Ezaya 11 - Amazwi Yakwe Leza 2013

Uwene wakwe Davidi uwalongo

¹ Ululembelya lulatumba apa cisiki cakwe Yese, na pamisisi yakwe palamela umusambo.

² Alino Mupasi wakwe Leza aliza aikalilile penepo, Mupasi wa malango nu wa kwiluka. Mupasi wa kupanda amano nu wa maka, Mupasi wa kumanya ivintu nu koopa Yawe.

³ Icoopo kuli Yawe ali cintu cino alimilila penepo. Atalaputula umulandu pamulandu mu kulondelela ukuloleka kwa vintu, nanti ukuuvwilila sile uku matwi.

⁴ Lelo umololoke wene alaputula imilandu ya antu aulilwa, nga nu kupingwila alanda amunsi umu ulungami. Izwi lyakwe lili wa ntuwa ya kuumila alukang'ansi aipe. Nu mupu wamu mulomo wakwe ulakoma umwipe.

⁵ Uwololoke ulaya wa musipi wakwe, nga ukutailwa kulaya wa canamala cino alafyenta umu musana wakwe.

⁶ Nga alino lyene umumbulu ulikala pamwi nu mwana wa mfwele. Inangu ilalala umu pipi na kana ka mbuzi. Umwana wa ng'ombe nu mwana wakwe cisama, vilaliila pamwi icakuti na kalume awino alavicema.

⁷ Ing'ombe, indama vilandana icuza ni cilyanyi, nu twana twao tulalaala apali ponga. Cisama alalya isote pamwi na cipambasi wa ng'ombe.

⁸ Umwana uwa kwiyele alacinila apipi nu wina wa nondo, nu mwana uwalumuka alatambika ikasa mu wina wakwe cipili.

⁹ Apa Mwamba wamuzilo patalaya nupya ivya uluku uluku, nanti ivya ononyi, apamulandu wakuti impanga ilazuula mwenemo amano akumanya Yawe, ndi vino yemba wazula mwenemo amanzi.

Antu aya mu uzya yalaweluluka

¹⁰ Mu wanda ulya uwene nupya ukufuma ku cisinte cakwe Yese, ulimilila nu kuya wa cimanyililo uku mitundu. Imitundu ilakusika nu kwiza kolongana kuno ali, ni cifulo cakwe cilacindama.

¹¹ Mu wanda ulya Yawe alatumpula nupya ikasa lyakwe, nu kuwezya yonsi yalya yano yasile uku Asilya na Eguputo. Uku Pafulosi, ku Sudani, uku Kusyi, uku Elamu, ku Babiloni, ku Hamati, nga na pa vilila vyamuli yemba.

¹² Yawe alakatusya uluunga apakulanga imitundu ukuti akukonganika pamwi nupya antu asalangine, yakwe Izlaeli na yakwe Yuda, nu kuyaleta ukufuma mu ntunga zyonsi ziini izya nsi.

¹³ Uwene wakwe Izlaeli utalakwatila Yuda uzuwa nupya. Yuda nawe kwene atalaya umwanisi wakwe Izlaeli.

¹⁴ Yoili kwene yalazanza aina Filisti lwaku uwondaka nu kupokolola ivyuma ku antu akaikala uku ufumondaka. Yalacimvya aina Edomu na ina Moabu. Na ina Amoni yalauvwila kunoyali.

¹⁵ Yawe alakamya nu mupunda wakuli yemba waku Eguputo, nu kuleta umuza ukaye uwaku kamya uluzi lwa Yufulate, nga nu kusya sile utunguzi cinimbali, tuno umuntu ali wensi angalamba.

¹⁶ Kulaya umuseo ukulu ukufuma mu Asilya, uwakupita antu yakwe, aina Izlaeli asile, apuswikemo ndi vino cali uku vikolwe vyao, lilyo lino yafumile mu Eguputo.