Esita 8 - Amazwi Yakwe Leza 2013

Ayuda yalandula

¹ Uwanda kwene uwa umwene Aasuwelo wapile namwene Esita ing'anda ni vyuma vyonsi vyakwe Hamani, umwanisi wa Ayuda. Esita anena umwene ukuti Modekai uwakazi kakwe, nga ukufuma lili kwene Modekai wazumiliziwe kumuleta uku mwene.

² Umwene ali pakuzula imbalaminwe iyakweti impalata ino wapokolwile kuli Hamani, nu kuipeela kuli Modekai. Nga Esita nawe apeela Modekai uwangalizi wakulolekesya apa vyuma vyakwe Hamani.

³ Esita aswilizya ukunena umwene, ale akukunkula apa ngazo zyakwe, akulila na minsozi. Alino amulenga ukuti angacita penepo cimwi ica kuvulunganya amapange yakwe Hamani umwina Agagi, yano wapingile ukukoma Ayuda.

⁴ Lyene umwene ali pakusonta Esita ni ntuwa yakwe zaabu nga Esita akatuka avwanga ati,

⁵ “Ndi cakuti cingazanzya umwene, nu kunsakamala ansakamile nupya nu kulinga ndi caticilinga, kayalembe kalata wakulesya amapange yano Hamani umwina Agagi, umwana umonsi wakwe Hamedata walondanga ukulovya umutundu wa Ayuda umu miputule yonsi ya mpanga ya mwene.

⁶ Pasi pano nemo ningaposiwa ukuposya apakulola kuno yakukomola antu yane kumwi na akazi kane.”

⁷ Nga lyene umwene Aasuwelo anena namwene Esita na Modekai Umuyuda ati, “Mwe, Lolini! Natinkulika Hamani apa ukakasi wakwe uwa kuzunya Ayuda. Natimpeela na Esita ivyuma vyakwe vyonsi kunoli.

⁸ Fwandi icisuma lembini kalata uku Ayuda umwi zina lya mwene ndi muno muwenile mwenemo ukuti icingalungama. Mufwatike penepo ni nsimbi iya mbalaminwe ya mwene. Pasi pano icintu icili consi nga calembelwa umwi zina lya mwene, nu kufwatika penepo insimbi ya kwisano, vikasyalilila pe.”

⁹ Vivyo vyacitike apa wanda walenga amakumi yaili na yatatu umu mwezi wakwe citatu, ukaamwa Sivani. Modekai ali pakwama yakalemba yonsi pyu, akwisano. Ayanena ukuti yalembe amakalata akusalanganya umwayela a Yuda nu mu alasi, nu mu ntunguluzi zyonsi izikatungulula amaumba umu miputule ya mpanga yonsi umwanda onga, amakumi yaili na cinimbali. Ukutandikila uku India mpaka ukufika nu ku Kusyi. Kuli cila citungu, yalembele kweneko kalata, umu mutundu wao, Ayuda nayo iyayalembela umu cilimi cao ica Ciyuda.

¹⁰ Fwandi Modekai walembela cila citungu kalata, umwi zina lya mwene Aasuwelo nu kufwatika penepo insimbi ya kwisano. Amakalata yasalanganyiziwa monsi pyu, uku kuomvya yakakwela ya pa mfwalasi, yaya kwene alwilo sana, amwi kola lya kwisano.

¹¹ Apa makalata yayo palondolwile ukuti Ayuda yonsi yatiyapeelwa insambu yakumana akapi, nu kuombela ca pamwi, apa kuicingilila nu kulwisya wiyo wensi angiza azazambile umutundu wao umu citungu cao. Nga cali cakuti yamwi yazanza ana yao na ya mama yao, yafwile yalwa nayo nu kuyakomola, nu kupokolola ivyuma vyao.

¹² Ukutandikila sile apa wanda kwene uwa uwalenga ikumi na yatatu, ali lino ilamulo lii lyatandike ukuomba wi sunde umu muputule wa mpanga yonsi iya mwene Aasuwelo pano yapelela iya mu Pesya, umu mwezi walenga ikumi na iili, umwezi wakwe Adali.

¹³ Amazwi a muli kalata wiyo, yali akusalanganya wi landwe umu vitungu vyonsi, apakuti yamanyikwe kuli wensi pyu. Nu kuti, Umuyuda wensi akaye umuiteyanye apa wanda uwa umu kuyalandula pali vino anisi yao yayacita.

¹⁴ Fwandi intumi zya pa mfwalasi, nazyo ali vino zya lucontwike nu kusalanganya ilandwe lilyo monsi monsi. Ilandwe lilyo lyafisile nu ku Susa, umusumba ukalamba.

¹⁵ Modekai nawe wafumile umu musumba, ala watazwala insalu zya wene iziyenzulukile ni zitiswe, alino ni ngala ya wene yakwe zaabu iikulu. Ukwikapo ni cikuwalo cakwe zaabu ica mingololozi. Umu musumba monsi umu Susa ala ya kupunda nu luzango ulukalamba.

¹⁶ Fwandi kwali ukuzanga nu kupemwila, ukusansamuka nu kucindikwa apamulandu nu kucimvya.

¹⁷ Umu musumba nu muputule wa mpanga uli onsi, ukwalile ikufika kalata wa mwene uwa malamulo yakwe, kwali insansa uku Ayuda. Kwali ukuzevya, ukupanga amalila nu kucindikisya amanda yakulu, nu kuyacita akupuza nu kuzevya. Icalenzile na inamasi aingi yaisangule Ayuda apa kuzana ukuti yatandike ukuya ni ntete nu koopa Ayuda.