Ezaya 25 - Amazwi Yakwe Leza 2013

Ulwimbo lwa kulumbanya Yawe

¹ We Yawe, wewe uli Leza wane. Namakulumbanya nupya namalumbanyanga izina lyako. Pano wemo wacita ivintu vyakuzunguka, umu ufumacumi, ivintu vino wapanzile ukucita na mpiti.

² Pano wemo wasenula umusumba ukuya umutumba wa mawe, umusumba ulya uno wali ni linga wausenula waya ivitotela. Utalatala ukuulwe nupya.

³ Ali cino fwandi umutundu wa maka umakulumbanyanga. Umusumba wa mitundu ikalipe umakoopanga.

⁴ Pano akuli wewe ali kuno apina yakautukila, apali ponga na antu yano yatakweti kaazwa wao. Akuli wewe ali kuno yakazina umu nsita zya ntazi. Yene yakauwa kunuli imvula ya cipunga. Wewe uli cisao cino yakauwa mwenemo icipuki ca kasanya. Antu yaluzazwe yakoline wa cipunga icikutensya ulung'umba.

⁵ Yene yakaiza wa cipuki icikaiza pa nsita ya cilala. Lelo we Yawe watumyalalika anisi itu, yaya na mya. Watumyalalika icongo cao ndi vino ikumbi likacita lino akasanya kalanguka.

Leza wateyanya ukwimula antu

⁶ Apa mwamba uu uwa Zioni ali pano Yawe Wamaka yonsi alimula antu amitundu yonsi pyu iya pano nsi. Palaya ukuilyokezya ivyakulya visuma na waini umusuma wakwe cimwi, inyama isuma na waini wampomvu wakwe cimwi.

⁷ Apa mwamba kwene uu, ali pano alasisya ikumbi lya ulanda lino lyavimba antu amitundu yonsi, ilyafupilizya antu amu nko zyonsi.

⁸ Lilyo ala wataonona ni mfwa kwene! Yawe Simwandalali alakumbula aminsozi mu manso ya antu yonsi. Wene alasisya insonyi uku antu yakwe yonsi. Yawe watavwanga.

⁹ Mu wanda ulya yene yalavwanga yati, “Cumi kwene wi ali Leza witu. Twataile ukuti aliwe alatukulula! Wene ali Yawe nupya tukataila munoli. Si lekini tuzange nu kusansamuka pano watatupususya.”

Leza alavunuka Moabu

¹⁰ Yawe alacingilila umwamba uu ni kasa lyakwe, nga lelo aina Moabu alayalyatola ndi vino insawa zikalyatolwa muli citindi umu ciwina.

¹¹ Yalati ndi yatumpula amakasa yao, wa antu yano yakwezyo ukowa, Yawe nawe alayapezya nga na makasa yao yalapona wa maleka.

¹² Icacumi, Leza alawisya amalinga yonsi pyu amu Moabu. Alayaongolola pansi, mpaka nu mu lutukumbu kwene.