Ezaya 42 - Amazwi Yakwe Leza 2013

Umuomvi wakwe Yawe

¹ Yawe wavwanga wati, “Wii ali muomvi wane wino nemo nemweneco natungilila, ali wino naisolwela nupya natemwisya. Namamwikila Umupasi wane, nga nawe alaletela antu amu mitundu yonsi ulungami.

² Wene atalacita ivikanza, nanti ukulaizya izwi umu misolo.

³ Wene atalavuna itete lifwampe, atalazimya inyali ikuzimantukila, kufika lino alalenga kuti uwololoke ucimvye.

⁴ Wene atalatala atovoke nanti ukutonsiwa foo suka sile akaleke ulungami uye pano nsi, apamulandu wakuti impanga zya kutali zikulolela usambilizyo wakwe.”

⁵ Yawe, Leza, wiyo uwaumvile amayulu nu kuyavungulula, wiyo uwakonzolwile insi na vyonsi ivyafuma mwenemo, nu kupeela umi kuli yonsi akapita mwenemo. Wene wavwanga wati,

⁶ “Ne Yawe awewe wemuno naama apakuti ulole ukuti vyaololoke vyacitwa pano nsi. Ndakulemelela apikasa nu ku kusunga, kuti uye icipangano ku antu, kuti uye luswepo lwakuyengesela Akulukuwa.

⁷ Ulapozya impafu amanso, nu kusapula anyepwe umu ng'anda yaminyololo, nu kuleka yayo aikala mu mfizi yaye antungwa.

⁸ Nene indi Yawe, lilyo lili zina lyane. Ntalapa ululumbi lwane kuli wiyo ali wensi. Ukulumbanyiziwa ukulinzile nene, ntalazumilizya kuti kupelwe nu ku tuluwi.

⁹ Lolini, ivintu vino nasowile mpiti ali vino vikucitika. Lelo nemo namakunenela calimwi ivintu vipya, nanti sile lino vitali vicitike.”

Ulwimbo lwakulumbanya Leza

¹⁰ Imbilini Yawe ulwimbo ulupya. Mulumbanyini mwemuno mwikala umu nsi yonsi ya pansi! Mulumbanyini mwe viumbwa vyonsi vyamuli yemba. Imbilini mwe mpanga zya kutali na yonsi aikala kweneko.

¹¹ Lekini ulwanga ni misumba iyaya mwenemo vilumbanye Leza. Lekini aina Kedali yamulumbanye. Lekini aina Sela yamwimbile nu luzango, yumile nu tupundu apapela apa myamba.

¹² Lekini yalumbanye Yawe, nu kumutakizya umu mpanga zyakutali.

¹³ Yawe akacincila wi lumba apakuya ku kulwa, wene waiteyanya nu muzonda wa cita. Wene alapunda izwi lyakukatusya ulwi. Alalanga amaka yakwe apa kucimvya anisi yakwe.

Leza walaya ukwazwilizya antu yakwe.

¹⁴ Leza walanda wati, “Patalimpisya pano nikalila cele, ukwaula kuti nasuke antu yane. Lyene insita yatifika yakuti nacitilapo ivintu. Inkuteta wa mwanaci wino ali pipi nu kulela, nupya nemo nkufuteeka sile.

¹⁵ Nemo ndonona imyamba nu twamba. Ndumika isote ni miti yonsi yaya penepo. Ndasangula inguzi kuti ziye amanyika. Ndakamya ivifula vya manzi.

¹⁶ Ndatungulula impafu mu miseo ino yene yatamanya, ndayatungulula umu nzila izitamanyika kunoyali. Ndasangula imfinzi ino yakapita mwenemo kuti iye uluswepo. Alino amawe amu nzila, nemo ndayafumya mwenemo, pakuti yace yapita apaswepe. Ali vino nemo ndacita nupya ntalatala mvitazyele.

¹⁷ Lelo yayo yonsi ataila utuluwi, yayo akavwanga ku maunkolanya yati, ‘Mwemwe muli tuleza twitu,’ yene ndayavundanya nu kuyazewanya wakwe cimwi.”

Aina Izlaeli yaposiwa ukusambilila

¹⁸ Yawe wavwanga wati, “Uvwini kuno mwe yacipuuli mwe! Lolekesyini mwe mpafu mwe! Silolini!

¹⁹ Uzye aweni uwapafula wa muomvi wane? Uzye aweni uwapulama wa nkombe yane? Uzye awe uwapafula wa mutailwe wane? Uzye aweni uwapafula wa muomvi wakwe Yawe?

²⁰ Wemo walola ivintu ivingi, lelo utasumbako amano. Wakomoka amatwi, lelo usiuvwa foo.”

²¹ Apamulandu wa wololoke wakwe, Yawe akalondesya ukuti amasunde yakwe yakuziwe nu kucindamikwa.

²² Lelo antu kwene yaa yayasampa nu kuyapoka ivintu vyao. Yonsi pyu yalemwa umu macele, nu kusumbilwa mu ng'anda zyaminyololo. Yayasampa ivyuma nupya pasi umwi uwakuyakulula, yayiila nupya kusi umwi uwakuvwanga ati, “Yawezezini!”

²³ Uzye kuli umwi uwa munomuli wino akuuvwa nu kwika amano ukukutezya iviliiza uku nkolelo?

²⁴ Uzye aweni uwapile Yakobo umu makasa ya vipondo? Uzye aweni uwapile aina Izlaeli mu makasa ya ivi? Uzye asi Yawe uwacisile vivyo, wiyo wino twifizyeko? Twakanyile ukulondela inzila zyakwe, nu kusunga amasunde yakwe.

²⁵ Acino wene watusokile apakalamba, nu kutuletela inkondo ikakate. Asonteka nu moto konsikonsi ukutuzinguluka, ukwaula na kuti tumanye icacitikanga. Umoto watoosile, lelo swemo tutasambililepo nanti cimwi.