Esita 7 - Amazwi Yakwe Leza 2013

Yakulika Hamani uku cimuti

¹ Lyene ali vino umwene na Hamani yaile uku cimulo cino namwene Esita wateinye.

² Nga lyene umu wanda wakwe ciili umu nsita ya cimulo umwene auzya namwene Esita ati, “Uzye cani cino ungalenga kuli nene? Lenga icili consi nani namakupeela. Nanti sile ukukwankanya uwene wane apakasi, ningakupeela.”

³ Namwene Esita nawe amwaasuka ati, “Ndi cakuti cingazanzya umusambazi kuli cino nkulonda, fwandi nemo nalenga umutende wane nu wa antu yane. Kuu kuli kulenga kwane.

⁴ Pasi pano nemo na antu yane, twikala uku kalili. Twakaziwa mpiti, tukalolela sile ukuloviwa. Nga cali icakuti yatusumvile sile umu uzya, ngano indi cele ukwaula kumamula akanwa. Pasi pano utazi witu utangalenga kuti we musambazi uculilemo.”

⁵ Lyene umwene Aasuwelo auzya Esita ati, “Nga fwandi, aweni wiyo kwene, angezya ukucita icintu kwene icamusango ndi uo?”

⁶ Esita nawe aasuka ati, “Umwanisi witu uwatuzunya a Hamani, umunkalwe wiyo!” Lyene Hamani auvwa intete cuze apa manso ya mwene na namwene.

⁷ Umwene nawe aiza akatuka cipyu cipyu nu kusya cimulo nga alungama umu calo ca mwisano. Lyene Hamani amanya nu kumanya ukuti imfwa yakwe yapalama. Ali cino fwandi, asyala akupapata namwene Esita kuti apususye umi wakwe.

⁸ Lino umwene akuwela azana Hamani watalambalala apa katala apatambalile Esita, apakuti amupapate. Walanga umwene walola vivyo, apunda nu kupunda ati, “Owe mwe, kalanda kasikolo! Uzye lyene umuntu wi akasi kulema namwene apa maka umwi sano lyane kwene?” Atatala wita ni zwi, antu iyavimbilikizya Hamani ni cisalu apa manso.

⁹ Nga lyene wenga pali yamutungwi, uwi zina lyakwe Halibona avwanga ati, “Umu ng'anda kwene umwakwe ali muno Hamani umwisikulu kwene wasimpa icimuti icitalimpe, ukulingana na yamita amakumi yaili na yatatu. Wacisimpa apakuti akuno akulikile Modekai apamulandu na mazwi yano wavwanzile aku kutuula we musambazi!” Umwene apakuvwa vivyo wene apunda sile ati, “Akuno kamukulikilini!”

¹⁰ Fwandi ali vino yakulike Hamani uku cimuti cino wateinye ukukulikila Modekai. Lyene umwene Aasuwelo umwenzo iwikala.