Ezaya 44 - Amazwi Yakwe Leza 2013

Yawe wenga mpo ali Leza

¹ Yawe wavwanga wati, “Uvwini lyene, mwe amu mutundu wakwe Yakobo. Mwe ina Izlaeli, mwemwe aomvi yane, asololwe.

² Nene indi Yawe wiyo uwamupanzile nu kumuumba mu ndilwa zyakwe yanyoko, nupya anene nkamwazwilizya. Utuvwa intete we Yakobo, we muomvi wane. Mwemwe antu yane akundwe yano nasolola.

³ Pano ndapongolwela amanzi mu mpanga iyume ndi, ndaletamo inguzi umu lwanga. Ana inu nemo ndayapongolwela Umupasi wane, nupya ndapolelela na amu mupanda winu.

⁴ Yonsi yalakula usaka ungati umulemvwe utonyelelwe ningo, uno wamela umu mbali ya manzi. Yalakula wakwe yacisu yano yamela umu mbali ya luzi.

⁵ Umwi alavwanga ati, ‘Nene muntu wakwe Yawe,’ muze alayama umwisikulu ukuti uwamu mutundu wakwe Yakobo. Namuze alalemba api kasa lyakwe ati, ‘Uwakwe Yawe,’ nga yalangama ukuti uwamu mutundu wakwe Izlaeli.”

⁶ Yawe, Umwene wa ina Izlaeli, Yawe Wamaka yonsi, wavwanga wati, “Nene wankolelo nga nu wakusyalikizya. Kutaya Leza namuze, suka sile nene nenga.

⁷ Uzye aweni lyene uwakolana nani? Kaimilile, alande tuvwe, andondolwele. Ukutandikila pa vintu ivyacitike mpiti aweni angalondolola? Lekini atuumbwile ni vintu ivilacitika.

⁸ Mutazakaza, mutuvwa intete. Uzye ntamunenyile cico nu kumusokolwela ukufuma uku mpiti? Mwemwe muli yakambone yane. Uzye kwaya Leza namuze? Kutaya Ciliwe nacuze, nemo ntacimanya.”

Tuleza tonsi utuluwi utwasilesile

⁹ Yakapanga ya tuluwi yonsi kwene aciwelewele. Ivicitwa vyao vino yakasansamukila mwenemo, vitalayatumbwila cimwi. Antu yano yakapepa utuluwi tuto impafu, nupya iviwelewele. Yene yalemwa ni nsonyi.

¹⁰ Uzye umuzano cii uwaya mu kwengulula unkolanya nu kuupepa ungati ali Leza?

¹¹ Wiyo wensi akaupepa alazewana sile. Antu yano yakapanga utuluwi yene asilesile. Lekini yace yize ku upinguzi. Cilayaletela ulanda nu muzewanya wakwe cimwi.

¹² Musyanyi, kasula wa vyela akatola icipandwa ca cela nu kucivukuta uku muwa. Ikasa lyakwe ilyamaka alino ilitola inondo nu kusula akaluwi umu musango uno akulonda kayele mwenemo. Inzala nu lusala ivisuka vimutonsya pamulandu wakuti atamwile amanzi nu kulya.

¹³ Kapala wa mbao nawe akapima imbao. Alino asila ivisilwa uku cilembelo. Lyene atandika ukuwaza ni viombelo vyakwe ukulondela muno walasizile ivisilwa. Asuka awaza akaluwi akakolanya ku muntu nu kuyemba kwakwe ukwa kulingana ukwikala mu ng'anda yakwe ya mapepo.

¹⁴ Limwi nalyo fundi wa mbao angaya akalonde imiti imikelide nanti angasolola imiti ili wa milemo ni mioko yamu mitengo. Limwi umweneco kwene angailemela imilemo isuke ikule uku mvula.

