Ezaya 43 - Amazwi Yakwe Leza 2013

Leza walaya ukukulula antu yakwe

¹ Lelo ndakai, Yawe uwakuumvile we Yakobo, wiyo uwakupanzile we Izlaeli, akuti, “Utuvwa intete, pano natinkukulula, nakwama ukwi zina, wewe wakwane.

² Lino wapita umu manzi azike, namayanga nawe, na lino ukulamba uluzi, utalamwela awe. Lino wapita umu moto, utalapya awe. Icimbilimbili cakweo citalakwambukila awe.

³ Pano nene indi Yawe, Leza wako. Nene Wamuzilo wakwe Izlaeli wilya, Katuula wako. Ndapeela Eguputo apa kukutuula. Ndapeela Kusyi na Seba umu cifulo cakwe wewe.

⁴ Pano kunondi wemo wacindama wakwe cimwi, ali cino ndakukauzya na antu. Pano wewe wamutengo ukulu pa manso yane, nupya nakutemwa ndakauzya umi wako ni mitundu ya antu.

⁵ Utuvwa intete foo, pano indi nawe. Nemo ndafumya antu inu yonsi, ukutandikila sile ku ufumondaka, nu kuyawezezya kumwao.

⁶ Nemo ndanena antu aku katutu inti, ‘Yatini.’ Ndapeela ilamulo ku antu aku kayeya inti, ‘Mutayalesya ukuya kweneko.’ Wezini ana yane aonsi ukufuma ku mpanga zya kutali, nga na ana yane anaci yawezini ukufuma ku mpela ya nsi.

⁷ Ya yonsi yakaamilwa kwi zina lyane, nene nayaumvile kuti yampela ululumbi, nayapanzile nu kuyapeela umi.”

Aina Izlaeli ali yakambone yakwe Yawe

⁸ Leza wavwanga wati, “Konganikini antu yane kwi tengo. Yene yakwata amanso, lelo yasilola. Yene yakwata amatwi, lelo yasiuvwa.

⁹ Mitundu yonsi ya antu ikongane, antu amu nko zyonsi yazanwe ukwi tengo. Uzye a kaleza cii akaluwi akangasokolola ivya nkolelo? Uzye a kaleza cii akaluwi akangalanda ivyacitike mpiti? Kayalete tuvwe yakambone yao akuti yatusinile ukuti yene yakalungika. Kayaleke antu yayuvwe tulole ndi cakuti ivyacumi.

¹⁰ Ala mwe ina Izlaeli mwe, mwemwe muli yakambone yane. Anene namusolwile kuti muye aomvi yane, pakuti mungamanya nu kunzumila, nu kumanya ukuti nene indi Leza nenga mpo. Inkolelo yane kutatala kwapangwa leza muze, nupya kutalatala kuye muze.

¹¹ Nene indi Yawe, nga kutaya Katuula namuze alusile nene.

¹² Anene nasokolola ivintu vii, nupya anene namutuula. Anene kwene, asi leza muze wa inamasi, uwatala wacita cii kunomuli. Nupya mwemwe yakambone yane pali cii.

¹³ Endi anene kwene ukufuma na mpiti, nu ku nkolelo kwene avino ndaya namwe pee. Kusi nanti wenga angamfyombotola nupya kusi wino angaalulula vino nemo nkacita.”

Ukuutuka ukufuma mu Babiloni

¹⁴ Yawe, Mukuluzi winu, Wamuzilo wilya wakwe Izlaeli, wavwanga wati, “Apamulandu wakumupususya ndatuma impuka ya vita kuti vikalwisye aina Babiloni. Ndawisya imifikilo ya mpongolo, cakuti utupundu tuno amu musumba yakapunda, tulasanguka impooma.

¹⁵ Nene indi Yawe, Wamuzilo wakwinu wilya, Kaumba wakwe Izlaeli. Nenga mpo, nene indi Mwene winu.”

¹⁶ Apa mpiti nemo ne Yawe natazile impaanza umuseo pali yemba, uwali inzila ino yapisilemo apiziya.

¹⁷ Ali muno natungulwile ni umba lya vita ilikalambane, ilya maceleta ni mfwalasi, mpaka ndyonona, ndikunta na pansi ukwaula kukatuka, mpaka yazima wa utambi.

¹⁸ Yawe wavwanga wati, “Mutaiusya ivyampiti nanti ukwelenganya pa vintu ivyacitike mpiti.

¹⁹ Mwike sile amano pa vintu ivipya vino namacita, nu kutandika vyativitandika ukucitika. Uzye mwemo musyakuvilola? Nemo namapanza umuseo mu lwanga, nga namamupeela inguzi mu mpanga iyumalale.

²⁰ Ni nyama zya mpanga nazyo kwene zimantaizyanga. Yankusa yamancindikanga kumwi ni mbuni, apamulandu wakuti namaleta amanzi umu lwanga ni nguzi mu mpanga iyumalale, kuti mpeele amanzi ku antu yane asololwe.

²¹ Yaya kwene ali antu yano naipangile, kuti yaimbila inyimbo zyakundumbanya.”

Iifyo lya ina Izlaeli

²² Yawe wavwanga wati, “Mwe amu mutundu wakwe Yakobo, asi nene mukapepa, awe, caticimufuulila! Mwe ina Izlaeli.

²³ Mutandetelanga imfwele zya mawila yakoca, nanti ukuncindikila mu mpolelwa zinu. Intamucuzya foo, apa kumulenga kuti mundetele amawila ya vyakulya nu ubani.

²⁴ Mwemo musisumba ulupiya lwinu apakunkalila ubani, nupya musifika penepo apakunsansamusya na mafuta ya nyama zinu. Mwemo mwakomela sile ukuncuzya pamulandu nu uyi winu, nu kumfisya uku mwenzo uku uyi winu uno mukacita.

²⁵ “Nene, endi nene kwene, anene nkafuta amaifyo inu, kuti ululumbi lwane luloleke. Nemo ntalatala mupele umulandu apa maifyo inu.

²⁶ Aleni fwandi katuteke imilandu namwe, landini umulandu uno mumampeela! Londololini tuvwe umulandu winu, apakuti munsinile ukuti mwemwe mukalungika.

²⁷ Icikolwe cinu ica mpiti caifizye, intunguluzi zinu nazyo kwene zyantalamile.

²⁸ Yakateeka inu nayo kwene yansaalwile nu kukowezya Ng'anda yane ikulu. Ali cino nani namufulwile mwe ina Izlaeli nu kuleka ukuti mwe antu yane muzewane.”