Ezaya 27 - Amazwi Yakwe Leza 2013

¹ Mu wanda ulya, Yawe alatola ulupanga lwakwe ulukalipisye, nupya alakoma nu kupezya ali luno alapezezya icilyanyi cica ci Leviatani, cino cikanyunkuta apakupita, cino cikaivyonganya nupya cino cikaikala muli yemba.

² Mu wanda ulya, Yawe alailizyanya pa calo cakwe ca matingi, ati,

³ “Anene sile nkacisunga nu kucikontelela nu mute, usiku nu musanya, pakuti kutaya nanti umwi uwakucivulunganya.

⁴ “Nata ukuilizyanya apa calo. Ndi cali cakuti yankololwe ni myunga avino vyakwatilamo umuzano, nemo ningavilwisya suka sile imvyoce pyu.

⁵ Lelo ndi cakuti anisi ya antu yane yakulonda ukuzina kunondi, kaize tuvwane nayo ivyakwikala umutende, pakuti paye umutende pali alio nani.”

⁶ Mu wanda ulya aina Izlaeli ana yakwe Yakobo yace yazyansye wa misisi ya miti. Yene yalakula ningo, yalawalula nu kulemba ningo. Insi yonsi ilalimba iviseekwa vya micitile yao isuma.

⁷ Yawe atatala wapuma aina Izlaeli ndi vino wacisile ku anisi yao. Wene atatala wayakomola ndi vino wakomozile yayo ayakomolanga.

⁸ Wene wayapezizye wakwe cimwi apakuyazingila ku mpanga ya inamasi. Wayulula ku muza wakwe ukali, uwaya wa cipunga icikafuma ku ufumondaka.

⁹ Uyi wa ina Izlaeli, ana yakwe Yakobo, utalelelwa foo. Suka sile manye lino yalamala ukutamola amawe yano yakuulila utuvuwa twa antu atamanya Leza. Vilaya ivyakusyunola ndi vino yakasyunola insio, nupya suka yakamale ukonona amaunkolanya yakwe Asyela yonsi, kumwi ni viimbili vya tuvuwa tonsi utwakocelapo ubani.

¹⁰ Umusumba wa malinga watiusyala sile ivitotela vitupu. Antu yatiyasaama mwenemo, mwatimusyala sile cele ungati umu mutengo. Iviteekwa ali muno vikulya nu kulala. Amuno vikulya amafwa ni vipupa.

¹¹ Akula insaala zyuma nu kukozoka, yamangu yiza yazyoca. Pano umutundu uu utaya na mano. Ali cino na Leza, kaumba wauko atalayaela uluse. Kaumba wao atalayuvwila amizu foo.

¹² Mu wanda ulya Yawe alakolonganika antu yakwe ukutandikila sile ku luzi Yufulate, ukuyapelela kuli nande waku Eguputo. Wene alayapaatulula wenga wenga ndi vino yakaelulula ingano ukufuma mu vinkapala.

¹³ Mu wanda ulya intandala ilalila, iyakwama aina Izlaeli yonsi yano yikala mu mpanga ya uzya, mu mpanga ya Asilya nu mpanga ya Eguputo. Yalawela nu kwiza pepela Yawe mu Yelusalemu, pa mwamba wakwe wamuzilo.