¹⁵ Uku cimuti icili cimwi kwene, umuntu angaputulako ulukwi ulwa kupembelako umoto. Cimwi naco awazilako akaluwi. Wene angaputulako ulukwi ulwakoota na lumwi ulwakocelako umukate. Alino cino casyala naco aputule icakuwazilako akaluwi kaleza akano apepa nu kupepa. Wene akapanga akaluwi nu kukafukamila.

¹⁶ Fwandi lyene tumati ku muti uli onga kwene akuno aputulako citika nga apembelela apa moto. Apa munyeswa aocapo inyama, alya aikuta nu koota aota! Alino avwanga ati, “Endi, nasyuka, nasyukila umoto!”

¹⁷ Cimuti cino casyala kweneko acino apangilako kaleza kaluwi, akafukamila akataizya, nga avwanga ati, “Untuule, pano wewe uli leza wane.”

¹⁸ Ala yatamanya nu kutezya nanti kamwi. Yene yazyata yasilola akantu nanti kamwi foo. Imyenzo yao nayo isiiluka.

¹⁹ Yene yasiyelenganya na mano yatakweti, akumanyila ukuti yatiyoca citika umwi umu moto, apa munyeswa yatiyocelapo inyama nu kulya yatiyalya. Alino ivyasyalako yatiyawazako icintu cimwi iciipe cino yafukamila.

²⁰ Umu cumi, icili conga nu kulya amakala. Amano yao auwelewele yayalozya kuze kuze sile. Yene yasiiluka foo, cakuti yavwanga yati, “Icintu cii cino ndemile icaufi nupya icaciwelewele.”

Yawe ali Kaumba na Katuula

²¹ Yawe wavwanga wati, “Mwe ina Izlaeli mwe! Mwaiusya ivintu vii. Mwaiusya ukuti mwemo mwemwe aomvi yane. Anene namuumvile apakuti mwaya aomvi yane. Nemo ntalamwilila foo.

²² Nemo namuyela uluse apa maifyo inu. Nayo yapasika ndi vino ikumbi likapasika. Acino mwemo mungala muweluluke sile kunondi, pano nemo namukulula.”

²³ Mwe viumbwa vyamu mayulu, imbilini ni nsansa pano Yawe wataomba. Zangini mwe antu pano nsi, mwe myamba ni mitengo, kumwi ni miti inu yonsi, pundini ni nsansa, pano Yawe watakulula Yakobo. Watalanga ululumbi lwakwe umu mpanga ya Izlaeli.

²⁴ “Yawe, Katuula wako, uwakupanzile umu ndilwa yakwe nyoko, wavwanga wati, ‘Nene indi Yawe, uwapanga ivintu vyonsi. Nene nakonzolwile iyulu, nalino napanzile insi, uzye kwaliko umwi uwakungazwa?

²⁵ Anene nkavulunganya usemo wakwe yakasema yaufi, nu kupelenganya amano yakwe yakasapoola. Nene nkakanya amalango ya antu yamano, nu kuyalangilila ukuti amano yao aciwelewele.

²⁶ Lelo umuomvi wane wenga ndi wasowela cimwi, lino natuma inkombe yonga uku kukosola vino nateyanya, awe cumi ala lyene vino nateyanya vilacitika. Nene nkalanda vya musumba wa Yelusalemu kuti antu yataca yize yikalemo nupya. Inkavwanga nu kuti imisumba ya mpanga ya Yuda ilatutululwa cipya cipya. Icacumi, imisumba iyo anene ndaikuululula muno yononeka.

²⁷ Nene nkakamya yemba mukalamba, nga namunena kuti akame. Nkakamya ni nguzi iziitamo.’

²⁸ Nene nkanena Kilusi inti, ‘Wewe kacema uwakwane, ulafikilizya amapange yane yonsi.’ Wene alavwanga ati, ‘Lekini Yelusalemu akuulululwe.’ Ni Ng'anda ikulu yakwe Leza nayo ulati, ‘Ikini umufula wakweyo.’ ”