Esita 9 - Amazwi Yakwe Leza 2013

Ayuda yalandula

¹ Umu mwezi walenga ikumi na iili wakwe Adali, apa wanda kwene uwalenga amakumi yaili na yatatu, izwi lya mwene pamwi ni lamulo lyakwe, vyali nu kucitika. Lilyo kwene alino na anisi ya Ayuda nayo yapaalilanga ukuyonona. Fwandi lyene umulandu wayafutukila, Ayuda alino yacita ivyali nu kucita anisi yao.

² Ayuda yakongine mu misumba yamu miputule ya mpanga yonsi ino umwene Aasuwelo wateekanga kuti yonone yao alondanga ukuyalovya. Nupya kutatazile kuye nanti yamwi angayalwisya. Yonsi pyu yayutukanga.

³ Alasi amu miputule ya mpanga yonsi na yakateeka, yamusika pamwi na aomvi yauze yonsi pyu yali ku lusansa lwa kwazwilizya Ayuda apamulandu wakoopa Modekai.

⁴ Modekai wali umuntu umwi umucindame ukwisano alino nu kukula wakulilangako umu maka cakuti ululumbi lwakwe lwasusile lulimba impanga zya alasi monsi pyu.

⁵ Acino lyene Ayuda yaicitilanga icili consi cino yatemwa ukucita uku anisi yao. Yayazanzanga ni vyanzo vyao nu kuyakomola.

⁶ Umu Susa monga sile, umusumba ukalamba, Ayuda yakomile antu ukufika nu ku myanda isano.

⁷ Muli yayo kwene umwali Palisyandata, Dalifoni, Asipata,

⁸ Polata, Adaliya, Alidata,

⁹ Palimasita, Alisai, Alidai na Vaizata,

¹⁰ Alino ukwika penepo na ana aonsi yakwe Hamani umwana umonsi wakwe Hamedata, umwanisi wa Ayuda. Lelo yatasenzile ivisampwe vyonsi foo.

¹¹ Uwanda kwene uwa yatwazile cipendo uku mwene ca antu yano yakomile uku Susa.

¹² Alino umwene nawe anena Esita namwene ati, “Walola! Umu Susa mutupu ali muno yakoma antu imyanda isano, ukwika penepo na ana aonsi yakwe Hamani ikumi lyonga. Uzye umu vitungu vyuze wemo ungati yali yanga? Uzye icani cino ukulenga? Icani nupya cino ukulonda? Manye taka consi cino umalanda namakupeela.”

¹³ Esita nawe ali pakwasuka ati, “Ndi cakuti cingazanzya umusambazi, leka kuti mutondo Ayuda aya umu musumba wa Susa yakacite icili conga kwene wakwe cino iyacita ilelo. Nupya cingazipa ukuti upele ilamulo lyakukulika ana aonsi ikumi yakwe Hamani uku cimuti.”

¹⁴ Umwene nawe wamuzumilizya ukuti yangacita vivyo kwene. Fwandi iyuma imbila umu Susa nga ana aonsi ikumi yakwe Hamani iyakulikwa uku cimuti.

¹⁵ Ayuda aikalanga umu Susa ali pakukongana apa wanda uwalenga ikumi na yani umu mwezi wakwe Adali, nga yakomola aonsi nayauze ukufika uku myanda itatu umu Susa. Lelo nupya kwene yatasenzile ivisampwe.

¹⁶ Ayuda yauze, yano ikalanga umu citungu cuze ica mpanga ya mwene nayo kwene yakongine pamwi ku kuitasya nu kuilandwila. Yakomozile anisi yao ukufika uku mpendwa ya mazimbi amakumi cinimbali na yasano. Lelo yatasenzile ivisampwe foo.

¹⁷ Vivyo ali vino vyacitike apa wanda uwalenga ikumi na yatatu umu mwezi wakwe Adali. Apa wanda uwalondelile penepo, uwalenga ikumi na yani, yapuzanga. Yaucita uwanda ukulu wakuzanga na malila.

¹⁸ Lelo Ayuda aku Susa yacita uwanda uwalenga ikumi na yasano ngu wakuzanga na malila.

