Ezaya 19 - Amazwi Yakwe Leza 2013

Leza alavunuka aina Eguputo

¹ Amazwi asowilwe pamulandu na Eguputo. Yawe ali api kumbi ilikupita ulwilo, wene akuya ku Eguputo. Utuluwi twaku Eguputo tukuzakaza sile uku ntete apa manso yakwe, nga aina Eguputo nayo kwene caticiyaputula umusana.

² Yawe wavwanga wati, “Nemo ndasongelekanya aina Eguputo kuti yalwe atupu. Lyene yalalwa umuntu nu mwina, umuntu umwi nu mwinipamba muze, umusumba umwi nu musumba uze, alino uwene umwi nu wene uze.

³ Nemo namaya ku kuvulunganya aina Eguputo, nu kuyatovola. Lyene yamauzyanga utuluwi twao pakuti tuyazwilizye. Yamauzyanga yakasapoola, nu kwezya ukupandwa amano uku mipasi ya afwe.

⁴ Lelo nemo ndaleka ukuti umwene umwi umukakasi nupya umukali awino ace ateke aina Eguputo. Ivyalanda Mwene, Yawe Wamaka yonsi.”

⁵ Amanzi amu luzi lwa Nailo yalapwa, nga nu mu luzi mulasuka muume muye na solokoto.

⁶ Imifolo ya luzi lulo ilatandika ukununka, na manzi amu tunguzi twamu Eguputo yalatandika ukucepa mpaka yapwe. Amatete kumwi ni mpunga vilafooka.

⁷ Ni vimelwa vyonsi ivyaya mu nkumba ya luzi lwa Nailo, uku ntulo yaluko, viluuma. Ivilimwa vyonsi ivyaya ku cituntu ca luzi lwa Nailo viluuma nu kusendwa nu muza.

⁸ Awamvi ya nswi yano yakateya amasumbo, nu kuswela ni ndowani yalasunga sile mu matama, pa kuzana ukuti amasumbo yao na maswelo yao vitalakwata umulimo.

⁹ Yaya yonsi yano akapikula insalu izizipisye, nupya izitelepelele, yalatovoka.

¹⁰ Na yafundi kwene yano yacenjelesya ukusuma insalu, nu mu vyakupangapanga, nayo kwene yalatovoka nu kuteeza sana.

¹¹ Intunguluzi zyamu musumba wa Zoani zyatumpa! Na antu yano yakapanda Falao amano, nayo kwene iviwelewele sile! Uzye yene cino yangaituntumba ukunena umwene ukuti ali yano yapyanikizya pa antu yampiti, antu ya mano, alino na pali yamwene ampiti, icani?

¹² Ale lelo we Falao, uzye yampandamano yako yali kwi? Limwi yangakunena vino Yawe Umwene Wamaka yonsi wapanga ukucitila aina Eguputo!

¹³ Intunguluzi zyonsi zyamu Zoani zyatizisanguka iviwelewele, nga ni vilolo vyaku Memfisi vyasombwa. Yayo akatungulula aina Eguputo yaponzya impanga yao.

¹⁴ Yawe aliwe walenga ukuti zyapanda antu yauze amano yacimvundawila. Uli mulandu kwene uno walenga nu kuti aina Eguputo yapumeka muli vyonsi vino yakacita. Icalenga nu kuti Eguputo apempezyoka ungati umuntu uwatakoleka waini.

¹⁵ Umu Eguputo musi nanti wenga angacita ivyampomvu ivya kwazwilizya impanga yakwe. Kusi nanti umukama nanti umupina, umwance nanti uwikolo, awe!

Eguputo alapepa Yawe

¹⁶ Mu wanda ulya aina Eguputo yalaya ungati anaci, yalaizakazila sile uku ntete, apakulola Yawe Wamaka yonsi kuno watazunzula ikasa lyakwe apa kuyafulula.

¹⁷ Aina Eguputo yalaoopa impanga yakwe Yuda, lilyo lyonsi lino yalauvwa kuno Yuda walumbulwa, apamulandu sile wa vintu vino Yawe Wamaka yonsi wapanga ukuyacitila.

¹⁸ Mu wanda ulya mu misumba isano yamu mpanga ya Eguputo yalavwanga Ciyebulai, nga na antu yamwenemo yalalapa nu kulumbula Yawe Wamaka yonsi. Umusumba wao onga ulaamwa “Umusumba wi Lanzi.”

¹⁹ Mu wanda ulya, apakasi ka mpanga ya Eguputo yalakuulila penepo Yawe Wamaka yonsi kavuwa. Alino muli yanande ya mpanga namo mulaya ulucesi longa ulwa mawe. Lulo aluno yalakuulila Yawe.

²⁰ Ivintu vivyo vilaya vili viusizyo ivyakwiusizya ukuti Yawe Wamaka yonsi waya mu Eguputo. Nu kuti antu ndi cakuti yazanzwa, alino yapunda tutulwe kuli Yawe, ale lyene alayatumila umwi uwakuyapususya.

²¹ Yawe alaisokolola wenga uku ina Eguputo. Mu wanda ulya lino wene alacita cico, alino antu nayo yalamanya Yawe umucumi. Nupya ali lino yalamupepa nu kumupeela impolelwa na mawila ya mbezu. Alino yalamulaya ivilayo vya mpomvu nu kufikilizya vino yalaya.

²² Yawe alatuma impungo umu Eguputo, lelo wene alayapozya. Alino nayo yalaswilila kuli Yawe, nga nawe aluvwa ku mipapatile yao nu kuyapozya ace ayapozye.

²³ Mu wanda ulya kulaya umuseo umwi ukalamba uwakufuma umu Eguputo, nu kuyafika uku Asilya. Antu ya mpanga zizyo ziili yalatandalizyanya. Aina Eguputo na ina Asilya yalapepela pamwi.

²⁴ Mu wanda ulya Izlaeli alikala pamwi na Eguputo na Asilya, nga impanga zizyo zitatu zilaya upolelelo pano nsi.

²⁵ Yawe Wamaka yonsi alayapolelela na mazwi yaa akuti, “Namupolelela mwe ina Eguputo, mwe antu yane, na mwe ina Asilya mwemuno naumvile. Namupolelela mwe ina Izlaeli, mwe asololwe yane.”