Ezaya 32 - Amazwi Yakwe Leza 2013

Mwene umulungami aliza

¹ Uwanda umwi kuliza umwene muze, wino alateeka nu wololoke, ni vilolo vyakwe vilateeka nu ulungami.

² Nayo yalaya kwati ali yakucingilila antu uku muza. Kwati ali yano yalapusukilako uku cipunga caku ufumondaka. Yalaya wa tunguzi twa manzi utwaya mu lwanga, ungati ali cisao ca mulunda umu mpanga yumalale.

³ Lyene amanso yakwe yayo akalola yatalazyata awe, na makutwi yakwe yao alalondesya kuuvwa yalakomoka.

⁴ Yalateeka imyenzo nu kusumba amano kuli vino antu yalacita, nu kulanda yalalanda ivili mu myenzo yao.

⁵ Iciwelewele citalatala camwe musambazi, nanti umuntu umutumpe kucindikwa.

⁶ Pano iciwelewele ca muntu cikalanda ivyauwelewele, nu kwelenganya ukucita ivintu viipe. Ivintu vino cikacita na vino cikaelenganya, vyonsi ivyakusaalula sile Leza. Nupya citange citale cipeele ali ni nzala icakulya nanti amanzi kuli yayo ali nu lusala, awe.

⁷ Umuntu umutumpe inzila zyakwe iziipe. Wene akaelenganya ivyakufyengelekezya sile apina umu kuyatumpwila. Nupya akayakanya ni nsambu zyao.

⁸ Lelo umuntu uwa mwenzo wa ufumacumi wene akapanga sile ukucita ivintu vya mpomvu. Nupya nu kukoma wakoma ndi, umu kucita ivilungame.

Ukusoka yamangu akasu

⁹ Uvwini kuno mwe yamangu, mwemuno mwikala mu cinenke, muno musisakamala akantu nanti kamwi.

¹⁰ Api lelo mucili mu cinenke, lelo mu mwaka ukwiza mulaekaeka sile, pamulandu wakuti kutalaya amatingi yano mulaakuntola, awe.

¹¹ Caleka fwandi tandikini sile ukuizakazila uku ntete, mwemuno mwikala mu cinenke. Musokozoke sile mwemuno mutasakamala akantu nanti kamwi! Zulini insalu zinu zino muzwite, musyale sile ni visamu mu misana.

¹² Ikampawilini sile amakasa pamulandu nu kuteeza ivyalo vinu ivivunde, vino vilononeka kumwi ni vyalo vinu vya matingi.

¹³ Alino musakamale na pa myunga ino ilaakulila pamwi na yankololwe mu musili wa antu yane. Losyini amang'anda yonsi muno mukaikala antu nu luzango. Mulilisye mu musumba uno antu yakazevyamo.

¹⁴ Nu kwisano kwene kutalaya umuntu wino alaikalako, nanti sile mu musumba onsi mutalasyala nanti wenga uwa cingila. Imisumba yonsi iya malinga kumwi ni mpungu pano yakatokowala pa kuisopa, vilasyala ivitalang'anda sile. Yacoolwa ali yano yalaazeuluka mwenemo, ali muno ni mfwele zilaalila mwenemo umulemvwe.

¹⁵ Lelo Leza alatutumila Mupasi wakwe, ukufuma kwiyulu, alino amalwanga yalasanguka avunde, cakuti nu mu vyalo mulafuma ivyakulya vya mpomvu.

¹⁶ Mpanga yonsi mulacitika ivya ulungami ni vyaololoke, ukutandikila sile umu lwanga mpaka nu ku vyalo ivivunde.

¹⁷ Mu mpanga mulaya ulongo ni cituku, pano umuntu wensi alacita ivilungame.

¹⁸ Umu mpanga ya antu yakwe Leza mulaya ulongo ni cituku, na antu yakwe nayo kwene yatalalola nanti cimwi ica kuyasakamika.

¹⁹ Alino nu mu mitengo yayela mu misana ya myamba, mulaya ivisao. Umu manyika namo mulaya imisumba, ino yalaikala mwenemo mu cituku.

²⁰ Antu yonsi yalasansamuka wakwe cimwi, apakusyukila amanzi nyanya akumezya nu kukuzya ivilimwa vyao, alino nu kuleka ukuti ing'ombe na yapunda vyaipitila sile, nga nu kuilila ivyeneco.