Ezaya 28 - Amazwi Yakwe Leza 2013

Usoko ku wene wa mutundu wa kukayeya

¹ Kalanda ku ng'anda ya cilumba ya akolesi, aina Efulemu nu kwi luwa lyalokota. Ucindami wakwe uyembe, uno watongomala pa mutwe wa nyika ivunde, ya akolesi yakwe waini, auwo ulambalile papo.

² Yawe alipo na umwi wiyo wamaka wino amatuma ku kuyazanza. Amaiza kunoyali wa mvula ya mawe, wa mvula ya cipunga nupya yakwe mulamba uwatauwa nu kwiza unzya impanga.

³ Ivingala vya maluwa ivyacilumba, ivikazwala intunguluzi zizya zicakolwa, vili nu kulyatolwa.

⁴ Ukucindama kwa ntunguluzi zya vilumba kukuya kukusililikila wa masamvu yano yakatandikilapo ukuca umu mwaka. Yano antu yakatandikilapo ukulya nu kusila yasila zuwazuwa.

⁵ Mu wanda ulya Yawe Wamaka yonsi ali wino ali nu kwiza ungati ali ni cingala ca maluwa, nupya uwa lulumbi, uwakuti antu yakwe yano yakupusuka yakwatilepo akameko.

⁶ Antu yano yakaputula imilandu ya yauze, Leza umweneco amaiza ayalangilile umwalola ulungami. Nupya aliwe kwene amaiza akomelezye yayo akazinga anisi yano yakaizila ukuzanza impongolo zya musumba.

Ezaya na yakasema amu Yelusalemu akolesi

⁷ Na yakasema kwene kumwi na yasimapepo yatiyakoleka cakuti yakupempezyoka sile apa kupita. Yene yatiyamwa wakwe cimwi waini wa matingi, pamwi nu wengwa ukalipisye, cakuti yakuuluunsya sile, caticiyapezya na mano. Yakasema yatiyakolekesya cakuti yakuposiwa nu kwilula ivilolwa vino Leza akuyalanga. Yasimapepo nayo kwene yatiyakoleka cakuti yakuposiwa nu kupingula imilandu ino antu yakuleta kunoyali.

⁸ Apa matebulo yonsi pali amalusi yatupu, cakuti pasi nanti pamwi apasile pano ungati apasuma.

⁹ Yene yakailizyanya pali nene yati, “Uzye Ezaya yano akalola ukuti angayasunda ayaweni? Yano walola ukuti yakaika amano ku mazwi yakwe ayaweni? Amazwi yakwe yalingine sile ukunena utunya tuno twacilumuka sile ukwiyele!

¹⁰ Ezaya wene apakutusunda akawatawata sile! Wene akaezya ukutusunda izwi ni zwi, umusilwa nu musilwa nupya isambililo ni sambililo. Paa tunono, na papa tunono.”

¹¹ Lyene mwemo ndi mutakasi ukuuvwa kuli ne Ezaya, lyene fwandi Leza umweneco kace amutumile ainamasi akayenda pakuvwanga uleke ayano yace yize yamusunde.

¹² Mwemo mwensi Leza waleka ukuti mwaipuzila mu longo lelo mwemo mwakana ukuvwa kunoli.

¹³ Icaleka fwandi Yawe umweneco amamusunda mu kuwatawata sile, mu kumusunda izwi ni zwi, musilwa nu musilwa, ni sambililo ni sambililo. Alino lyene mumacitanga cila lutampulo luno mwatampula ala mukupempezyoka. Mumaicisolanga nu kusendwa uzya lili lili.

Iwe lya pitungu lya kwika mu mufula wa Zioni

¹⁴ Mwe antu ya vilumba mwe! Mwe muno mukateeka antu amuno Yelusalemu, uvwini vino Yawe akuvwanga

¹⁵ Mwemo mukuyuvwa ukuti mukauvwana ni mfwa, mukuti mwapangana ni mpanga ya afwe. Mwemo mwasininkizya ukuti lino icinkunka ciliza, mwemo citalamukuma foo. Pano mwikalilila sile ufi nu ucenjenzi apakuti ali vino vyamupokololako.

¹⁶ Ali cino Yawe Simwandalali akuti, “Nemo namaimba umufula mu Zioni umucumi. Alino umufula kwene uo, namaika penepo iwe lyonga ilikome, ililemvilwe penepo amazwi akuti, ‘Uwazumila atalatenkana!’

¹⁷ Ulungami ali uno umaya umwando wakupimilako utali wa mufula, alino ukulungika nako kumaya ali kacela ka kumwando aka kupimila kweneko ukololoka kwa mufula.

¹⁸ Icuvwano cino mwemo muvwana ni mfwa cilasila, nu upangano uno mwapangana ni nsi ya afwe, nao kwene ulasila. Lino icinkunka caca ciza, ciliza cimufikile.

¹⁹ Cilamuvumvunya lyonsi sile cila wanda pano wacela.” Ndi cakuti mwatezya ivintu vii kuno vilozile, mungatandika mwaizakazila sile uku ntete.

²⁰ Mulaya wa muntu wiya wino yakataka umwi pinda yati, “Umuntu umwi watatambalala apa katala akiipi, nu kwezya ukuvimbala kaulangeti akali wa citambala uku wipi.”

²¹ Yawe alakanzaana pakulwisya, ndi vino wacisile apa mwamba wa Pelazimu, nu mu cifoloma ca Gibyoni. Ali kuti ace aombepo cimwi cino wapanga ukuomba nanti angala cino wapanga ukuomba cikuloleka ungati icintu sile cuze cuze. Ukuya kwene alamala ukuomba umulimo uo, lelo umulimo uo umulimo uwile.

²² Ali cino fwandi mwemo mutaseka kwati ivintu vimwi ivyamyawe, vino nemo nkumunena! Ndi cakuti mumacita vivyo, awe cumi cilamucuzya ukulola umwakupusukila. Nemo ne Ezaya natinjuvwila kuno umusambazi Umwene Wamaka yonsi akupanga ukonona insi yonsi.

Amano yakwe Leza

²³ Mwe, ala kutikini kuli vino ne Ezaya nkuvwanga, musumbeko amano kuli vino nkumunena.

²⁴ Kutaya umulimi nanti wenga akapelela sile ku kulima ivyalo vyakwe, mu kuvisankaula sile nu kulinganya umusili.

²⁵ Umulimi wensi pano wapela, akati ndi wamala ukuteyanya umusili alino akomela imbezu izili wa usozi ni ntoyo. Uzye asita ni ngano mu ncende yakwezyo, baale nawe mu ncende yakwe, asuka atovya ni nkona umu mbali?

²⁶ Umulimi akamanya ningo ivyakucita, pano a Leza awino wamusambilizya ivyakucita.

²⁷ Wene asitola icimunsi icinyome acino atandika ukupuulila imbezu zya usozi nanti ntoyo foo. Wene akatoola sile utumyunsi utulinzile, utupepuke.

²⁸ Asionona ingano zyakwe umu kuzifwantola sile ukwaula ukuta, awe. Wene wamanya ivyakusokola ingano, akapisya ningo iceleta penepo ukwaula kuzyonona.

²⁹ Amano akuombela vivyo vyonsi wafumya kuli Yawe Wamaka yonsi. Vino Leza wateyanya ivyamano yatupu nupya vikaomba ningo insita zyonsi!