Ezaya 41 - Amazwi Yakwe Leza 2013

Ulayo wakuntatwisika uku ina Izlaeli

¹ Leza wavwanga wati, “Myalalini, uvwini kuno mwe antu yamu nsi ntali! Zwalilini mutwale imilandu inu ku kupingulwa. Mumaya mukaivwangile mwenga. Aleni fwandi katwapita tuye tukayuvwile umu ulungami.

² Aweni wiyo uwakatusya umusambazi kacimvya wa nkondo ukufuma ku ufumondaka? Aweni wiyo akalenga nu kuti acimvya konsi kuno waya? Uzye aweni akalenga ukuti musambazi wilya acimvya antu kumwi na yamwene kwene? Ulupanga lwakwe lukayasantola nu kuyulula ungati ulukungu! Inceto zyakwe nazyo zikayasalanganya ungati insaawa izikaulululwa ku muza.

³ Umusambazi wiyo akayalondela muno yaile, ukwaula nu wakumulesya. Akatantala pano yali, cakuti ndi walola ungati nalimwi ingazo zyakwe zisikulyata pansi!

⁴ Aweni fwandi akalenga ukuti ciye vii? Aweni akalenga ukuti imikulo ya antu iye penepo ukufuma sile nu ku katalili? Anene ne Yawe naliko ukufuma nu ku katalili. Anene ne Yawe alayako ukufika na pa mpela ya vintu vyonsi.

⁵ Antu ya mpanga ntali yalola vino nemo nacita, ni ntete ziyalema yazakaza nu kuzakaza. Fwandi ali cino yonsi yakongana yiza.

⁶ Yafundi ya vintu yonsi yakaazwana nu kucincizyanya ala yakuti, ‘Komelekini!’

⁷ Fundi wa mbao akanena musyanyi akasula zaabu ati, ‘Endi yame wacita ningo.’ Ali vino fundi wino akakulumbila akaluwi usaka usaka, akakomelezya fundi muze ukukapampamila ningo uku nsunga. Alino wenga ndi cakuti wati, ‘Eya lyene kapampamilwa ningo,’ awe lyene ala icasyalapo ukulematika akaluwi, pano yakakatendekela nu kukapampamila insunga.

⁸ “Lyene fwandi mwe ina Izlaeli mwe aomvi yane, mwemwe muli mutundu wa antu yano naisolwela ne mweneco. Mwemwe ana yakwe Abulaamu cuza wane.

⁹ Anene namufumizye ku mpela yansi nu kumwama kuti mungafuma kuku uku mpela ya nsi, ukutali sana. Ali pakumunena inti, Mwemo mwemwe aomvi yane. Anene namusolwile nu kumutazyela ntalamutazyela foo.”

¹⁰ Ali cino mwemo mutaoopa, nemo namayanga pee namwe. Mutasakamala nanti cimwi pano nene indi Leza winu. Nene namamukomyanga nupya namamwavwanga. Nene namamusunganga nupya nene namamupususyanga.

¹¹ Antu yano mumasokelanga yamazewananga sile ni nsonyi zimayalemanga. Yano yamulwisyanga yamafwanga.

¹² Yano yamamukatusizyanga inkondo yafume pano nsi. Nanti mwezya ukuyalondelezya, awe cumi yatange yaloleke pano nsi.

¹³ Apamulandu wakuti nene ne Leza winu namamukomyanga, ali cino fwandi nkumunena inti, “Mutaoopa, namamwazwanga.”

¹⁴ Nupya Yawe wavwanga wati, “Mwe ina Izlaeli, nanti angala mwacepesya nu kuulilwa amaka, mutaoopa foo, pano nene namamwazwanga. Anene Leza Wamuzilo wakwe Izlaeli. Anene namamupususyanga.

¹⁵ Nemo ndamucita wi celeta lyakupuulilako ingano, nalyo ilipya ilya mino asongole. Mulaapuula imyamba nu kuisyunola, utwamba twene tulaavungoka sile kwati ivu.

¹⁶ Mulaavwintila imyamba umupela nu muza nao ulaisenda. Icipunga naco cilaisalanganya. Lelo mwemo mulaasansamuka pano nene indi Leza winu. Mulandumbanya ne Leza Wamuzilo wakwe Izlaeli.

¹⁷ Lino antu yane yalalola amanzi, lino ku myenzo yao kulalangoka nu kuuma pamulandu nu lusala, nemo ne Yawe ndauvwa kuno yakumpapata. Nemo ne Leza wakwe Izlaeli ntalatala njatazyele foo.

¹⁸ Ndacita utufukoka umu myamba umutaya imiti ni sote. Ndaleka ukuti utufukoka tutuluke umu mikonko. Umu lwanga namo ndafukula ivifula vya manzi. Mu mpanga iyumalale namo ndapanga intulo ya manzi.

¹⁹ Ndaleka umu lwanga mumele imiti ino ndalema mwenemo, iitali imikelide, yacisu nga ni miolivi. Umu manyika namo mulatululuka imiti imilemo, imyovu nga ni myengele.

²⁰ Alala antu yalola vii, yace yamanye ukuti anene ne Yawe nene naomba vii. Yalailuka nu kuvwikisya ukuti ne Leza Wamuzilo wakwe Izlaeli, anene nalenga ukuti vii, viyepo.”

Yawe wasimanga tuleza tuluwi

²¹ Yawe Leza wa ina Izlaeli akuti, “Mwe tuleza twa mitundu, aleni letini imilandu inu uku cilye. Izini muilondolwele mwenga pano mutemilwe!

²² Izini kuno mwize mulandile calimwi ivilaya uku nkolelo. Londolwelini icilye, tuvwe ivyaliko uku mpiti, tuvwe muno vilozile.

²³ Vwangini calimwi tuvwe ivilaya uku nkolelo, apakuti tumanye icipuma ndi cakuti namwe mwemwe tuleza! Si aleni citinipo cimwi icisuma nanti cimwi iciipe, icakuti cituzungusye cituletele ni ntete!

²⁴ Ele yame, ivyani vino mungacita! Na antu kwene yano yakamufukamila yakacita sile ivya winyi!”

²⁵ Nemo nakatusya umuntu umwi, wino akaikala uku ufumondaka. Ndamuleta akize akazanze ukutandikila sile lwaku katutu. Wene alafulula yakateeka kwati akukandila indaka, nanti wakwe nakamata wino akumumunga imbulo.

²⁶ Aweni pali mwemwe angatulandila vivyo calimwi nanti ukutunena calimwi ukuti cico cilacitika, icakuti naswe pano tuli twasininkizya ukuti cumi cumi wene walungike? Ala koto! Patatala paya nanti wenga uwakuti alandile cico calimwi, nupya kutaya nanti wenga wino uvwapo kuno mwe tuluwi mwavwangapo cimwi.

²⁷ Anene sile nenga ne Yawe Leza nanenela calimwi Zioni imilandu. Anene natumile inkombe ku Yelusalemu, uku kuyafisya amazwi ya nsansa, akuti antu yakwe yali umu nzila, yene yakuweluluka kumwao!

²⁸ Akula ndi nalolekesya pali tuleza tuluwi, awe cumi nemo kusi kulola nanti kamwi akakuti kavwange. Nupya kusi kulola nanti konga akakuti kaasuke vino nemo inkutuuzya.

²⁹ Endi, tuleza tuluwi tonsi utuwelewele. Twene tutangetucitepo icintu nanti cimwi. Ivinkolanya vyonsi vii, ivikacita antu ivya uwelewele. Vyene ivinyukuntike, na maka yakucita cimwi, yavilye.