Ezaya 31 - Amazwi Yakwe Leza 2013

Leza akasunga wakwe Yelusalemu

¹ Kalanda kuli yayo akasimwilila ku Eguputo, ku wazwilizyo. Yao akaika amano umu kutaila imfwalasi. Yao ataila amaceleta, ni vita ivikasimuzya amaceleta kwene ukwaula kutaila muli Yawe, Wamuzilo wakwe Izlaeli.

² Lelo Yawe uwamano nupya wamanya ivyakucita! Wene akaleta uzanzo kunoyali. Nupya ndi cakuti wapanga ukupezya aipe, ukwikapo na yaya kwene kuno yakasimwilila, ala avivyo kwene.

³ Aina Eguputo yasi yaleza foo, lelo antu sile. Imfwalasi zyao isi mipasi foo, lelo inyama sile. Lino Yawe alacitapo cimwi, ale umutundu wa antu yamaka wapelelwa. Na antu ya mitundu yonsi yoili ale yalowa.

⁴ Yawe watanena ne Ezaya ati, “Vivi kwene vino cisama akang'anzila inyama, ino watalema, zino zikautuka icongo cakwe yakacema nanti yangamupundilila uli, ali vino nani kwene, ne Yawe Wamaka yonsi cilaya. Kusi nanti acimwi cilangofya apakutuula umwamba Zioni.

⁵ Vivi kwene sile vino icunyi cikalelemba apali icinsanzo, apakusunga utwana twaciko, ali vino ne Yawe Wamaka yonsi ndasunga umusumba wa Yelusalemu nu kuutula ku anisi.”

⁶ Nupya Leza wavwanzile ati, “Mwe ina Izlaeli icumi mwaifya wakwe cimwi kunondi, mwalunda penepo nu kuntalamila. Ali cino fwandi welini kunondi.

⁷ Mu wanda ulya mwensi mulasumba utuluwi twinu utwipisye, tuno mwemo mwaipangile kuli siluva na zaabu.

⁸ Ali lino lyene impanga ya Asilya ilononwa uku nkondo. Yayo nayo yasi maka ya muntu foo yano yalononeka. Aina Asilya yalapuuka inkondo ni vita vyao vilasendwa uku uzya.

⁹ Umwene wao alapuuka, uku kuizakazila sile umweneco, uku ntete kumwi na yamusika yakwe kwene. Nayo kwene yaluutuka inkondo, yalasya ivita vyao ivya nkondo,” ivyalanda ne Yawe, nemuno yakapepa mu Yelusalemu, na wino mapepo yaya mu Zioni muno yakaocela impolelwa.