Ezaya 36 - Amazwi Yakwe Leza 2013

Aina Asilya yoofya aikazi amu Yelusalemu

¹ Umu mwaka walenga ikumi na ini uwa kuteeka kwakwe Hezekiya, umwene waku Yuda, Senakelibu umwene waku Asilya uwazanzile imisumba ya malinga uku mpanga yaku Yuda nu kucimvya wacimvizye.

² Alino umwene waku Asilya watumile umukalamba wa vita vyakwe pamwi ni umba ilikulu ukufuma ku Lakisyi ukwiza ku Yelusalemu kuli Hezekiya. Alino umukalamba wiyo aimilila apipi nu mufolo wa manzi apa cilambe ca papela lwa mu mbali ya museo muno mwaombelanga yakapikula ya nsalu.

³ Alino Ayuda yatatu iyaya kuli Eliakimu, umwana umonsi wakwe Hilikiya, umukalamba wa vita wenga, musika wakwisano. Umuze a Syebina, kalemba mukalamba wakwisano. Umuze nawe a Yoa umwana umonsi wakwe Asafu, kasunga wa milandu ya mbila zya mpanga.

⁴ Umukalamba wa vita vya ina Asilya ali pakuyanena ati, “Muye mukanene Hezekiya muti, ‘Uzye icani calenga kuti upame vivyo?

⁵ Uzye ukwelenganya ukuti ukuvwamvwanya kutupu ukwa mazwi ali mano? Nanti uzye ali maka ya kulwila inkondo? Uzye fwandi aweni wino wataila uwalenga ukuti ansangukile?’ ”

⁶ Ndi cakuti uku mpanga ya Eguputo akuno wika amano, acimanye ukuti kunondi mpanga ya Eguputo yaya sile wi tete ilikontoke lino umuntu angasangula intuwa yakupitila kweneko. Lelo itete kwene lilyo likamucemba umu minwe nu kutulinkanya umu lupi lwakwe, lino wanyomelela kweneko. Vivyo ivili umwene waku Eguputo nupya avino akacita na kuli yonsi yano yasintilila kunoli.

⁷ Alino atwalilila nu kuvwanga ati, “Limwi wemo umanjasuka uti, ‘Mukataila muli Yawe Leza winu. Ndi cakuti avino cili, uzye asi a Hezekiya kwene wino watamola incende zyakupepela mwenemo kumwi nu tuvuwa twakutuulila penepo impolelwa. Uzye asi aliwe kwene uwanenyile na Ayuda na ina Yelusalemu ukuti yali nu kupepela sile apa nkolelo ya kavuwa kwene kaa?

⁸ Ali cino fwandi lyene iza sile mwandane ucuza nu mwene waku Asilya. Nemo namakupeela imfwalasi amazimbi yaili. Wemo cikulu sile uzane antu akumanile yano yangakwelapo.

⁹ Wemo wacepa sana! Nanti sile awiya kwene uwalekelezya mu cifulo, mutange mutankamale nawe foo. Uzye lyene wemo wikalila sile uli ukulolela aina Eguputo apakuti ayano yakutumila amaceleta ni vita vyakupitilapo pa mfwalasi?

¹⁰ Uzye wemo ukwelenganya ukuti nemo naitandike sile apakwiza zanza nu konona impanga yako ukwaula uwazwilizyo wakwe Yawe?’ ”

¹¹ Alino lyene Eliakimu, Syebina na Yoa iyanena umukalamba wa vita yati, “Tunene umu lulimi lwa Cialamaiki. Tukacuuvwa, lelo utatuvwanzizya mu Ciyebulai, ala na antu yonsi kwene yano uweni api linga yakukutika kuno.”

¹² Lelo umukalamba wilya avwanga ati, “Uzye mwemo mukulola ukuti umwene wane antumile kuli mwemwe mwenga nu ku mwene winu, ukwiza landa imilandu yonsi? Awe, nemo nizile ku kunena antu yano yali api linga, yano yamalyanga usali wao nu kumwa amatunzi yao, kumwi namwe kwene.”

¹³ Alino lyene aololoka nu kuzaza mu lulimi lwao lwa Ciyebulai, ati, “Mwe! Uvwini kuno vino umwene mukalamba wa ina Asilya akumunena.

¹⁴ Mwemo mutaleka Hezekiya amusombe, pano wene atakwata amaka aku mupususya.

¹⁵ Mutaleka amuvulunganye amano, akuti mutaile muli Yawe nu kwelenganya ukuti Yawe alamupususya nu kulesya ivita vya ina Asilya ukuvwangatila umusumba winu!

¹⁶ Ala mwandi mutacuvwa kuli Hezekiya. Umwene mukalamba wa ina Asilya akuti, ‘Mungala muifumile sile mwenga mu musumba, mwize mucimbe kunondi. Lyene ale mumaililanga sile mwenga amatingi inu na masamvu inu nu kuimwela sile amanzi mu vifula vinu.

¹⁷ Suka sile lilyo lino ndiza imusende nu kumutwala umu mpanga ino yaya wa mpanga inu, umwaya ivyalo vya matingi vyakupangila waini umupya, impanga umwaya ingano zyakupangila imikate.

¹⁸ Mutaleka Hezekiya amutumpike apa kumunena ndi vino Yawe alamupususya. Uzye mwatazile imulola kuno tuleza twa mitundu yuze twapususya impanga zyakwao ku mwene waku Asilya?

¹⁹ Uzye lyene tuleza twaku Hamati nu twaku Alipadi tulikwi? Uzye lyene tuleza twaku Sefalavaimu tulikwi? Uzye twene utwapuswisye umusumba wa Samaliya ku mwene wane?

²⁰ Uzye alilaci lino tuleza twa mpanga zizyo twatazile itutuula impanga yonga kuli nene? Ale lyene fwandi icani cino mukwelenganyizizya ukuti Yawe ali wino angapususya Yelusalemu?’ ”

²¹ Awe cumi, lyene alino antu nayo yikala sika! Yikala cele ukwaula ni cakwasuka, pano umwene Hezekiya wayakonkomizye ukukana asukako.

²² Lyene alino Eliakimu, umwana umonsi wakwe Hilikiya, musika wakwisano, na Syebina kalemba mukalamba uwakwisano nga na Yoa umwana umonsi wakwe Asafu kalemba wa milandu ya mbila zya mpanga, yalepola ivyakuzwala vyao apakulanga ulanda. Yaswilila nu ku mwene Hezekiya. Alino yatandika nu kumulandila amazwi yano umukalamba wa vita vya ina Asilya wala akulanda.