Ezaya 29 - Amazwi Yakwe Leza 2013

Alyeli wazanzwa

¹ Kalanda kunuli we Alyeli, we Alyeli, we musumba muno Davidi wakuzilemo insakwe! Lekini papite umwaka onga nanti iili apakuti na manda ya uzevyo yatwalilile.

² Ale lyene Leza wiza ku konona umusumba wa Alyeli, umulaya impoma nu kulukusya minsozi, alino nu musumba kwene ulasenuka iciimbili cakocelapo impolelwa.

³ Leza aliwe aliza atantamike ivita wi linga apakufulula umusumba. Aliza auzinguluke, nu kuuzanza aliwe kwene alauzanza.

⁴ Yelusalemu alaya sile wakwe katai wino akuicuzya sile pakulanda vimwi apa nsita ino ali pansi, akufuteka apa nsita ino ali mu luvukutu.

⁵ We Yelusalemu, ala anisi yako yonsi yano yakakuzanza yakaulululwa sile wa lutukumbu, ni vita vyao vyamaka vilululwa sile wa lukungu, wemo ukwaula nu kuti wenekele foo.

⁶ Uliukila sile icilulumo camaka, ni cilundumusi, ni congo cikalamba, ivilafuma kuli Yawe Wamaka yonsi apakwiza ku kukupususya. Alatuma ni cimuza, na nkungulupya nga ni cimbilimbili ca moto ca koca ivintu coceoce.

⁷ Umucumi ivita vya antu amitundu yonsi vino vikawililila umusumba wa Alyeli kumwi ni vyanzo vyao vya nkondo ni viya vyao vyuze ali lino vilongoloka wa ciloto caku tulo.

⁸ Antu amitundu yonsi yano yakakongana uku kwiza wililila umusumba wa Yelusalemu, yalaya wa muntu wino aizi utulo, pamulandu wa kuongoka ni nzala. Alino umu tulo kwene watandika ukulota kwati wasya icakulya. Lelo lino wiza wazyuka umu tulo, watandika ukuvwa ukuti acili akuuvwa inzala. Nanti wa muntu wiya wino akulonda ukufwa ku lusala. Alino umu tulo kwene alota akumwa amanzi. Lino wiza wasantamuka, nupya atandika ukuvwa uku mwenzo kucili kwatikulangoka, kuuma pamulandu wa lusala.

Antu asisakamala usoko wakwe Leza

⁹ Ele mwandi mupwalale! Mwalukupafula! Mwakoleka sile! Nanti angala mutamwile waini wa matingi! Pempezyokangini nanti mutamwile waini umulume!

¹⁰ Pano Yawe wataleka ukuti mwemo mwasipula, mupone nu mutulo twa mfwa. Yakasema ali yano yalaatungulula antu, lelo Leza wene wayazyatika amanso.

¹¹ Ukulola ivilolwa vyonsi vino kasema akalola, mwemo cimakananga ukumunena kweneko. Ukulola ivilolwa kunomuli, cimalolekanga kwati akalata wino yatiyapeta, umufungililwe uku nsimbi. Ndi mwamutwala ku muntu umwi wino wamanya ukuwelenga apakuti awino amuwelenge, umuntu wiyo angaya akamunene sile ati, “Awe nemo naposiwa pano kalata wii umufungililwe ni nsimbi.”

¹² Ndi mwatwala ku muntu atamanya ukuwelenga, wene alamunena ati, “Awe nemo ntamanya ukuwelenga.”

¹³ Icacumi Umwene akuvwanga akuti, “Antu yaa yene yakalanda ukuti yakampepa fwandi yakazaila sile, na mano yao yaya kuze kuze. Amasunde ya antunze ni ntambi zyao, ali vino yakaiusya sile mu mutwe, yene ali mapepo yao.

¹⁴ Fwandi lyene nemo namayazungusyanga lino namatwalililanga ukuyapezya. Yano akulola ukuti yakwata amano yamasanguka iviwelewele vya antu. Nu ucenjezi wao utalayatumbwila nanti cimwi.”

Yano yakapanda auze amano yaufi

¹⁵ Kalanda ku antu yano yakaezya ukufisa Yawe amapange yao! Vino yene yakapanga ukucita, yakavicitila umu umfisolo nu kwelenganya yakaelenganya ukuti kusi nanti wenga akuyalola nanti ukumanya vino yakucita.

¹⁶ Yene vyonsi yakavilozya muze muze sile. Uzye pali nakamata nga ni mbulo kwene icacindamapo icani? Uzye icintu cino umuntu wapanga ali cino cingamunena citi, “Asi wewe wampanga.” Nanti uzye inyungu inganena nakamata iti, “Pasi vino wamanya!”

¹⁷ Antu yakavwanga ukuti apaya itesi patangepalengele ukuwanga penepo icalo. Na pano paya icalo napo patangepalengele ukuya penepo itesi.

¹⁸ Mu wanda ulya yacipuuli yalauvwa kuno yalawelenga ulupapulo longa. Ni mpafu zino pa manso pafita fititi, nazyo lyene zilalolekesya.

¹⁹ Antu yasilesile kumwi na alanda, yalasyukila insansa wakwe cimwi, zizyo zino Leza Wamuzilo wakwe Izlaeli akapeela antu.

²⁰ Antu yalukang'ansi na yano yasuula Leza yalalowa. Ala aipe yonsi yalalowa.

²¹ Leza alalovya yayo yonsi yano yakasombezya auze imilandu, alalovya na yayo yonsi yano yakakana kuti yapezye yampulamasunde, na yano yakapeela umboni waufi, apakufyengelekezya antu akaele umu milandu yao ilungamane.

²² Fwandi lyene Yawe, Leza wakwe Izlaeli, wino watuulanga Abulaamu mu macuzi akuti, “Mwe antu yane mutalazewana foo, mutalafusya amanso pamulandu ni nsonyi nupya.

²³ Pano mulalola ana yano lyene ndamupeela. Mulasininkizya nu kuti nene Leza Wamuzilo wakwe Izlaeli. Mulancindika nu kunkwatila icoopo.

²⁴ Yano yakapumboka yakwata amano, na yano yakailizyanya pano zyacela, nayo kwene yalauvwa insansa lino yalasundwa kweneko.”