Ezaya 24 - Amazwi Yakwe Leza 2013

Yawe alakalipila insi yonsi

¹ Cenjelini, Yawe alonona insi yonsi pyu, yapano pansi nu kuisenula ulwanga. Alavulunganya ukuyemba kwa iko, nu kusalanganya antu yonsi aikala mwenemo.

² Kuli wensi cili nu kuya icili conga. Kuli yasimapepo nu ku antu, ku asambazi nu ku azya kwene. Uku akote nu ku ance kwene. Kuli yakakala na kuli yakakazya kwene. Kuli yakakongwesya na kuli yakakongola kwene. Kuli yakaazima na kuli yakaazimisya kwene. Uku apina nu ku akama kwene.

³ Insi yonsi ili nu kononeka, mutalasyala akantu nanti kamwi foo. Endi, Yawe aliwe wavwanzile, nu kucitika, cilacitika. Natimvwanga, ne Yawe

⁴ Insi ili nu kukamilwa, nu kuumila. Insi yonsi ili nu kuumila icakuti na maka yakasililikile sile. Insi ni iyulu vili nu kuolela pamwi.

⁵ Antu yatiyakowezya insi, apamulandu nu konona amasunde yakwe Leza, nu konona upangano uno wapangana nayo, uwakusunga insi pee.

⁶ Asi papo Leza lyene watatipwila insi apakuti iononeke. Antu kwene aikazi yamwenemo, ali yano yatiyailetelela aeneco kwene. Ali mulandu kwene uno lyene insyazi zyakunzi zyatizitandika ukucepela kweneko.

⁷ Amatingi nayo kwene lyene yakunyaluluka nu kufoota. Waini watatala apakumulola. Yonsi yano yuvwanga uluzango, lyene yatiyakungumala.

⁸ Utungoma twansansa twatituta ukulila. Icongo ca vicino, kusi. Ivindungundungu vya luzango vyativita ukuvwika.

⁹ Antu lyene yasikwimba inyimbo lino yakumwa waini, nga ndi yamwa uwengwa wene ukalula sile mu kanwa.

¹⁰ Ivintu sile vyonsi umu musumba visile icimvundawila, amang'anda yonsi yatiyayalwa, apakulesya antu ukwingilamo.

¹¹ Antu yakuinong'onya umu miseo apakuulilwa waini. Insansa zyatizisililikila sile, nu kusansamuka kwati kusila umu nsi.

¹² Umu musumba namo muli sile ivitalang'anda, impongolo zyonsi zyatizitamoka.

¹³ Eee, icacumi, avino cilaponela imitundu ya antu ya pano nsi yonsi. Cilaya ndi vino cikaya apa kuzombola. Lino yakapukunya nu kukunta iviseekwa vya miolivi vyonsi. Nanti vino yakakuntola utuseekwa twaku matingi utwakusyalikizya.

¹⁴ Alapusuka insyazi zyakunzi, yalaimba ni nsansa. Antu aku uwondaka yalumila Yawe utupundu.

¹⁵ Aku ufumondaka nayo kwene yalalumbanya Yawe. Antu yano ikala umu vilila nu mu nkumba yakwe yemba, yalalumbanya Yawe, Leza wakwe Izlaeli.

¹⁶ Tulauvwa inyimbo ukufuma umu nsi yonsi muno yapelela, nazyo zizyo zilaya izyakulumbanya Umulungami. Lelo kwene nemo ne Ezaya, insyakutaila akantu akali konsi! Ala nemo lwati lunsilila! Yacisanguka yacili yakuomba umulimo wao na maunsenunsenu yawo yakulu kukulilako sile.

¹⁷ Mwe antu aikazi ya pano nsi, ala munguvwe. Yapolowe, inkose na macinga, vikumulolela.

¹⁸ Wino wensi amaezya ukupuuka impungo, amaponela muli polowe. Na wino amapunsumuka mumo, amalemwa uku lukose. Iyulu limafomfomola imvula. Alino ivintu vino vyatungilila insi navyo vimatentanga.

¹⁹ Insi yonsi imalangokanga, imalepoka nu kusyala sile mwanku, icenjemile.

²⁰ Insi yonsi imapempezyokanga ungati umuntu wilya, wino watakoleka waini. Imasunkananga ungati akamusakuta kano icipunga cikupunganya. Insi yonsi yatiyinamila sile apa nsi pamulandu nu uyi wakwe iliyo, imaifwanta sile pansi icinzamba, icakuti nu kukatuka italatala ikatuke foo. Akasita kamwi kamafikila lino Yawe amapezya.

²¹ Mu wanda ulya Yawe alavunuka asambazi yamaka yano yayela umupela, kumwi na yakateeka yamaka ya panonsi.

²² Leza amatitikanya pamwi, yamwene yonsi amu ciwina icili conga kwene, ungati anyepwe. Amayayalila umu ng'anda yaminyololo, ukufika na pa nsita ino yalayalolwela penepo.

²³ Apa mwezi pamafita, akasanya nako kamazima, pamulandu wakuti Yawe Wamaka yonsi aliwe amaya ali Mwene wakuteeka mu Yelusalemu, apa mwamba wa Zioni, ni ntunguluzi zya antu yakwe yamalolanga ucindami wakwe.