¹⁹ Uli mulandu uno mungazana ukuti Ayuda akaikala umu mizi yapuzanga apa wanda uwalenga ikumi na yani, umu mwezi wakwe Adali. Ali muno yazanganga nu kucita amalila alino nu kupeela ivyawila ni vyakulya uku yauze.

Cimulo ca Pulimu

²⁰ Modekai walemvile imilandu yonsi ii. Atuma na makalata monsi pyu umwikala Ayuda, umu mpanga zino umwene Aasuwelo wateekanga, ciye izya mupipi nanti izya kutali.

²¹ Ayakonkomezya ukuzevya uwanda uwalenga ikumi na yani uwa mwezi wakwe Adali, nu wanda uwalenga ikumi na yasano cila mwaka. Amanda yayo, yafwile yawakwa nu kuyacita amanda ya kupuza.

²² Ali manda yano Ayuda yakulwilwe uku anisi yao. Amanda yamwi yano ulanda wasangwike uluzango nga nu kulila kwao kwasangwike insansa. Wayalembela nu kuti yangazanga nu kucita amalila mu manda yayo, nupya yapeelana ivyawila nu kusakamala alanda.

²³ Fwandi Ayuda nayo ali pakulondela ningo ilamulo lino Modekai wayalembile, ilyakuti yawaka icintu cico cila mwaka.

²⁴ Pasi pano Hamani umwana umonsi wakwe Hamedata, umwina Agagi, umwanisi wa Ayuda yonsi, wene ale wapangila ukulovya uluko lwa Ayuda, ale wapekanya ukupendola kuno yamanga iyati Pulimu (Akuli kuti icintu cimwi cino tungakolanya uku nsapolo) yakukoma nu kulovya Ayuda yonsi pyu.

²⁵ Lelo walanga namwene Esita watwala umulandu uo ku mwene, umwene nawe avino wapile ilamulo mu malembelo, ilyakuti Hamani pamwi na ana yakwe yakulikwe uku vimuti.

²⁶ Caleka amanda yalya akupuza yaamwangwa ukuti Pulimu, ukufuma kwi zwi lyakuti Puli. Ali cino apamulandu wakwe vyonsi ivyalembwa muli kalata kwene wi, na pamulandu wakwe vino yaweni ni vyacitikile Ayuda,

²⁷ isunde lyapangilwe ana yao, kumwi na aliza uku nkolelo, nga na kuli wiyo wensi angasanguka Umuyuda. Isunde lilyo, ilyakuwaka nu kucindika amanda yayo yaili, cila mwaka ndi muno Modekai wapelile ilamulo muli kalata.

²⁸ Amanda yayo yalinzile yasungwa ningo sana, uku mu Yuda wensi pano wapela, nu kuyasambilizya uku nkulo ili yonsi iliza uku nkolelo, umu ng'anda ili yonsi, nu mu mpanga ili yonsi, nu mu musumba uli onsi, yene yalinzile yaiusya amanda ya kupuza yakwe Pulimu.

²⁹ Esita namwene, mwana Abiaili apali ponga na Modekai Umuyuda, ali pakulemba kalata wakwe ciili. Iyalondolola mwenemo ivyakukomya isunde lyakwiusya uwanda ukulu uwakwe Pulimu pali vino Modekai walemvile mpiti.

³⁰ Kalata wiyo watumilwe nu kusalanganyiziwa ku Ayuda umu miputule ya mpanga yonsi iyali 127. Mwali amazwi akulenga ulongo nu kukonkomezya antu ukuti yatontela uteko.

³¹ Mwali na mazwi yamucincizyo wakusungisya amanda makulu yakwe Pulimu, ukulingana na manda yano Modekai Umuyuda pamwi na namwene Esita yapingwile ukuti avino yali nu kulacita alio kwene nga na ana yao alayalondela apacisila. Alino nu kulawaka nu kusunga intambi zyakukanalya nga nu kulosya.

³² Fwandi ali vino lyene amazwi yakwe Esita, yalenzile ukuti ilamulo lyakwe Pulimu lipangwe. Nupya ali vino lyalemvilwe mu lupapulo.