Ezaya 34 - Amazwi Yakwe Leza 2013

Yawe alavunuka aina Edomu

¹ Palamilini kuno mwe antu amitundu yonsi, kolonganini apakuti muvweko. Antu yonsi yano yikala pano nsi kaize yuvwe kunondi.

² Yawe watasokela antu amitundu yonsi kumwi ni vita vyao. Wene watapingula ukuyalovya. Alayakomola yonsi pyu.

³ Ivyala vyao vilalala insansalila ukwaula kuzikwa. Vilaolela pambiliwili nu kununka wakwe cimwi. Imyamba ilayenza cee uku wazi wao.

⁴ Ilanzi, umwezi ni ntanda vyonsi kwene vilasunguluka. Iyulu lilavungana nu kongoloka wi pepala lino umuntu akupomba. Intanda zilapona wa mafwa yano yakulukuta uku mutingi nanti umusamvu.

⁵ Yawe akuti, “Natinteyanya ulupanga lwane umwiyulu. Nalo pasi pakukalipa. Lwasya luzanze impanga yaku Edomu. Lumazanza antu yano napingula ukuloviwa.”

⁶ Ulupanga lwakwe lumakandana uwazi wao, nu kunonoka uku mafuta ya twana twa mfwele ni mbuzi, lino yakupeela impolelwa. Yawe aliwe amatuula impolelwa uku musumba wa Bozila, muno amakomola antu aku Edomu.

⁷ Antu yamapenukanga sile wa mbo, nanti tucipambasi. Impanga imayenza cee uku wazi nu musili umanonokanga sile uku mafuta.

⁸ Ilaya ili nsita ino Yawe alapususizyamo Zioni, nu kulandwilapo anisi yakwe.

⁹ Inguzi zyamu Edomu zilasanguka amanenekela nu musili ulasanguka amaluti. Impanga yonsi ilaapya sile wa makala ya moto.

¹⁰ Impanga ilaapya usiku nu musanya ni cunsi citalatala cite ukusuuka mwenemo. Impanga ilayelelela pee iyononeke. Mutalaya umuntu wino alatala apite mwenemo.

¹¹ Yasinsimwe na yamwankole ali yano yalaikala mwenemo. Yawe aliwe alaleka kuti impanga isyale ikazyana, ndi vino yali lino ivintu vitatala vyaumbwamo.

¹² Mutalaya umwene wakuteeka impanga ilya nanti ukupeela utunguluzi, pano intunguluzi zyao zilalowa pyu.

¹³ Umu masano monsi mulamelelwa imyunga, yalwenya na yankololwe. Mulasanguka icifulo cakwe yankusa, nu wikalo wakwe yasinsimwe.

¹⁴ Inyama zya mpanga zilalulumba mwenemo, ni viwa amuno vilaamana. Ali muno katai wamwaka alasyukila umwakupuzila usiku.

¹⁵ Ali muno yasinsimwe yalalukila ivinsanzo, nu kuundatila amayayi, ukuulolela mwenemo, nu kukuzizyamo ana. Ali muno yalyang'anda yalakonganila.

¹⁶ Londa nu kuwelenga umu lupapulo lwakwe Yawe, lwa vintu vyaumi. Muwelenge mumazana ukuti pali vyonsi pasikuulilwa nanti conga. Nupya vyonsi vimayanga viili viili, iconsi ni cakaci. Yawe aliwe kwene wakomailanga ukuti ciye vivyo kwene. Umwisikulu aliwe alavikonganika pamwi.

¹⁷ Yawe aliwe amavyankanya impanga pano viyelile, nu kupeela conga conga iciputulwa cakweco. Ili mpanga ino ilaya iyaupyanyi, iyakwikalila mwenemo ukufika sile nu kukusila kwa nsi.