Ezaya 37 - Amazwi Yakwe Leza 2013

Umwene uzya umpandamano kuli Ezaya

¹ Lino umwene Hezekiya uvwile umulandu, papo kwene alepola ivyakuzwala vyakwe apakulanga ulanda. Alino azwala ni visamu nga aya nu mu Ng'anda ikulu yakwe Yawe.

² Lyene asenda Eliakimu, musika wakwisano na Syebina, kalemba wakwisano nga na akalamba yakwe yasimapepo. Alino ayatuma kuli kasema Ezaya, umwana umonsi wakwe Amozi, yonsi ala yazwite visamu.

³ Nayo ali pakuya mufisizya amazwi ya mwene iyati, “Uwanda uu, uwanda umwi uwa kuculamo. Uwanda umwi uwakusinkolwa nupya uwakuuvwamo ni nsonyi. Lyene swemo tuli sile wa mwanaci atakweti amaka yakupapa lino insita yakwe yamufikila.

⁴ Umwene mukalamba wa ina Asilya walatumile umukalamba wa vita vyakwe apakuti aize atukole Yawe Leza waumi. Umwene Leza wenga ale auvwe intusi zizi pakuti angalyotola antu yaya yano yali yakutukana. Wemo ungala upapatile sile kuli Yawe, antu yako yano yasyalapo apakuti yace yapusuke.”

⁵ Lino Ezaya wapokelela amazwi ukufuma ku mwene Hezekiya, nawe ayawezezya amazwi ati,

⁶ “Kanenini umusambazi winu ukuti Yawe wavwanga wati, ‘Utuvwa intete apa mazwi yamunyambo kunondi yano watuuvwa, amazwi yano aomvi ya mwene waku Asilya yatiyavwanga.

⁷ Nene kwene ne mweneco namalenga ukuti umwene mukalamba uwa ina Asilya auvwemo vimwi, vivyo ivimalenga nu kuti aswilile mwenemo uku mpanga yakwe. Ali kuno ndaleka nu kuti akafwile uku lupanga.’ ”

Aina Asilya yaswilizya ukoofya umwene Hezekiya

⁸ Lino umukalamba wa vita wilya uvwile ukuti umwene wao watafuma uku Lakisyi, nu kuya uku kulwisya umusumba wa Libina, nawe ali pakumimingana waya kuko kwene, uku kuya uvwana nawe.

⁹ Alino amazwi yafika kuli Senakelibu, ukuti, umwene wa ina Kusyi ali umu nzila, akwiza ni vita vya ina Eguputo uku kwiza yawililila. Umwene mukalamba lino uvwa, atuma kalata nupya kuli Hezekiya, umwene waku Yuda ati,

¹⁰ “Leza wako wiyo wino wemo ukutaila mwenemo utaleka akusomba sile, ndi cakuti amakunena ukuti umusumba wa Yelusalemu ntalaupoka ne mwene wa ina Asilya.

¹¹ Wayuvwila mpiti we mweneco vino nemo ne mwene wa ina Asilya nacitila impanga zyonsi, vino nkalonda ukuzyonona. Uzye ukunena ukuti wewe ungamposya?

¹² Ivikolwe vyane ali vino vyononyile umusumba wa Gozani, Halani, na Lezefu nga ukwikapo nu kulovya aina Edeni yano yikalanga mu Telasala. Nu tuluwi tuleza twa antu ya mpanga ilya, twaposiwe kuyatuula.

¹³ Uzye umwene uwamu Hamati apano waya, nanti uwamu musumba wa Alipadi, nu mu Sefalavaimu, nanti uwamu Hena nanti uwamu Iva?

¹⁴ Umwene Hezekiya ali pakutoola kalata uku nkombe, awelenga. Alino apita ku Ng'anda ikulu yakwe Leza, atoola na kalata amukonzolola nu kumwika pa mulola wa cinso cakwe Yawe.”

¹⁵ Nga alino atandika ukupapata kuli Yawe ati,

¹⁶ “We Yawe Wamaka yonsi, we Leza wakwe Izlaeli, wemuno wikala pali yakelubi, awewe sile wenga mpo wewe wateeka uwene wa pano nsi. Awewe waumvile iyulu ni nsi.

¹⁷ Sungala uvwe amazwi yonsi yaa, yano Senakelibu akulanda apa kusaalula wewe we Leza wa umi.

¹⁸ We Yawe, kwene swemo twamanya vino yamwene akalamba ya ina Asilya yalovya antu amitundu iingi, na vino yakaonona impanga zyao.

¹⁹ Twalola na vino yakaoca utuluwi tuleza twao, icakuti mucumi asi tuleza foo. Ivinkolanya vino aeneco yaipangila uku vimuti nu ku mawe, uku minwe yao.

²⁰ Ali cino fwandi we Leza witu tupususye kweneko ku ina Asilya, uleke antu yonsi apano nsi yasininkizye ukuti wewe wenga mpo, awewe Leza wacumi.”

