Ezaya 21 - Amazwi Yakwe Leza 2013

Babiloni wawa

¹ Amazwi asowilwe pamulandu nu lwanga ulwamu nkumba yakwe yemba yakuti, Uononyi ulafuma ku mpanga ikakame. Uliiza wakwe nkungulupya akupita ukufuma mu lwanga.

² Ne Ezaya natindola icilolwa conga apa vintu ivikalale: wiyo akukoopa, akukoopa, wiyo akonona, akonona. Mwe vita vyaku Elamu, katusyini inkondo! Mwe vita vyaku Medya, mulizizye imisumba iyo. Nene ne Yawe ndamala ucuzi onsi uno waletwa na ina Babiloni.

³ Apamulandu wa vintu vino nuvwile nu kuvilola mu cilolwa nkuuvwa intete nu ulanda, wa mwanaci wino ali pipi nu kupapa. Vino nuvwa vyativindetela izyungu. Vino nkulola vyampezya amano.

⁴ Amano yane yatiyavulungana, nupya nkuzakaza sile uku ntete. Muno nali nkaulolela nkuti umaila, intete nazyo zyasuka zyandema.

⁵ Umu cilolwa nalinalola sile kuno yatiyateyanya icimulo. Yanzika nu usaka apa kwikala yano yatiyaama. Alino yatandika ukulya nu kumwa. Nga lyene papo kwene umwi waliwalaizya wati, “Mwe yamusika ya vita, teyanyini ivilwilo vya nkondo ivyakwinu!”

⁶ Pano Yawe wanena wati, “Pita uye ukike kalinda wenga umunene kuti akulandila vino amalolanga.

⁷ Ndi cakuti walola kuno antu yakwiza, yakwezile pa mfwalasi yakupita yaili yaili, na antu yauze nayo yakwiza pali yapunda napa ngamila, umunene alolekesye ningo.”

⁸ Nga kalinda nawe ali pakuvwanga ati, “Mukwai nemo aepano kwene, apa lupungu, pali pano nkaimilila usiku nu musanya apa kulonda.”

⁹ Umu kupumikizya indola antu yakwiza pa mfwalasi, yakupita yaili yaili. Kalinda wenga pali yayo avwanga ati, “Babiloni watawa, watawa! Amaunkolanya yonsi yakwe tuleza twakwe, yano yapangilwa na zaabu yatiyatamoka, nupya yalambalile pansi.”

¹⁰ Mwe antu yane, ala yatiyamupuula ungati avino yakapuula ingano. Lelo pali ndakai namamunena amazwi asuma, yano natinuvwa ku Mwene wa vita, Leza wa ina Izlaeli.

Ilandwe lyapali Edomu

¹¹ Amazwi asowilwe pamulandu na Edomu. Umuntu umwi uwamu Edomu walaizye kunoli ati, “We kalinda we! Uzye usiku umaca lilaci? Unene pano usiku umasilila.”

¹² Alino nani namwaswike inti, “Kwene wasya uce, nga lelo nupya kwene wasya wize wiile. Ndu kasi, ungiza uuzye nupya.”

Ilandwe lyapali Alabya

¹³ Amazwi asowilwe pamulandu na Alabya. Mwe ina Dedani, mwe muno mukapita mu maumba maumba, mukutemwa uku kuula insakwe mu mawanga ya mpanga ya Alabya.

¹⁴ Mwe muno mukapeela amanzi ku antu aiza kunomuli nu lusala. Mwe antu yano mukaikala uku mpanga yaku Tema, ala mukupeela icakulya ku mbutusi.

¹⁵ Kuli yayo yano yapuuka imfwa yaku lupanga, yano yakupuuka uku nceto zino yakulonda ukuyalasila kweneko, nu kupuuka uzanzo uli onsi uwa nkondo.

¹⁶ Yawe wavwanga kunondi wati, “Kwasyala umwaka onga sile, ale ukama wa mitundu ya antu amu Kedali wasililikila.

¹⁷ Alino api umba lya antu yano yacenjelesya, yafundi ya vita mu Kedali palasyala sile ampendwa. Anene ne Yawe, Leza wa ina Izlaeli nalanda.”