Ezaya 18 - Amazwi Yakwe Leza 2013

Leza alavunuka aina Kusyi

¹ Kalanda ku antu aikala mu mpanga yamu nkumba zya nguzi zyamu Kusyi! Kuku kwene kukauvwika ukupungaila kwa maapa.

² Ku mpanga iyo akuno intumi zikaiza pa luzi lwa Nailo mu mawato ya matete. Swililini zuwa uku mwinu mwe ntumi zya lwilo. Yangini mukafisye amazwi uku mpanga inu, iyayela ku ntulo ya luzi lwa Nailo. Kanenini antu a mutundu winu wamaka antu yalya atali, nupya atelepelele inkanda, yano antu yauze akutali na amupipi kwene yakaoopa wakwe cimwi pano nsi, antu yano inguzi izili yanande ya mpanga yao.

³ Uvwini kuno mwe antu mwemuno mwikala pano nsi, mwemuno mwalimba insi yonsi. Lino ulunga lwakweziwa apapela ya mwamba, mulole! Lino ipenga lyalila, muvwe!

⁴ Yawe wavwanga kunondi wati, “Kuno nemo nkaikala, namaya cele nu kulolekesya sile, ndi vino akasanya ka kayenkema umu manso, lino ilanzi lyawalisya, ungati akungwi wiya wino akaya kweneko, lino kwaya icipuki icisanya apa nsita ya uzombozi.”

⁵ Pano vivi kwene vino cikaya lino yatacili yakulule iviseekwa uku matingi akuca, lino iluwa lyalukuta, nga ni viseekwa vyatandika ukuca, ali vino na anisi yalalovya aina Kusyi, ndi vino umupeni ukaputola imisambo ya matingi, apa kuitungwila.

⁶ Ivyala vya vita vyao vilasyala vilambalile kuti vyunyi ni vinyama vya mpanga vikavilye. Ivyunyi avino vilavilya apa nsita ya cisanya, apa mwela pene ivilyanyi ali vino vilalya.

⁷ Pa nsita ilya kwene antu yaliza na mawila akutuulila Yawe Wamaka yonsi. Antu yaya yalaya atali nupya atelepelele inkanda, yano antu yauze akutali na amupipi kwene yakaoopa wakwe cimwi pano nsi, antu yano inguzi izili yanande ya mpanga yao. Yene yalaiza na mawila yao uku Mwamba wa Zioni kuno antu yakapepa Yawe Wamaka yonsi.