Esita 6 - Amazwi Yakwe Leza 2013

Musambazi wacindamika Modekai

¹ Usiku wa wanda kwene ulya, umusambazi ataweni napakusempwila utulo. Acino anena akuti yalete ulupapulo umwaya imilandu iyakwiusizya amasunde amilandu yampiti na mpiti. Iyatandika nu kuwelengela umwene.

² Ali pakuzana umulandu uno Modekai wanenyile Bigitana na Telesyi, yamutungwi yaili akwisano, yakasunga ya mpongolo ni miputule yakweneko, nupya alondanga ukukoma umwene Aasuwelo.

³ Lyene ali pakuyuzya ati, “Mwe! Uzye Modekai kwene wii, ucindami cii uno yamupeela apa cintu kwene cii apa mulimo wakwe?” Aomvi yakwe nayo iyasuka iyati, “Kusi nanti cimwi cino yamupeela.”

⁴ Umusambazi nupya auzya ati, “Uzye umwi sano muli aomvi yane yamwi?” Lyene lilyo kwene Hamani acincila ukwingila umu musolo wakwisano ukunzi, apakuti alenge ulusa uku musambazi ulwakukulikila Modekai uku cimuti cino wamuteyanyizizye.

⁵ Aomvi ya mwene nayo yaasuka umusambazi yati, “Mukwai Hamani, auwi ali muno akumulolela ukuti mulolane nawe.” Umusambazi nawe ayanena ati, “Munenini aingile.”

⁶ Hamani nawe ali pakwingila. Umusambazi nawe amuuzya ati, “Uzye umuntu wino umwene akulonda ukucindamika, ningamucitila cani?” Hamani pano ali papa, atala akutumala nga aelenganya umu mwenzo wakwe ati, “Aweni wino umwene angacindamika ukuluta pali nene?”

⁷ Fwandi lyene Hamani ali pakwasuka umwene ati, “Umuntu wino umwene akasi kucindamika,

⁸ ungamuteyanyizizya insalu zya wene, zizi kwene zino we mweneco ukazwala. Nga alino lyene ulonde na punda wino we mweneco ukakwelapo. Alino ulete ni ngala ya wene ino ukazwala uku mutwe.

⁹ Alino lyene insalu kwene zizyo, pamwi na punda kwene yamaviika umu makasa yakwe musika umuntu wiyo wino umusambazi watazangila ukuti amucindamike. Alino amuteke pali punda, nu kumutandazya umu musumba ale akulaizya apa nkolelo yakwe akuti, ‘Ndanji mulole! Mwe antu mwensi! Vii ali vino yakacindamika umuntu wino umusambazi akasi kuti acindamikwe!’ ”

¹⁰ Umwene Aasuwelo nawe anena Hamani ati, “Ale fwandi kalauka kalonde insalu na punda ndi muno uvwangile, ngu cindamike Modekai, Umuyuda wiyo akaikala apa mpongolo ya mwene. Utezya usye nanti cimwi pali vyonsi vino watutungulula apa kanwa kako.”

¹¹ Hamani ali pakuyasenda insalu na punda. Wiza wazwika na Modekai, nga Modekai nawe atongama na pali punda. Hamani nawe afuma akumutandazya mu misolo ya musumba, ale akwalazya nu ku antu akuti, “Silolini kuno yayame vino umwene akalambula wino akasi ukucindamika!”

¹² Alino Modekai aswilila uku mpongolo ya mwene. Hamani wene zuwazuwa aya ukwakwe, ala watavimba apa manso pamulandu wa nsonyi.

¹³ Atandika nu kunena umuci Zelesyi na yacuza yakwe yonsi, vyonsi ivyali vyamucitikila. Zelesyi umuci wakwe pamwi na yacuza yakwe yonsi amano iyamunena iyati, “Wemo watandika ukucimba kuli Modekai. Wene u Muyuda inkonko, nga wemo uli nu kumufilililwa sile. Wemo ale casila, wasenda iyatepa!”

Hamani yamukulika

¹⁴ Alanga yacili landana, yamutungwi akwisano yafika, yiza sile lwilo lwilo umu kusenda Hamani uku cimulo cino Esita wateinye.