Ezaya 10 - Amazwi Yakwe Leza 2013

¹ Kalanda kuli yayo akapanga amasunde ya lufyengo, na kuli yakalemba akapeela amalamulo akutitikizya antu yauze.

² Yene yakakana ukupingula alanda umu kulungika, nupya yakapokolola insambu zya antu yane apina, nu kusampa ivyuma kuli yamukamfwilwa, nu kupokolola ivyuma ku ana asyale.

³ Uzye mulacita cani uwanda uno ndiza umu kumukalipila, lino uzanzo ulafuma ukutali nu kwiza muponela?

⁴ Kulasyala sile ukukontamika imitwe mwi umba lya azya. Mulafwila umu nkondo. Na lilyo kwene ala Yawe acili asosile, pano ala acili watazunzula ikasa lyakwe apa kumuvunuka.

Leza waomvya umulasi waku Asilya

⁵ Yawe akuti, “Kalanda ku mulasi waku Asilya! Ala Asilya, ali wino nemo nkalema nu kumuomvya wa ntuwa yakufyentolela antu yano nkasokela.

⁶ Nene namutumile ukuya ku kuzanza umutundu wa antu atamanya Leza, akambavya umwenzo, uku kupokolola ivisampwe, nu kuyiila nu kuyalyatola wa ntipa mu miseo.”

⁷ Lelo umwene wa ina Asilya wakwata amapange yauze sile, umu mwenzo wakwe nupya aukali. Wene wapanga ukulovya antu amu mitundu iingi.

⁸ Wene akaitanka nu kuitanka ati, “Nemo yamusika ya vita vyane yonsi a yamwene!

⁹ Anene nacimvya umusumba wa Kaline nu wa Kalikemisyi, nu wa Hamati nga nu wa Alipadi. Anene nacimvya umusumba wa Samaliya nu wa Damasiko.

¹⁰ Anene navyengola impanga zyakwe yakapepa ya tuluwi, tuno twavula ukuluta tuto utwaya umu Yelusalemu, nu mu Samaliya uku wingi.

¹¹ Anene kwene naongolola Samaliya kumwi nu tuluwi tonsi utwaya mwenemo. Fwandi ali vino ndacita na Yelusalemu, kumwi nu unkolanya uno antu aya mwenemo yakapepa.”

¹² Lelo Yawe akuti, “Nemo ndamalilila vino nkucitila Mwamba wa Zioni nu mu Yelusalemu, nemo ndavunuka mwene waku Asilya, apa cilumba cakwe nu kuyuvwa kwakwe.

¹³ “Pano wene akailumbanya ati, ‘Anene nenga nakwatisya amaka na mano ukwikapo nu kucenjela. Nene napasa yanande ya mitundu ya antu nu kusampa ivyuma vyao. Nali wakwe cipambasi wa ng'ombe, lino nalyatolanga antu yalya.

¹⁴ Imitundu ya antu yali wa cinsanzo ca cunyi, nakuusanga ivyuma vyao ungati amayayi ya vyunyi, yano nkukusa. Cunyi citangecitale cikatusye nanti ilyapa lyaciko apa kundesya. Nanti sile ukwasamula umulomo apa kundilila, awe.’

¹⁵ Lelo nemo ne Yawe nkuvwanga inti, ‘Uzye impasa ingalanda ukuti yaluta wino akaiomvya? Nanti uzye mukalalu wacindama ukuluta wino akamuomvya? Insonzo isisenda umuntu, foo. Lelo umuntu aliwe akasenda insonzo.’”

¹⁶ Ali cino fwandi Yawe Wamaka yonsi, wasya alete indwala nu kuvunuka yayo akalya ningo. Umu mili yao muli nu kuya umoto uwa kupya cila nsita.

¹⁷ Leza ulukozyo lwamu Izlaeli, aliwe alasanguka umoto. Leza, Wamuzilo wilya wakwe Izlaeli, alasanguka icimbilimbili ica koca yonsi pyu, apa nsita yonga mpo, imyunga na yankololwe vilapiliila kumwi.

¹⁸ Imitengo muno mwaya imiti iisuma, yonsi kumwi ni vyalo vimapya pyu. Cimaya sile ungati avino indwala iyakulya umuntu ikacita.

¹⁹ Pamasyala sile imiti iya mpendwa, ino nu mwana munono angapenda.

Antu ampendwa sile inono yalaweluluka kuli Leza

²⁰ Mu wanda ulya alino aina Izlaeli, asyalapo amu mupanda wakwe Yakobo, yalata ukutaila umuntu wino wakasi ayalovye. Yamatailanga sile muli Yawe, Wamuzilo wilya wakwe Izlaeli.

²¹ Aina Izlaeli asyalapo yalaweluluka, asyalapo amu mutundu wakwe Yakobo, yalaweluluka kuli Leza Wamaka.

²² Nanti angala aina Izlaeli yangavula uli, yaye wa lusenga lwamu nkumba yakwe yemba, lelo ampendwa sile ali yano yalaweluluka, pamulandu wakuti ukulowa kwa antu kucilipo, nako ukukome.

²³ Endi, Yawe Wamaka yonsi, amaleta ilovyo umu mpanga yonsi, ndi muno walayile ukucita.

Yawe alavunuka Asilya

²⁴ Caleka, Yawe Wamaka yonsi wavwanga wati, “Mwe antu yane mwemuno mukaikala umu Zioni, mutezya ukoopa aina Asilya lino yene yakumupolola ni ntuwa nanti ukuzunzula umukota pano muli, ndi vino aina Eguputo yacitanga.

²⁵ Umu kasita kanono ukali wane panomuli ulatunkana, nga nani ndayalovya uku cipyu cane.

²⁶ Yawe Wamaka yonsi alayanyambola nu mukota, ndi vino umile aina Midyani uku ciliwe caku Olebu, lino walambalike intuwa yakwe pali yemba. Alavunuka aina Asilya ndi vino wavunwike aina Eguputo.

²⁷ Umu wanda ulya ndakukulula ku mutitikizya wa ina Asilya, nga ni vikonkoli vyao vilata ukukuvuna insingo.”

Anisi yazanza umusumba wa Yelusalemu.

²⁸ Anisi yaya yakwiza yatunkila uku Aiyati. Yalasalala uku Migiloni, Yalasya viya vyao uku Mikimasyi.

²⁹ Yalapita umu mupokapoka ulya, nu kutuwilizya sile usiku uku Geba. Antu amu musumba wa Lama yalazakaza. Amu musumba waku Gibeya, umusumba wakwe Saulo, yaluutuka!

³⁰ Pundisini, mwe antu amu Galimu! Kutikini mwe antu aku Laisya! Namwe mwe ina Anatoti, asukini!

³¹ Aina Madimena yutuka, na antu aku Gebimu yakufisama.

³² Lelo uwilelo umwanisi awiyo aimi uku Nobu, watatumpula ikasa lyakwe apa kuzanza antu aku Mwamba wa Zioni, umulundu uwamu Yelusalemu.

³³ Lolini, Mwene, Yawe Wamaka yonsi, alayasola wa misambo ya pantonje! Yaliza yakupona pansi ni congo.

³⁴ Amatesi amu mutengo yatiyawa uku mpasa, nu ukankala wakwe Lebanoni watiuwa!