Ezaya 13 - Amazwi Yakwe Leza 2013

Leza alavunuka Babiloni

¹ Amazwi asowilwe pamulandu na Babiloni, ino Ezaya umwana umonsi wakwe Amozi, wapokelile ukufuma kuli Leza.

² Apa mwamba usenguke, papunge imendela! Pundini izwi ilikalawane uku vita, muyakapizye uku minwe, yize uku mpongolo zya asambazi, yayazanze.

³ Ne Yawe natinaama ivita vyane nu kuvipeela ilamulo lya kulwisya inkondo apakupezya yano nasokela.

⁴ Kutikini icongo ukufuma pa myamba. Iciunda ci umba likalamba! Ni ca mawene yano yatiyakongana. Yawe Wamaka yonsi akuteyanya impuka zya vita.

⁵ Yakufuma uku nsi ntali, uku mpela ya nsi, uku konona impanga yonsi

⁶ Pongomokini pano uwanda wakwe Yawe uli umupipi. Uwanda uo uliza wa ononesi ukufuma kuli wiyo Wamaka yonsi.

⁷ Apamulandu wakwe cii, antu yonsi yalatolompoka mu makasa, nu muntu wensi alatovoka mu mwenzo.

⁸ Intete zyati ziyalema, nu kucululuka nga na malanda vyati viyizila, kwati umwanaci wino insita yakwe yakulela yatimufikila. Akula yalolekesya iciyapezya amano, apamanso yao patipatuwalala.

⁹ Wanda wakwe Yawe uliiza kwaula uluse. Ulaya uwanda wa ukali ni cipyu cikalamba. Ulasangula impanga iye amapooli nu konona kaifya wensi.

¹⁰ Pano intanda zya mwiyulu kumwi nu tuungwe utwaya mwenemo vitalawala. Ilanzi lilazima nu kutunka foo, umwezi nao utalawala.

¹¹ Yawe akuti, “Ndakalipila antu aikala mu mpanga ii apa ntumpu zino yakacita, nga na antu aipe apa utalanganyi wao. Ndaputula icilumba cakwe yao akayuvwa, nu kucefya imitumfyo uku antu alukang'ansi.

¹² Ndacefya antu ukuluta na vino zaabu wacepa. Ukucepesyako ndi vino zaabu waku Ofili watala.

¹³ Caleka ndasunkanya iyulu, nga ni nsi ilasokomoka pano iikalila, apamulandu sile nu ukali wakwe Yawe Wamaka yonsi, mu wanda uno wene alafuluma cipyu cipyu.

¹⁴ Alino lyene cila muntu alaswilila ku antu yakwe, uku mpanga yakumwao ungati a mpombo, uwavwandamuka ntete ntete, nanti wa mfwele iyaula kacema.

¹⁵ Wiyo wensi wino yalazana yalamukoma. Na wensi wino yalalemenkezya yalamukomola nu lupanga.

¹⁶ Yalalyatola yao ale yakulola ntontonto. Yalasampa ivyuma mu mang'anda, nu kuyembuka na aci yao umu kuyapatikizya.

¹⁷ Ndayatumila aina Medi, kuti yakalwe na ina Babiloni. Yene yatasakamala siluva nupya yasuulila kumwi na zaabu kwene.

¹⁸ Yalakomola utwana utonsi tonsi uku maulapwa yao. Yene yatalaya na mizu uku twana twapi yele. Yatalakwatila ana anono uluse.

¹⁹ Babiloni uwene wacindamisya ukuluta, uno waya icilumba nu lulumbi lwa mawene, yalaulwisya kuli Leza ndi vino cali kuli Sodoma na Gomola.

²⁰ Mutalatala mwikalemo nanti ukuvyalilwamo umuntu, umulalondekanila amanda. Umwina Alabya atalatala akuulemo Itaalu lyakwe, na yakacema yatalatala yaleke amaufyo yao yapuzile mwenemo.

²¹ Lelo ulaya uwikalo wa nyama zyamu lwanga, na yankusa yalazula mu mang'anda yao. Yasinsimwe yalikala mwenemo. Imbuzi ziliza zikale mwenemo nga mulacinilamo ni viwa.

²² Yacimbwi ayano yalatonkomala umu mpungu, na yankusa nayo umu masano. Ala insita iliiza, nupya yatipalamila isikulengela foo.”