Ezaya 16 - Amazwi Yakwe Leza 2013

Aina Moabu yutukila ku mpanga yakwe Yuda

¹ Ukufuma mu musumba ukaamwa ukuti Sela, ukusalala ulwanga, antu yaku Moabu yatoole akana ka mfwele, ali kano yatume wa wila kuli kateeka waku Yelusalemu.

² Lyene yalolele apa vituntu vya luzi lwa Alinoni, nu kupitana wa vyunyi vino iyasambulwila ivinsanzo.

³ Yanena antu aku Yuda yati, “Situneni ivyakucita. Tucingililini wa muti uno ukusapalalika icisao icizuke, umu cipuki ci lanzi umutwe pakasi. Lekini tuwe munomuli. Sweswe mbutusi, ala tufisini muno umuntu nanti umwi atange atuzane.

⁴ Lekini twikale umu mpanga inu. Tucingililini kuli yao akutupangila ukutukoma.” Insita imwi uzunyo nu uononyi vilasila. Na yayo kwene aononyi yalafumiziwa umu nsi.

⁵ Alino umu kutemwa amuno icilimba ca wene cilateekwa ningo. Umu cumi paliza pikale wenga, uwamu akazi kakwe Davidi, wiyo uwasakamalisya ulungami nu kuzangila ukucita vyaololoke.

⁶ Antu aku Yuda ali pakuvwanga yati, “Tuuvwa mpiti ivilumba vya ina Moabu. Twamanya nu kuti antu yamwi akaitutumula, yene amitumfyo nupya ukuyuvwa kwao ukwa silesile.”

⁷ Ala icumi aina Moabu yalalila kalanda. Yalaalila lino yaliusya ivyakulya vino yalyanga umu musumba wa Kili Haleseti.

⁸ Ivyalo ivyayela ku Hesyiboni ni vyalo vya matingi vyaku Sibima vyononeka. Ivyalo vivyo amuno mwafumanga vyakumwa, vyatonsyanga uku myenzo yakwe yakateeka. Apa kasita kamwi vyasandulwike ukufika nu ku musumba wa Yazeli, ukulungama lwaku ufumondaka, mpaka ukufika nu mu lwanga. Nupya ukulungama lwaku uwondaka, ku lusansa luze lwakwe Yemba wa Musilya.

⁹ Ali cino lyene nkulilila amatingi yaku Sibima ulanda, wakwe vino nkalilila Yazeli. Aminsozi yane yakukonkolokela Hesyiboni na Eleale, pamulandu wakuti kusi uzombozi wampomvu, wakusansamusya antu.

¹⁰ Kusi nanti wenga asansamwike mu vyalo vya muvundo. Kusi nanti umwi akupunda nanti ukwimbila umu vyalo. Kusi nanti aumwi akufena amatingi apakupanga waini.

¹¹ Nemo umwenzo wane pasi pakuwaya, pamulandu wa mpanga ya Moabu, nemo nkulilila umusumba wa Kili Haleseti.

¹² Aina Moabu yakusunta ukuya umu kupepa, apa ncende zyapa myamba, nu mu mang'anda yao, ya mapepo, lelo kwene yakuicuzya sile.

¹³ Ali vino Yawe wasowile calimwi pamulandu na Moabu.

¹⁴ Nupya na pilelo Yawe akuti, “Pa myaka itatu sile, iyakupenda wa myaka ya muntu wa ncito, uwene ucindamisye uwa mpanga ya Moabu ulazewana. Nanti angakwata antu avule wakwe cimwi, lelo yalasyala ancepelwa sile, anyaluluke nupya aulwa na maka.”