Ezaya 1 - Amazwi Yakwe Leza 2013

¹ Mu lupapulo luu mwaya ivintu vino Ezaya umwana wakwe Amozi waweni mu cilolwa, ivyapa antu amu Yuda na amu Yelusalemu umu manda ya kuteeka kwakwe Uziya, na kwakwe Yotamu, na kwakwe Aazi nga na kwakwe Hezekiya, yamwene aku Yuda.

Leza wakalipila antu yakwe

² Yawe wavwanga wati, “Uvwini mwe yulu ni nsi, uvwini vino nkuvwanga! Nalela antu yane nu kuyakuzya. Lelo yatiyansangukila.

³ Ing'ombe zyamanya uwaziteeka, ni mfwalasi zyamanya umulangu muno umutesi waziko akazilisizya. Lelo aina Izlaeli yene yatamanya, antu yane yasitezya nanti kamwi awe.”

⁴ Mwatipwa sile mwe mutundu wa maifyo mwe! Ala mwemwe antu yononeke uku uyi, mwe antu yaipe mwe! Uyi winu wamukowezya. Mwemo mwasisya na mano inu kuli Yawe, Wamuzilo wakwe Izlaeli mwamufutatila.

⁵ Uzye apacani cino mwala mwakomapo ukumusangukila? Uzye manye mukulonda sile kuti acizye penepo uku mufulula? Pano uku mitwe inu kuziile ivilonda vitupu. Imyenzo inu nayo yatoteka.

⁶ Ukutandikila ku mitwe ukufika sile na pa tukando, pasi nanti pamwi apasyala umu miili inu pano tungati apa puma. Imiili inu yaya sile ikuuzuluke, ni vilonda nga ni vilase vitupu. Alino navyo kusi akavifulila, ukuvinyepela nanti ukwikapo umulembo.

⁷ Impanga inu yatisanguka amapooli, ni misumba inu nayo yaongoloka nu kupya nu moto. Ainamasi yakusampa impanga inu nu konona akali konsi akaya mwenemo, namwe ala mukuilolela vivyo kwene mwenga.

⁸ Umusumba wa Yelusalemu ali uno usile sile onga. Lelo nao uli wa kang'anda kakwe malonda kano kaya sile konga umu calo ca matingi. Nanti wa cisao cino caya umu calo ca viimbi.

⁹ Yawe Wamaka yonsi akana ukusya antu yamwi apuma, awe cumi Yelusalemu ngano ononeka ntanzi ntanzi, vivi kwene sile vino cali kuli Sodoma na Gomola.

¹⁰ We Yelusalemu, ala yakateeka na antu yako yatapusine na yaya ali amu Sodoma nu mu Gomola. Si angala muvwe vino Yawe akulanda kunomuli. Sumbini amano kuli vino akumusunda.

¹¹ Yawe akuti, “Uzye mwemo mukwelenganya ukuti nkulonda impolelwa zinu zino mwala mwakoozya ukutuula kunondi. Ivimafwele vino mukungocela vyativimfuulila. Nanti sile amafuta ya nyama zinu izisuma nayo kwene yatiyamfuulila. Uwazi wakwe yacipambasi na wakwe yasuuku, na wakwe yasawe nao kwene watiumfuulila.

¹² Aweni uwamunena ukundetela vyonsi vivyo lino mukwiza uku kumpepa? Aweni uwamunena ukulyopola mu musolo wa ng'anda yane iya kumpepelamo?

¹³ Amawila inu auwelewele ntayakasi. Icinunu ca ubani uno mukumfutumwila cikundetela umuselu, nkusalokwa. Amanda yakulu inu, ivili wa wanda uwandoleko ya mwezi, Masabata inu na maukongano yauze, nayo kwene nemo nsikuyalonda. Vyonsi vivyo vyativikoweziwa uku viipe vinu.

¹⁴ Natimpata uwanda ukulu uwandoleko ya mwezi kumwi na manda yakulu yauze yano mukampepelapo. Vivyo lyene vili wa cisendo kunondi, nkuposiwa ukusenda.

¹⁵ Nanti mungakatusya amakasa umupela apakumpepa, nemo lyene ntakusumbanga kweneko amano. Nanti mumpepe uli nemo namapupuzyanga sile, pano iminwe inu ikowele ku uyi.

¹⁶ Fulalini muikondole. Fumini iviipe inkolelo yane. Tiini ukucita iviipe.

¹⁷ Tiini ukwifya. Sumbini amano ku kuzifya. Sumbini amano inu ku kucita ivya ulungi. Mwaazwilizya antu akafyengwa. Mwapingula ningo ana asyale. Mwaazwilizyako yamukamfwilwa.”

¹⁸ Yawe akuti, “Lekini tuvwane lyene. Amaifyo inu nanti yangayenzya cee, nemo namayafula nga nayo yamaswepa mpe wakwe kungwi wa katondotondo. Nanti angala yangayenza cee wa wazi, awe cumi namayaswefya mpee, wakwe pamba.

¹⁹ Ndi cakuti mwala mwantontelela sile, mumailyokezyanga ivisuma vino umusili ukamezya.

²⁰ Lelo ndi mwankana, mwantalamila, awe icumi lyene ale mwasyama, mwaiponzya sile. Endi, avino nene ne Yawe navwanga.”

Ezaya walilila Yelusalemu umusumba wa maifyo

²¹ Iye mwe vino umusumba wacumi watiusanguka wakwe cizelele! Zioni umusumba umwazile uwololoke, ali muno lyene mwatimuzula yacikoma.

²² Yelusalemu, we muno wali wakwe siluva, lyene awewe uli wakwe vyamunyela. Wemuno wali wakwe waini umusuma, lyene wasanguka wa manzi yamu cifula.

²³ Intunguluzi zyako zyatizitalama, iziya a yacuza ya ivi. Lyene yakazumilizya utwawila na mafukakanwa. Yatangeyezye lyene ukuvwangila ana yasyale mu cilye nanti ukuvwa ku ntazi zyakwe yamukamfwilwa.

²⁴ Ali cino fwandi Yawe Wamaka yonsi, Wamaka wilya wa ina Izlaeli wavwanga wati, “Ndalandula kuli mwe anisi yane, nu kuncuzya mutalancuzya nupya foo.

²⁵ Ndamupezya nemo. Ndamwengulula wakwe vino yakaengulula yamunyela umwi lungu nu kufumya ivikwi vyonsi pyu.

²⁶ Ndamupeela intunguluzi ni nkombe wakwe yano mwakweti apa mpiti. Alino lyene Yelusalemu alaamwa ukuti umololoke, umusumba uwacumi.”

²⁷ Pamulandu wakuti Yawe umulungami, wene alapususya Zioni. Yawe akacita wa vyaololoke, alapususya na ikazi yamwenemo yayo azenzuka.

²⁸ Lelo yacisanguka na yakaifya yonsi pamwi alayonona, nga na yayo alafutatila Yawe nayo yalalowa.

²⁹ Ala icumi kwene mulalanguluka apa miti ino mukapepa, napa tuluwi tuno mukalimila ivyalo.

³⁰ Mulaumila wa miti ino ikunyaluluka, nanti wa vyalo vino vyata ukutapililwa amanzi.

³¹ Vivi kwene vino icimbilimbili cikaoca icimuti icume, ali vino na antu yamaka yalapila pamwi ni vicitwa vyao. Nupya kutalaloleka umuntu nanti wenga alalesya ukuti antu yayo yakane ukononeka.