Ezaya 45 - Amazwi Yakwe Leza 2013

Yawe walasika Kilusi apa wene

¹ Yawe wavwanga kuli Kilusi umusololwe wakwe, wino walemelela ikasa lyakwe lilunji, kuti acimvye imitundu yuze ya antu, nu kupokolola yamwene amaka, nu kupankula ivisasa kuti impongolo zitayalwa.

² Wene wavwanga wati, “Nene kwene ndakukolelela, nu kupasa imyamba. Ndapankola impongolo zya mukuwa, nu kuputola imifikilo ya vyela.

³ Ndakupeela ivyuma ukufuma mu mfinzi, vino yasezya umu ncende zya nkama, apakuti ukamanye ukuti nene indi Yawe, Leza wa ina Izlaeli, wiyo akukwamila ukwi zina.

⁴ Pamulandu wakwe Yakobo umuomvi wane, pamulandu wakwe Izlaeli umusololwe wane, nkukwamila ukwi zina lyako, nkukupeela izina ilicindame nanti angala wemo utamanyile nene.

⁵ Nene indi Yawe, nupya kutaya namuze, kutaya Leza muze suka sile nene nenga. Namakupeela amaka yano ungalonda, nanti angala wemo utamanyile.

⁶ Cino nemo nacitila vii, umulandu wakuti ukufuma ku mpela yonga ya nsi, ukufika nu ku yuze kwene antu yamanye ukuti kutaya namuze suka nene nenga mpo. Nene indi Yawe, nupya kutaya namuze.

⁷ “Anene napanga uluswepo ni mfinzi, nkaleta ulongo nga nu uzanzo. Ne Yawe nkacita vii vyonsi.

⁸ “Ndatuma ucimvyo ukufuma kwiyulu wa mvula. Umusili ulalepuka apa kuupokelela, apakuti mufumemo ufyusi wa antu uwa uwaololoke. Nene ne Yawe ndaleka cii cicitike.”

Yawe ali mweneco wa uumbo ni vikacitika

⁹ Kalanda kuli wiyo akulemanila na Kaumba wakwe, kuli wiyo akoline wa nyungu pakasi ka nyungu zyuze. Uzye ivu linganena nakamata liti, “Uzye ukumata cani?” Nanti limunene liti, “We nakamata, utakweti umanyililo!”

¹⁰ Kalanda kuli wiyo akunena isi ati, “Uzye icani cino mwamvyalile?” Nanti ukunena nyina ati, “Uzye mwavyala cani?”

¹¹ Yawe Wamuzilo wilya wakwe Izlaeli nupya Kaumba wakwe, wavwanga wati, “Uzye wakwata insambu zya kunguzya apa ana yane, nanti ukumpela ilamulo lya kucitilamo imilimo?

¹² Nene napanzile insi ya pano pansi nu kuumba umuntu kuti aikale mwenemo. Nakonzolwile amayulu uku maka yane, nupya nene nkaleka kuti ilanzi lyawala, kumwi nu mwezi nga ni ntanda kwene.

¹³ Anene natinkatusya Kilusi kuti uwololoke ucitwe. Ndololola inzila zyonsi muno alapitamo. Wene alakuululula umusumba wane wa Yelusalemu nu kuleka antu yane ali mu uzya yaye antungwa, ukwaula kuti umwi amulipile nanti kumupa amafukakanwa.” Avino Yawe Wamaka yonsi wavwanga.

¹⁴ Yawe wavwanga ku ina Izlaeli wati, “Cuma caku Eguputo ni vyauculuzi vyaku Kusyi, vilaya ivyakwinu. Antu aku Seba, amusinku utali, yalawela kunomuli yaye azya inu nu kumulondelela icisila ala yali mu minyololo. Yalamufukamila nu kuzumila yati, ‘Cumi kwene Leza ali namwe, nga kutaya namuze. Kutaya Leza namuze.

¹⁵ Cumicumi wewe Leza uwafisama, wewe uli Leza wakwe Izlaeli nupya Katuula wakwe.

¹⁶ Yonsi yano yakapanga utuluwi, yalazewana nupya yaluvwa insonyi. Yonsi yalapita asauke.

¹⁷ Lelo Yawe alatuula Izlaeli, nga ufyusi wakwe ulaya uwa muyayaya. Antu yakwe yatalazewana nanti ukulengwa insonyi nupya.’ ”

¹⁸ Pano avino Yawe wavwanga, wiyo uwaumvile amayulu, wene ali Leza uwetetwile nu kupanga insi ya pano pansi. Wene uwaipanzile nupya ataiumbile apakuti mutaya kantu nanti kamwi, lelo kuti iye incende umwakwikala antu. Wene wavwanga wati, “Nene indi Yawe, kutaya namuze awe.

¹⁹ Insikulandila mu umfisolo foo, nanti ukufisa vino nkapanga ukucita. Nsilonda kuti amu mupanda wakwe Yakobo yandonda cilondelonde apasi cimwi. Ne Yawe nkalanda icumi, nkamanyisya antu ivilungame.”

Yawe Umwene wa uumbo onsi na tuleza twaku Babiloni

²⁰ Yawe wavwanga wati, “Mukongane pali pamwi muye ponga. Izini kuno mwemuno mwapuswike lino imiteekele ya mpanga zinu yononike. Ndanji kuno ukwi tengo! Imbutuma antu yano yakatandazya utuluwi twao twa vimuti, yayo akapepa tuleza ututanga yapususya.

²¹ Ndanji kuno mwize mulondolole umwi tengo. Yano yamaikanila kayapandane amano tuvwe! Uzye apa mpiti aweni uwasowile ivintu vii, nu kuvilondolwelapo calimwi? Uzye asi nene kwene ne Yawe? Ala kutaya Leza namuze, Leza akacita vyaololoke nupya a Katuula. Kutaya namuze, suka nenga mpo.

²² “Welulukini kunondi mwe antu yonsi apano nsi, welulukini kunondi kuti mutuulwe. Pano nene indi Leza, nga kutaya namuze awe.

²³ Nkulapa nemwisikulu umwi zina lyane, akanwa kane kakavwanga amazwi ampomvu, yano yatangeyasenulwe, akuti, ‘Ikokola lyonsi lilamfukamila, na antu yonsi yalalapa umwi zina lyane.’

²⁴ “Yene yalavwanga vyapali nene yati, ‘Uololoke na maka vikazanwa sile muli Yawe. Yonsi amupata yaliza kunoli nga yaluvwa insonyi.

²⁵ Lelo muli Yawe amuno yonsi amu mupanda wakwe Yakobo yalacimvya nga yamulumbanye.’ ”