Ezaya 26 - Amazwi Yakwe Leza 2013

Leza alapeela ucimvyo ku antu yakwe

¹ Mu wanda ulya antu amu mpanga yakwe Yuda yalimbila ulwimbo luu ulwakuti, “Swemo twakwata umusumba wamaka! Apa kutupususya, Leza umweneco aliwe watucingilila ukwi linga lyauko.

² Yulini imilyango muleke antu ya mutundu ulungami yingile, uno ukalondela ivyacumi.

³ We Yawe antu yano yakasumba amano kuli wewe, nu kukutaila, leka yaikala umutende.

⁴ Mwataila muli Yawe insita zyonsi, pano aliwe akamutuula insita zyonsi.

⁵ Wene wacefya antu yavilumba, wonona umusumba wamaka uno yakaikala mwenemo. Wawisya amalinga yakweo nu kuyatamola.

⁶ Ali pakuti alanda yano yacuzyanga, yaulyatole ni ngazo zyao.”

⁷ Inzila ya muntu umulungame yaya itambalale. We Yawe, awewe walinganya inzila ya mololoke.

⁸ We Yawe, awewe twatailanga umu nzila ya upinguzi wako kwene. Izina lyako nu kukwiusya, ali vino umwenzo wane ukakumbwa sile.

⁹ Apa nsita ya usiku nkakuluuka wakwe cimwi. Lino ulalolwela aikala nsi, ali lino yonsi yalamanya ulungami vino waya.

¹⁰ Kwene nanti wemo ukalyombeleka antu aipe, awe cumi yene yasiezya ukucita ivilungame nanti panono. Nanti sile umu nsi ya antu akazifya, namo kwene icili conga sile, yakakana ukuzumila uwene wa ukulu wako.

¹¹ Anisi yako yatamanya ukuti wemo ungayakalipila. Ala we Yawe leka insonyi ziyaleme, leka yacule ucuzi uno wayateyanyizizya. Yalange ukutemwa kuno watemwa antu yako.

¹² We Yawe, awewe ukampela ulongo, pano vyonsi vino tukalola umu kuomba, awewe ukalenga ukuti tuvilole.

¹³ We Yawe Leza witu, nanti angala twatazile tumateekwa na yamwene yauze, lelo awewe wenga mpo tukacindika izina lyako.

¹⁴ Pali ndakai lyene yafwa yonsi, nupya yatalatala yayeko. Imipasi yao italatala ikatuke foo, pano awewe wayapezya nu kuyonona. Kusi nanti umwi akaiusya, awe.

¹⁵ Awe lyene watusandulula umutundu witu. Watukuzya monsi monsi impanga itu. Na pakucita cico, awe lyene wemo ukacindikilwapo.

¹⁶ We Yawe, wapezya antu yako, alino umu ulanda wao ali pakupapata kunuli.

¹⁷ We Yawe, awewe waleka ukuti twakulilila, ndi vino nacivyazi akakuuta pakulela.

¹⁸ Twali wa antu anyomelile, akuwaika nu kunyongotoka apa mala. Lelo tutaweni cino twaviile awe. Umupu sile ali uno wafumile. Tutalola cino twaombile impanga itu, vino twacita ivyasilesile.

¹⁹ Antu yako afwe, yalikala muno nsi apuma nupya ni vyala vyao vilakatuka. Yonsi yayo alala mu malindi yao, yalakatuka yalaumila nu tupundu. Pano wakwe vivi kwene vino ulumi lukayengesa, nu kuzukizya impanga, ali vino we Yawe ulatutulula afwile mpiti.

Kupingulwa kwa ina Izlaeli nu kututululwa kwao

²⁰ Mwe antu yane aleni ingilini mu ng'anda inu, muyale ni visasa. Mufisame apa kasita kanono cisuke icipyu cakwe Leza cisile.

²¹ Pano Yawe wataiza ku kupezya antu ya pano nsi apamulandu wa uyi wao. Insi imasokolola uwazi uno yene yazwisya. Italazizimizya ukufisa antu yano yakomile.