ Nemo nasokile antu yane, nayasawisye kwati asi antu yane. Nasuka nayapeela mu makasa yako, nga nawe utayakwatile uluse. Na akoloci kwene wayacitanga wanyawanya.

⁷ Wemo watangi ulayelelela pali unamwene pee, utasakamalanga kuli vii vyonsi, nanti ukwelenganya kuno vilapelela foo.

⁸ “Lyene uvwa kuno, wemuno watemwa ukuilyokezya pano nsi. Wemo ukailola kwati wikala umutende pano nsi, nu kuyuvwa kwati ungalingana nani ne Leza, nu kuinena uti, ‘Kutaya umonsi namuze uwakolana nani. Ntalatala nje mukamfwilwa nanti ukufwilwa ana.’

⁹ Amasyamo yaa yoili kwene uliukila sile kuno yakuponela, nupya apa wanda uli onga kwene. Nanti wemo ungapanda amalele uli, nu kukwatisya ivizimba, awe cumi ulafwilwa ana, nu kusyala mukamfwilwa.

¹⁰ “Wemo utakwatanga insonyi apa kwifya, pano welenganyanga ukuti kusi nanti wenga wino akukulola. Amano yako nu ucenjezi wako vyakupumbozile, nga uivwanzya umu mwenzo uti, ‘Anene nenga mpo, kutaya namuze wakwe nene, awe.’

¹¹ Ala nkukunena umupamba ulakuponela, uno wemo ulaposiwa nu kuutuka, uno ni vizimba vyako vilaposiwa ukuomba. Uzanzo ulakuponela cakuti patalaya icakukukulula. Impungo ya ononyi ilakupumikizya, ino wemo utatala welenganya umu mano yako.

¹² Ale mwandi tata, sunganga amalele yako, kumwi ni vizimba vyako, navyo pasi pakuvula! Pano kwene ali vintu vino wemo watailamo, ukutandika sile uku wance wako. Limwi wemo ukati vilakutuula nanti ukoofya anisi yako.

¹³ Wemo waicuzya sile apakupokelela umpandamano uvule. Leka amanyamano yakize kuti yakupususye. Kayize antu yano yasambilila apa ntanda, yayo akaceceta intanda nu kusowela cila mwezi apa vintu vino vili nu kucitika. Leka yakutuule ku vintu ivilakuponela.

¹⁴ “Antu yayo mwine yaya sile wa nsaawa zino umoto ukawayola. Yene yalaposiwa ukuipususya aisikulu, pano icimbilimbili ca moto cilakaisya. Utalaya umoto uwakuti umuntu acinila kweneko, nanti umoto uno umuntu angota.

¹⁵ Fwandi tungati uo ali usuma uno antu yayo yalakucitila, uno ukalolela ukufuma ku wance wako. Yonsi kwene yalakusya, cila muntu alaya kuno akasi, nga kutalaya umwi uwa kukutuula.”