Ezaya 23 - Amazwi Yakwe Leza 2013

Usemo uno ukumile Tuli

¹ Amazwi asowilwe pamulandu na Tuli. Pongomokini mpooma mwe yano mukapitila umu vyombo vyaku Tasyisyi! Pano umusumba winu uwa Tuli wati wononeka, usile sile ukwaula ing'anda nanti cilalo! Lino amato inu yamawelulukanga ukufuma uku Saipulasi, mumauvwanga umulandu uo.

² Kutumalini, mwemuno mwikala umu nkumba yakwe yemba, mwe yaculuzi yaku Sidoni! Amwemwe mwe muno mwalamvizye ivyuma vinu pali yemba, apa maziya akalamba.

³ Amwemwe mwatumanga antu apakuti yalambe yemba, nu kuya umukukala ingano zyaku Eguputo, alino nu kwiza umukuzikazya nu kucita amakau na antu ya mitundu yonsi.

⁴ Iye mwe we musumba Sidoni, ala wazewana. Pano yemba kumwi na maziya akalamba, vyativikukana. Vikulanda iviti, “Awe cumi, swemo tusitala tuvyala ana nanti ukukuzya ana itu aonsi nanti anaci.”

⁵ Nanti sile aina Eguputo, nayo kwene yalaculukila, nu kuzakaza apakuvwa ukuti Tuli wataononeka.

⁶ Pomolini impooma mwe ina Fonisya! Mwezye ukupukila uku mpanga yaku Tasyisyi!

⁷ Uzye umusumba winu kwene uu uwa Tuli, ali uno mwalimo insansa, uno wasokwilwe mpiti? Uzye ali muno mwafumanga antu yano yalambanga yemba, nu kuya umu kuteeka impanga zyuze?

⁸ Uzye aweni wiyo wino wapingwilanga ivintu kwene vii ukucitila Tuli, umusumba wakwe yamwene, uwateesilwe na aculuzi, ali intunguluzi izicindamisye pano nsi?

⁹ Ala, Yawe Wamaka yonsi uwapanzile ukucita vii, apakuti amale ivilumba kuli yonsi, na pakuti acefye acindami yonsi apano nsi.

¹⁰ Pitangini sile fwandi muye umu kulima ivyalo, mwemuno mwateeka impanga umu Tasyisyi! Kusi lyene nanti wenga angamucingilila, nupya kusi vino mungacita.

¹¹ Yawe watazunzula ikasa lyakwe pali yemba nu kutenkanya amawene. Watapeela ilamulo ku ina Fonisya kuti yawisye misumba yao ya malinga.

¹² Ale fwandi we musumba wakwe Sidoni, wemo caticisila, kusi kusansamuka nupya foo. Antu yako yatiyazanzwa. Nanti sile yangala yakupuukila uku Saipulasi, nako kwene yatalaya yakikale ku matwi cele, foo.

¹³ Si lolini impanga ya ina Babiloni, antu kwene yaa yatacilipo nupya yatacuvwika. Aina Asilya ali yano yatiyaleka kuti inyama zya mpanga azino zize ziikale umu musumba wa Tuli. Aina Babiloni ali yano yizile iyakuula impungu, nu kuzingulusya umusumba wa Tuli.

¹⁴ Pomolini impooma mwe vyombo vyaku Tasyisyi, pano yatiyonona umusumba winu uwi linga.

¹⁵ Ukufuma uwanda kwene uo, Tuli alililikwa apa myaka amakumi cinimbali. Lelo apacisila ca myaka amakumi cinimbali, umwene muze aliza ateeke, nga Tuli alakolana nu mwanaci cizelele uwamu lwimbo luu.

¹⁶ “Toola kangoma kako, pitana umu musumba, we cizelele wino yilila. Lizya usaka, imba inyimbo izivule, apakuti yakwiusye.”

¹⁷ Apacisila ca myaka amakumi cinimbali, Yawe aliza apempule Tuli. Nawe nupya alatandika ukuomba umulimo wakwe uwa mpiti uwa uculuzi. Alacita uculuzi na yamwene yansi zyonsi pano nsi.

¹⁸ Impiya zino alazana mwenemo alazituula kuli Yawe. Lelo zitalasungilwa umu nzila ili yonsi. Pano yayo yonsi akapepa Leza yalatoola impiya zyakwe nu kukalamo ivyakuzwala ni vyakulya vino yakulonda.