Ezaya 38 - Amazwi Yakwe Leza 2013

Ukulwala kwakwe Hezekiya navino wapozile

¹ Umu manda yalya umwene Hezekiya walwile uwakufwa. Alino kasema Ezaya umwana umonsi wakwe Amozi waile uku kumupempula. Aya amunenelapo na mazwi akuti, “Yawe akukunena ati, ungatantika vyonsi ningo, pano kwene wemo usikupusuka foo, umafwa.”

² Hezekiya ali pakusenukila uku lung'umba, atandika nu kupapata kuli Leza ati,

³ “Iusya we Yawe vino nikala nkakutumikila ningo ningo, umu kukufukilila. Iusya na vino lyonsi sile nezyanga ukucita ukulonda kwako.” Awe lyene Hezekiya alila wakwe cimwi, pasi pakulila mwe!

⁴ Alino izwi lyakwe Yawe lifikila Ezaya, liti,

⁵ “Yanga ukanene Hezekiya ndi vino Yawe, Leza wakwe so Davidi akuti, ‘Natinuvwa ukupapata kwako nupya nindola na minsozi yako. Cisuma fwandi nemo namakupozya. Apa manda yatatu, ale waya uku kumpepa umu ng'anda yane. Nakulundilako imyaka ikumi na isano iyakuti ungikala pano nsi.

⁶ Nupya nemo ndakuvwangilako, nu kupokololako umusumba uu, uku mwene waku Asilya nu kusunga umusumba uno.’ ”

⁷ Ezaya apali pa kunena Hezekiya ati, “Yawe amamupeela icimanyililo ca kulanga ukuti wene alafikilizya ulayo wakwe.

⁸ Naco aeci icakuti, namaleka ukuti icinzingwa ciswilile cundansizi intampulo ikumi lyonga, cino cili apa mutanto uwapanzile Aazi.” Awe mukwai, ni cinzingwa catandika nu kuwelela ukucisila, casuka cafika na palutampulo ulwalenga ikumi.

⁹ Hezekiya umwene waku Yuda lino wapozile uku ulwale wakwe, apakutaizya Leza wasisile ulwimbo luu ati,

¹⁰ “Nemo nelenganyanga ukuti namaya ukwaya antu yane. Ntalatala nikale nupya pano nsi, nupya lino nafikila sile apa cimo ca wikolo.

¹¹ Nemo natangi ntalatala indole nupya Yawe. Muno mpanga ya apuma, ntalatala ndolemo umuntu muno nsi.

¹² Natangi sile umi wane muno nsi wapelela pano, lyene casila! Wala wasila wi taalu lwakwe kacema, lino akapangulula. Wasila wa nsalu yakwe kapikula, ino akapombelekezya nu kuiputwila uku cintu cino akupikwilako. Natangi, apakuti kawe sile ale Leza wamalilila.

¹³ Napunzile uwaca nu wiila, ala lilyo nkufuteeka sile, wakwe cisama akupwazola amafupa. Natangi sile, apakuti ule uce ale Leza wamalilila.

¹⁴ Nelenganyanga wa kamimbi. Nalilanga wa nkunda, apakuteta. Amanso yane yatonsile muno nkuyatumbwila umupela. Lilyo ala nkuti sile iye we Yawe, sungala umpususye uku ucuzi uu.

¹⁵ Uzye icani cino nemo ningavwangapo? Awewe sile wenga watulenga vyonsi vii. Umwenzo wane nemo pasi pakucula, inkuposiwa nu kulola utulo.

¹⁶ Lelo kwene we Yawe awewe sile namaikalililanga kweneko. Ungala sile umpozye uleke naikala umumi.

¹⁷ Apakucula kwene palasungutila umutende, pano awewe sile wenga ukampususya uku vikalipe vyonsi, nupya awewe ukamfumizya uyi wane onsi.

¹⁸ Yano yaya uku mpanga ya afwe yakaposiwa ukukulumbanya, afwe yakaposiwa ukukuwanzya, yene yakaposiwa nu kupaalila muli ucumi wako.

¹⁹ Apuma nupya aumi sile, ali yano yakakulumbanya, wakwe vikwene vino nemo nkucita ilelo. Akwasi ali yano yakalandila ana yao, ndi vino wemo waya uwa cumi.

²⁰ Ica cumi, We Yawe watumpozya! Lyene swemo tumakulizizyanga ingoma, nu kukwimbila apa kukulumbanya, mu Ng'anda yako ikulu amanda yonsi yano tumaikala pano nsi.”

²¹ Alino Ezaya anena antu ukukamanga icikamangwa ca masamvu nu ku cinyepelela apa cipute, cino calwalike umwene, apakuti apole.

²² Lyene Hezekiya auzya ati, “Uzye icani cino namamanyilako ukuti ndakwata nupya amaka akupitila apakuya uku Ng'anda ikulu yakwe Yawe?”