Ezaya 14 - Amazwi Yakwe Leza 2013

Ukuweluluka ukufuma mu uzya

¹ Yawe alaya nu luse ku antu amu mutundu wakwe Yakobo, wene alasolola aina Izlaeli nupya alayata yikale mu mpanga yao. Na inamasi kwene yaliza yikale nayo umu mpanga yao kwene. Ainamasi yalailundanya kunoyali nu kulemana na ang'anda yakwe Yakobo.

² Imitundu iingi ilayazwilizya umu kuyakusizya umu mpanga yao, ino Yawe wayapile. Amu mutundu wakwe Izlaeli alio yalateeka ainamasi wa azya. Yayo atazile yalema aina Izlaeli wa azya, alio yano lyene aina Izlaeli yalayateeka wa azya.

Ukuzangila imfwa ya mwene waku Babiloni

³ Uwanda uno Yawe alaleka mupemwile uku macuzi inu, uku ulanda nga nu ku uzya winu uno mwateekwa,

⁴ muce mwimbile ulwimbo luu, ulwa kuwela umwene waku Babiloni muti, “Iye mwe ukukalala kwa mwanisi vino kwasila! Ukali wakwe wa mitumfyo waputuka uli?”

⁵ Yawe wakontola intuwa ya mwipe, ni nsonzo yakwe yamwene.

⁶ Yene yacuzyanga imitundu cipyu cipyu nu kuilopola lili lili. Yene yateekanga imitundu uluku uluku, nu kuicuzya ukwaula ukutonta.

⁷ Pali ndakai insi yonsi ikupuuza. Yene yatizuuka iya cele, nupya ikuumila na kapundu.

⁸ Imiti imisaipulasi ni mikelide yaku Lebanoni ikuzanga pakuwa kwakwe Babiloni. Imikelide yaku Babiloni ikuti, “Vino lyene walala, kusi aliza atukome.”

⁹ Apansi ya musili, imfwa yaticincila ukwiza kuzengela. Yatisakatuka ni mipasi yakwe yamwene yonsi atenzi mpiti pano nsi, yakatusya yamwene yonsi amu mpanga apa vilimba vyao.

¹⁰ Yonsi kwene yatandika ukukunena yati, “Fwandi nawe kwene yatiyakonona wakwe sweswe! Lyene ndakai twatitulingana.”

¹¹ Ucindami wako lyene watiusumbilwa kuzimo, apali ponga nu kulila ukwa mazeze yako. Umusanzi wako lyene ingonyo, ni vyakuvimbala vyako navyo uonyi.

¹² Musambazi mwene waku Babiloni, we namukokolo, watupona ukwiyulu uli? Uku mpiti awewe wacimvizye imitundu. Lelo ndakai yatiyakusumba pansi.

¹³ We muno welenganyanga uti, “Ndakwela ukwiyulu nu kuteeka icilimba cane ca wene apapela ya ntanda zyakwe Leza. Nupya ndikala apa mwamba wa ukongano, api kasa limani, lwaku ufumondaka ukutali.

¹⁴ Nupya ndakwela apapelapela ya makumbi. Ndakolana wa Mucindami.

¹⁵ Caya uli fwandi, apakuti ungaponela umwi lindi, pansi pansi mu cifoloma umutaizikila?”

¹⁶ Yano yakukulola yakulanda iyati, “Uzye umuntu wii asi awino wazakazyanga insi, nu kuwisya impanga izingi zyakwe yamwene?

¹⁷ Uzye asi aliwe wasangwile insi amapooli, nu kupasa imisumba nga akana nu kufumya iminyololo ku azya?

¹⁸ Yamwene yonsi amu nsi yalala nu mucinzi umu malindi.

¹⁹ Lelo wemo yakusumbila ukunzi yi lindi, ungati wewe vikona vya muselu. Yatiyakukupilizya uku vyala vya vita, vino yakomile umu nkondo, nu kukusumbila mu ciwina ca mawe nu kucilyatola.

²⁰ Apa mulandu wakuti wononyile impanga yako, nu kulovya antu yako, utalatala uzikwe wakwe yamwene yauze. Kutalapusuka nanti wenga mu akazi kako, alukang'ansi.

²¹ Ukukomolwa kwange kule kutandike! Uleke ana yamwene yafwe apamulandu na maifyo ya vikolwe vyao. Cizipe kutakatale kuye uwakuti akateeke nupya, panonsi nanti mu misumba.”

Leza alonona Babiloni

²² Yawe Wamaka yonsi wavwanga wati, “Ndaponya inkondo mu musumba wa Babiloni, kumwi na yayo yano yasyalamo. Kutalasyala ana nanti vizikulula, awe.” Ivyalanda Yawe Wamaka yonsi.

²³ “Indonona Babiloni nu kumusangula amanyika. Visinsimwe avino vilaikala mwenemo. Ndamupyela ku mukuo.” Ivyalanda Yawe Wamaka yonsi.

Yawe alonona aina Asilya

²⁴ Yawe Wamaka yonsi walapa wati, “Umu cumi vino napanga vilacitika, na vino napingula vilafikiliziwa.

²⁵ Ndonona aina Asilya umu mpanga yane ya Izlaeli, nu kuyalyatola apa myamba yane. Indakulula antu yane ukwi koli lya ina Asilya, nu ku visendo vino yayatwika apa viye.

²⁶ Lilyo kwene lili pange lyane ilya nsi, ni kasa lyane litambalikilwe apa kufulula imitundu.”

²⁷ Yawe Wamaka yonsi ndi cakuti wapingula, aweni angavulunganya upinguzi wakwe? Ndi wakatusya ikasa, uzye angaliwezezya aweni?

Leza alafulula aina Filisti

²⁸ Umwaka uwafwilile mwenemo umwene Aazi, imbila ino yuvwikike aeyi yakuti,

²⁹ Mwe ina Filisti mwensi mutazanga foo, pamulandu wakuti intuwa ino yamupolanga yatikontoka. Mumanye ukuti mu luko lwa nzoka, ndi yonga yafwa, mulatumbuka yuze ilusile iyo. Iyayi lya nzoka lingulola icizoka icikapapuka.

³⁰ “Yawe alaya akacema wa antu yakwe alanda, nu kuleka kuti yene yikale ulongo. Lelo wene alaponyezya mwe ina Filisti icipowe, cino citalasya nanti wenga pano muli.

³¹ Pongomoka, we mpongolo! Laizini tutuulwe mwe misumba yamu Filisti! Ukwi kasa limani kulafuma icunsi, ca vita, musi nanti acantete mu vifulo vyao.

³² Ale lyene tulaasuka tutuli, uku nkombe zya mutundu wao uo? Tulasuka tuti, ‘Yawe Leza uwasokola Zioni, nga antu yakwe akucuziwa ali muno yalutukila.’”