Ezaya 33 - Amazwi Yakwe Leza 2013

Ipepo lyakulenga uwazwilizyo

¹ Kalanda kunuli we mononyi wemuno utatala wononwa, kasampa wa vyuma wemuno utatala usampwe. Lino ulamala ukonona, yalakonona. Na lino ulamala ukusampa ivyuma, nawe yalakusampa.

² We Yawe utuyele uluse, awewe twataila. Uye kazwa witu cila katondo, uye ufyusi witu mu nsita ya ulanda.

³ Apa kuuvwa ukoofya kwako antu yakautuka. Wemo ndi wakatuka sile, imitundu yonsi ala yapasika.

⁴ Yakakolonganika ivisampwe ungati amakanta. Nu kutoloka yakatoloka wakwe makanta.

⁵ Yawe wacindama, pano wikala ukwiyulu. Wazuzya Zioni nu ulungami nu wololoke.

⁶ Wene alamupeela umutende ufumaluke mu manda inu pano nsi. Wene alamupeela ukucenjela nu kumanya kuti vice vimupususye. Ukoopa Yawe ali kuno kukaletela umuntu cuma kwene cii.

⁷ Silolini kuno antu aposye yakulilizika mu miseo, ni nkombe zya longo zikulila ulanda.

⁸ Imiseo yativuma, musi antu yano yakupitamo. Yonona upangano, yasuula yakambone, yasisakamala muntu nanti umwi.

⁹ Impanga ikulosya nu kucululuka. Lebanoni watalemwa ni nsonyi, watafoota. Cifoloma civunde caku Syaloni cili wa lwanga. Umu Basyani nu mu Kalimeli amafwa yatiyapululuka.

Leza wasoka anisi yakwe

¹⁰ Yawe wanenyile antu ya mitundu yuze ati, “Lyene nemo namacitapo cimwi! Namamulanga vino nemo naya na maka.

¹¹ Mwemo mwikalila sile ukupanga ukucita vyauwelewele, nga na vino mukacita navyo kwene ivyauwelewele sile. Lyene mumailetelela mwe eneco.

¹² Antu ya mitundu yuze, yalatulumana witwi, yalaloka wa myunga ino yatiipya.”

¹³ Lekini yonsi yano yakaikala mupipi, na ali ukutali yuvwe vino nemo namacita, uleke yazumile amaka yane.

¹⁴ Aikazi yamu Zioni yati yoofiwa, antu atamanya Leza yakuizakazila uku ntete. Yakulanda yati, “Mipingwile yakwe Leza yaya wa moto usita ukoca. Uzye aweni pali sweswe angapusuka ku moto wamusango ndi uo?

¹⁵ Ala mungapusuka ndi mwatandika ukucita ivyaololoke nu kulanda ivyacumi. Fwandi mutaya nu lwiswa umu kulonka ivyuma ku alanda, nupya mutapokelela amafukakanwa. Mutaezya ukuvwana na yacikoma, nanti yayo akacita iviipe.

¹⁶ Lyene mumapitanga nu longo nu kwikala ku matwi cele. Cimakolananga kwati mwikala mu musumba wi linga lyamaka. Mumaiililanga ni cakulya ningo nupya mutaluulilwa na manzi yakumwa.”

Uku nkolelo kulaya wikazi walulumbi

¹⁷ Umu nsita ilya mulailolela umwene umwi akuteeka nu ucindami, alino mulalola impanga isuma ivunguluke wakwe cimwi.

¹⁸ Mu myenzo inu mulaelenganya pa vintu vino vyamoofyanga mpiti. Mulati, “Uzye antu yaya atusonkesyanga umusonko, yali kwi? Uzye inengu zizi zyapa mpungu zili kwi?”

¹⁹ Mutalalola nupya ainamasi amitumfyo foo, yano yakalanda ululimi luno musiuvwa.

²⁰ Sitala lolekesyini Zioni, umusumba wa vyakuzevya vitu vyaupefi. Amanso inu yalalola Yelusalemu, wikalo wa longo, itaalu lisitenta, lisisimpulwa impopo, ni myando ino wakwata iyamuntaputulwa nanti lyonga.

²¹ Ali muno Yawe alatulandila ucindami wakwe. Mulaya wa ncende zya nguzi zisalale nu tunguzi utunono. Amato ya nkafi yatalapita mwenemo, nupya ivyombo ivikulu vitalapita mwenemo.

²² Pano Yawe ali kapingula witu. Yawe ali kapela wa masunde, Yawe ali Mwene witu. Aliwe akatutuula.

²³ Indele zya mawato yao zyaciwelewele, na matanga yano yatwika kweneko yalaposiwa ukuvunguluka, apakukola umuza wakuyasimuzya.

²⁴ Apa antu yonsi aaya umu mpanga itu, patalaya nanti wenga alailizyanya apakulwala. Alino antu yonsi nayo yalaelwa uluse apa uyi wao.