Ezaya 4 - Amazwi Yakwe Leza 2013

¹ Mu wanda ulya anaci cinimbali yalalema umonsi wenga nu kumunena yati, “Tumailisyanga nu kuizwika swenga, cikulu sile swemo twaamilwa ukwi zina lyako, wemo watuzeulula insonyi!”

Yelusalemu alawezeziwapo

² Mu wanda ulya umusambo wakwe Yawe ulalemba, ulacindama nu kulumbanyiziwa. Iviseekwa vya mpanga navyo vilacindama. Vyene vilasansamusya antu apusuka amu Izlaeli.

³ Yao yonsi alasyala umu Zioni, aalapusuka umu Yelusalemu, yalaamwa ukuya asuma umu cumi, yonsi yano yalembwa umu antu aumi amu Yelusalemu.

⁴ Yawe alafula anaci amu Zioni pa uyi wao. Alasangulula Yelusalemu uku wazi uno yazwisya, uku mupu wakwe sile uwa upinguzi nu wa ononyi.

⁵ Alino lyene Yawe aliza aikale apa Mwamba wakwe wa Zioni, nga na pali yayo yonsi aliza yakonganepo. Umusanya alaloleka ungati ikumbi ni cunsi. Usiku alaloleka wa cimbilimbili cino cikulunkuma. Pano vyonsi vilauwa umu ucindami wakwe Yawe.

⁶ Wene alaya itaalu ilyakuuwamo umusanya umu cisawo, nu mwakusimwilila umu nsita ya mvula ni cipunga.