Ezaya 46 - Amazwi Yakwe Leza 2013

¹ Ikwene ili mpela ya tuluwi twamu Babiloni. Beli watainamila pansi, Nebo nawe watakontama. Yatiyatulonga pali yapunda nu kutusenda wa viya, apa viteekwa ivitakweti amaka.

² Yapunda yatiyakontama nu kwinamila pansi, yatiyaposiwa ukupususya iviya. Yasuka yatusenda uku uzya.

³ “Munguvwe, mwe ang'anda yakwe Yakobo, mwensi mwemuno mwasyala amu ng'anda yakwe Izlaeli. Anene nkamusunga ukutandika sile nu kukuvyalwa kwinu.

⁴ Nene indi Leza winu nupya namamusunganga, mpaka lino mulakota mukwate ni mvwi. Nene namuumba, nupya nkamusunga. Nene namamwazwanga nu kumutuula.

⁵ “Aweni fwandi wino mungankolanya kweneko, nanti ukundinganya kunoli? Uzye aweni ali wakwe nene wino mungakolanya nani?

⁶ Antu yamwi yakasapula imifuko yao nga yafukumulamo zaabu, nga yapima siluva pa masikelo. Alino yalemba musyanyi umwi incito, nga nawe ayapangila tuleza utuluwi. Lyene nayo yatufukamila nu kutupepa.

⁷ Yene yakatukatusya apa viye vyao, nga yatusenda. Alino yaya yatwika pamwi nu kwikala yikala papo kwene, pano tutange twezye nu kuisezya penepo. Nanti angala wenga pano yali angapapata uli kunotuli, awe cumi tutange twasuke nupya tutange tumupususye foo.

⁸ “Ala mwe! Mwaiusya ivintu vii nu kwelenganyapo, muvisungile mu myenzo, mwe yacisanguka mwe!

⁹ Mwaiusya ivintu vino vyacitike mpiti. Ali kuti mwasininkizya ukuti nene indi Leza, nene nenga mpo, nupya kutaya namuze uwalingana nani.

¹⁰ Ukutandikila sile na pa mpiti nemo nkavwanga calimwi ivili nu kucitika. Ukutandikila sile na pa mpiti nemo nkalondolwela calimwi ivili nu kucitika. Nkalanda ukuti vino nkapanga ukucita ala vilacitika. Nkacita na vyonsi vino nkulonda ukucita.

¹¹ Ale mwalola asi papo natinaama umuntu umwi ukufuma ku ufumondaka. Wene amaiza watavuuka wakwe lyang'anda apa kwika. Umuntu wiyo uwa kutali ali wino amaiza acita vino nemo napanga ukucita. Anene navwangilapo nu kucitika ali vino vimaiza vyacitika.

¹² “Munguvwe kuno, mwe antu mwe, mwemuno mwakoma umu kanwa. Mwe muno mukati ukucimvya kulaya sile lyuze lyuze.

¹³ Ala mwandini uwanda wakucimvya natimbupalamika. Pasikulengela foo. Nemo nsikusumba akasita foo, Apakupususya antu yane. Nemo nasya mpususye Yelusalemu, incindamike na ina Izlaeli aya mwenemo.”