Ezaya 15 - Amazwi Yakwe Leza 2013

Leza alonona Moabu

¹ Amazwi asowilwe pamulandu na Moabu. Lino yacimvizye umusumba wa Ali nu wa Kili mu mpanga ya Moabu, usiku wa wanda onga kwene, Moabu wensi wali cele.

² Aina Diboni ali pakutumbela umulundu nu kuya ku ncende ya kupepelamo, akuno yalosezya. Pali pakulilila Nebo na Medina, imisumba yao. Pa nsita iyo ala yatiyapela inkuzu uku mitwe, ni vilezu pakulanga ulanda nu kulilizika.

³ Yene yazwite visamu umu miseo, nu kulila impoma papela ya mapaala ya ng'anda zyao, nga nu mu masansa ya miseo.

⁴ Aina Hesyiboni na Eleale ala yakukuuta impoma, zila zikuuvwika nu ku Yaazi. Nanti sile ivita navyo kwene vyazakazanga, ala yatiyaputuka imisana.

⁵ Awe icumi umwenzo wane ukulilila aina Moabu! Antu yatiyasaamila ku musumba wa Zoali, ukufika nu ku Egilati Syelisyiya. Yamwi yatiyatumbela umuseo wa Luiti, ala yafumile yakulila muno yaile. Yamwi yatiyutukila uku Holonaimu, ala yakupongomoka wakwe cimwi!

⁶ Amanzi aku Nimulimu yatiyakama. Isote lyatilyuma, nu mulemvwe watiulokota. Kutasile icintu nanti cimwi iciisi.

⁷ Ali cino yateyanya utuvyuma utusile, yasalala mu Cifoloma ca Mpuunga.

⁸ Impoma yatilimba impanga yonsi yaku Moabu, zikuvwika ukufika nu ku Egilamu na Beele Elimu kwene.

⁹ Amanzi aku Diboni yazile uwazi tupu. Isyamo iliipisye lilaponela Diboni. Endi, cisama alakatukila aina Moabu, yano apuswike mwenemo, kumwi ni mpondo zyonsi izyasile umu Moabu.