Ezaya watumila umwene Hezekiya amazwi

²¹ Lyene Ezaya umwana umonsi wakwe Amozi awezya amazwi ku mwene Hezekiya. Amunena vino Yawe, Leza wa ina Izlaeli uvwa imipapatile ya mwene apamulandu wakwe Senakelibu umwene wa ina Asilya.

²² Na pakulanda pali aliwe, Yawe wavwanzile ati, “We Senakelibu we, ala mwine umusumba wa Yelusalemu watiukusuula wakwe cimwi nupya nu kukuwela ukukuwela.

²³ Uzye aweni wino wemo ukatuka nu kusausya? Uzye aweni wino wemo ukuzaukila nu kumutumbila inkansi? Ala asi muntu muze, lelo anene, Wamuzilo wilya wakwe Izlaeli.

²⁴ Wemo watutuma aomvi yako uku kwiza uku kunsaalula, nu kuitutumula wemo ukuitutumula, We Senakelibu waya namaceleta yako nyanya. Waya wacimvya imyamba itali sana, ukwikapo na pantonje ya mwamba waku Lebanoni. Watemola imiti imikelide ni miolivi, ilya kwene izipisye.

²⁵ Wemo ukuyuvwa uti wimba ni vilambe nu kumwa amanzi afuma umu mpanga zyuze. Waleka nu kuti ingazo zya vita vyako zyakamya amanzi yakwe Nailo, muno yakulyatola mwenemo.

²⁶ Ee, kwene nanti ungalanda vyonsi vivyo, uzye wemo utatala uvwa ukuti ne Yawe Leza anene nateinye vivyo vyonsi mpiti? Ala anene kwene nasuka nafikilizya napali ndakai kwene. Anene nakupiile amaka akuwisya imisumba ya malinga, apakuti pangasyala sile imitumba ya vitalang'anda.

²⁷ Antu yano yali mwenemo amaka yasizile, nayo ali pakutoovoka, yamaizakazila sile uku ntete. Yaya sile ungati isote lyamu mpanga, ungati umulemvwe walulembelya. Ungati isote lyakwi paala lino lyulululwa na nkungulupya, waku ufumondaka.

²⁸ Nemo namanya imisango yako yonsi, navino wemo ukacita na kuno wemo ukaya. Namanya ukuti wemo wansokela.

²⁹ Icaleka pano wemo wansokela, nu kuyuvwila nayuvwila nenga, kuno icilumba cako caticikutwala, ali cino nani namatala nkupezye. Namakutunga umu mpuno nu mukanwa, alino nkakupisye nu umu nzila kwene ino wemo wizile mwenemo, nkuwezezye nakuno wafumile.”

³⁰ Alino lyene Ezaya anena umwene Hezekiya ati, “Ivyakumanyila kweneko pa vintu vino vilaya kweneko aivi: umu mwaka kwene uu na uno ulalondelapo, mwemo mumalyanga sile ingano cimbuka. Lyene mu mwaka uno ulalondela penepo, ali lino mulatovya ingano nu kuzisinza. Mulalemamo na matingi nu kulya iviseekwa vya mwenemo.

³¹ Apa Ayuda yano yasyala mwenemo yene yalaatepa sile wa miti iilembe, ino yatwalisya imisisi pansi, ino ikaseekesya ni viseekwa.

³² Umu Yelusalemu mulasyala antu yano alasyalamo apuma. Na pa mwamba wa Zioni kwene, pano avino Yawe Wamaka yonsi wapanzile kuti ciye.

³³ Fwandi, ali mulandu kwene uno Yawe akuvwangila pa mwene mukalamba wa ina Asilya ati, ‘Senakalibu asikwingila mwenemo mu musumba uu, nanti sile ukufiika mwenemo uluceto. Pasikutala paloleke musika nanti wenga, wino amapalamila ku musumba nanti sile ukutuulumalika umutumba wivu pa kuuzinguluka.

³⁴ Pakuswililamo kuno wafumile, Senakalibu amalondela sile umuseo, uwa kwene uno wizilemo. Umu musumba uu, icumi asikutala aingile mwenemo.’ Avino ne Yawe navwanga.

³⁵ Anene nkusunga nu kucingilila umusumba uu, apakulanga vino ne mweneco nacindama, na pa ulayo uno nalavile umuomvi wane Davidi.”

³⁶ Lyene umungeli wakwe Yawe aya mu nsakwe ya asilika ya ina Asilya. Akoma mwenemo asilika ukulingana 185,000. Cino waca sile akatondo, awe antu yalola ivyala vyao vyativilala ntangali ntangali.

³⁷ Alino Senakelibu, umwene mukalamba wa ina Asilya, nawe ali pakusya insakwe nu kuswilila ku Ninive akuno aya aikala.

³⁸ Walanga uwanda umwi lino acili akupepa mu ng'anda yakwe Nisiloki, kaleza kakwe akaluwi, awe mukwai ana yakwe yaili aonsi, Adilameleki na Syalezeli, yamukoma ku lupanga, yutukila nu ku mpanga ya Alalati. Umwana wakwe muze umonsi wi zina lyakwe Esalaadoni awino amupyana pa cilimba ca wene.