Ezaya 40 - Amazwi Yakwe Leza 2013

Amazwi akutekezya antu

¹ “Tekezyini antu yane imyenzo. Si angala muyatekezye! Avino Yawe walanda.

² Komelezini aina Yelusalemu. Yanenini muti awe cumi mwacula pavula. Uyi winu watiwelelwa uluse. Nemo ne Mwene winu nalungike apakumufulula apa uyi winu onsi.”

³ Amazwi yakuvwika yakuti, “Zifini umuseo umwakupita Mwene umu lwanga! Olololini inzila zyakwe Leza mu matololo.

⁴ Vifoloma vyonsi vilazikwa, ni milundu ni myamba vilapasiwa, ni miseo iyongane ilolololwa, inzila zya tulundu tulundu zilalinganyiwa.

⁵ Alino lyene ucindami wakwe Yawe ulasokololwa, cakuti na antu yonsi yalaulola. Yawe umwisikulu uwatavwanga vii.”

⁶ Izwi lyuvwika iliti, “Laizya.” Nga nani inuzya inti, “Uzye namalaizya cani?” Izwi lili nalyo ilinena iliti, “Laizya ukuti antu yonsi icili conga ni sote. Ukuyemba kwao kwakolana na maluwa ya mpanga.

⁷ Isote likauma na maluwa nayo yakafoota, lino Yawe wapuutapo umupu wakwe. Cumi kwene na antu kwene yaya wi sote.

⁸ Isote likauma, na maluwa yakafoota, lelo amazwi yakwe Leza witu yakaikalilila amanda pe.”

⁹ Kwela apapela apa mwamba utali, we nkombe yakwe Yelusalemu. Yanga kasalanganye ilandwe lisuma! Usanzule ni izwi apa kusalanganya ilandwe lya nsansa mu Zioni. Utoopa foo apa kusanzula izwi, unene imisumba ya Ayuda uti, “Leza winu awiyo akwiza.”

¹⁰ Umwene mucindami akwiza ku kuteeka na maka. Lino akwiza ali na antu yakwe yano wakulula.

¹¹ Amasunganga imfwele zyakwe wakwe kacema. Amakolonganikanga utwana twa mfwele, nu kutupakatila apa minwe yakwe. Amatungululanga na yanyina mfwele ningo sana, nu kuyatwala ukwa kupuzila.

Leza wakwe Izlaeli asi wakukolanya ku antu

¹² Uzye aweni wino watala wapima amanzi yamuli yemba api kufi lyakwe, nanti ukupima iyulu ku cizanza cakwe? Uzye kwatala kuloleka umuntu wakuti atoole ivu umu lupe longa, ilya pano nsi nanti ukupima imyamba ni milundu apa cipimilo?

¹³ Uzye aweni uwatala apanda Yawe amano? Aweni wino watala wasambilizya Yawe, nanti ukumunena vimwi vimwi?

¹⁴ Aweni wino Yawe watala uzyako ukumulangilila vino angiluka apa kumanya inzila yakulungamikilako namuno angaombela ivintu ningo?

¹⁵ Imitundu ya antu Leza akailola ungati akalitoni ka manzi akali apa milomo ya nsembo ya manzi. Yene yaya wa tupece twa lusenga ululi pa cipimilo. Nanti sile ivilila kwene, akavilola ungati ulukungu sile uku kupepuka.

¹⁶ Umu mitengo yamu Lebanoni mutaya inkwi nanti inyama izyalinga ukukozezya umoto wakocela Leza impolelwa.

¹⁷ Imitundu yonsi ya antu, Yawe akailola kwati iyasilesile, kwati itaya na penepo.

¹⁸ Aweni fwandi wino tungakolanyako Leza? Aweni uwamukolako icata?

¹⁹ Leza wene ataya wa kaluwi kano kangapangwa na yafundi nanti kasula wa vyela wakuti aengululeko zaabu alino nu kumuteeka pa cikalilo cakwe siluva?

²⁰ Antu yakaposiwa ukulola zaabu na siluva, yakalonda icimuti icisiiola. Nga alino yalonda fundi wenga umucenjele, ali wino awaza akaluwi nu kukalematika ningo apa cikalilo pano katange kaponele pansi.

²¹ Uzye fwandi mwemo mutamanya? Uzye yatamunena kweneko? Uzye fwandi ukufuma sile nu ku katalili yatamunena kweneko? Uzye fwandi mutatezya vino insi yasimfilwe umufula?

²² Insi yaumvilwe kuli wiyo wino wikala pa cilimba cakwe ica wene, cico icayela apapela ya nsi, nu kusungamila antu pano nsi wa vikwe. Awino wavungulula ulwelele wa nsalu, kwati itaalu umwakuti antu yaikalamo.

²³ Awino akacefya yamwene ukucila mu cipimo, na yakateeka yansi ukuyalola ungati yatatazile yaye penepo.

²⁴ Akula sile cino yaciyakomela, lino yacilemwa sile, lino yatacili yatambe ni misisi, alino Yawe akatusya ni cipunga, nga nkungulupya ayululula wakwe cungu,

²⁵ Wamuzilo wilya akuti, “Uzye aweni fwandi wino mungakolanyako kuli nene? Uzye kwaya namuze angalingana nani?”

²⁶ Tumpulini amanso mucelecensye! Aweni wino wapanzile intanda zino mukulola? Ala awiyo wino wazitantamike imilongo, ungati iumpa lya vita. Ali wino wazimanya zyonsi, pano zyapela nu kuzyama akazyama amazina pano zyapela. Wakwatisya amaka icakuti pataya nanti longa luno lusyamuyela.

²⁷ Ale lyene fwandi mwe ina Izlaeli icani cino mukuilizyanyizizya imuti, “Imisango itu itamanyika kuli Yawe, ni nsambu zitu zyatazyelwa kunoli?”

²⁸ Uzye fwandi mwemo mutamanya? Uzye mwemo mutuvwapo? Ala Yawe ali Leza wa pee, aliwe waumba insi yonsi. Wene asitonta foo na maka yakwe yasicepa awe! Umuntu wene angaposiwa ukupima amano yakwe pano yapelela.

²⁹ Leza wene aliwe akakomelezya yano yacepelwa amaka, na yano yatonta kwene.

³⁰ Alumendo na akazyana yangacepelwa amaka yangatonta, yangapempezyoka nu kupona yangapona.

³¹ Lelo kuli yayo akataila muli Yawe awe cumi yene amaka yao yakaweluluka. Yakakatuka na maka wakwe lyang'anda, na lino yavulumuka ulwilo yasitonta. Na lino yakupita sile, nalyo kwene amaka yao yasisila.