Ezaya 35 - Amazwi Yakwe Leza 2013

Umuseo wakutungulula kuli umuzilo

¹ Ulwanga lulazanga, na maluwa yalawalula umu mpanga ilangoke.

² Ulwanga lulimbila inyimbo nu kutololoka ni nsansa. Impanga iyali iyononeke ilayemba wa mwamba waku Lebanoni. Ilaya nu muvundo wa vyalo vyaku Kalimeli nu ku Syaloni. Antu yonsi yalalola ululumbi lwakwe Yawe, ukucindama kwakwe Leza. Yene yalalola ukulu na maka yakwe vino vyaya.

³ Kanzini amakasa atolompoke, mukomye na makokola atembokele.

⁴ Nenini atovoke umu mwenzo muti, “Posyini mutaoopa! Lolini Leza winu akwiza. Akwiza ku kumulandwila. Wene akwiza ku kumukulula.”

⁵ Amanso ya mpafu yamalola, na matwi yakwe yacipuuli yamakomoka.

⁶ Ivilema vimatolokanga wa nswela. Indimi zyakwe yaciulu zimapundanga nu luzango. Amanzi yamakonkolokanga umu lwanga ni nguzi zilapita umu mpanga ilangoke.

⁷ Umucanga ulya ukaye ulasanguka yemba. Mulazula nu tufukoka. Uwikalo wakwe yankusa ulasanguka amasanga ya matete ni mpunga.

⁸ Kulaya umuseo ukalamba uno ulaamwa ukuti “Umuseo wakutungulula kuli umuzilo.” Umuntu umukowele atalapita mwenemo ni viwelewele vya antu vitange vipumbule yayo akupita mwenemo umu nzila iyo.

⁹ Mutalaya yacisama nanti ivilyanyi umu nzila iyo. Yayo yano Yawe wakulula ali yano yalapitamo.

¹⁰ Yano Yawe wakulula yalawela uku Zioni nu luzango, ala yakwimba. Uluzango lwape lulaloleka pa mausyu yao. Yene yalapita nu luzango nu kusansamuka. Kutalaya ukucula nu kuilizyanya.