Ezaya 12 - Amazwi Yakwe Leza 2013

Ulwimbo lwakutaizya

¹ Mu wanda ulya antu yalimbila ulwimbo luu, yati, “Nakutaizya we Yawe! Wansokile, lelo icipyu cako caticisila. Watumyalalika umwenzo wane.

² Cumi kwene Leza ali ufyusi wane. Nkutaila lyene apaula ukoopa, pano Yawe ali maka yane, nu lwimbo lwane, nu ufyusi wane.”

³ Ndi vino amanzi azuke yakaleta insansa kuli wino ali nu lusala, ali vino antu yakwe Leza yakazanga nga wene wayatuula.

⁴ Mu wanda ulya antu yalimbila ulwimbo luu: “Taizini Yawe, laizini kunoli apakuti amwazwilizye! Nenini imitundu yonsi vino wene wacita! Yanenini vyapa ucindami wakwe.

⁵ “Imbilini Yawe, Pano wene wacita ivintu ivyalulumbi. Lekini vyonsi vimanyike insi yonsi.

⁶ Pundisyini nu kwimbila ni nsansa, mwe antu aku Zioni, pano Wamuzilo wilya waku Izlaeli wene umukulu pakasi kinu.”