Esita 4 - Amazwi Yakwe Leza 2013

Modekai walenga uwazwilizyo kuli Esita

¹ Walanga Modekai uvwa ivyacitike, alepola ivyakuzwala vyakwe, azwala ni vyakuzwala vya ndosya nga aivumvunya umwi twi. Atandika ukutawanta umu musumba, nu kutulula impoma ya ulanda.

² Asuka afika nu ku mpongolo ya mwene, nanti cali iciziliziwe ukupita kweneko ni visamu.

³ Alino nu mu vitungu vyonsi namo kwene mwafisile impwelo yandosya izya Ayuda, alino nu kuizilizya ukulya. Aingi nayo yalalanga ala yatiyazwala ivisamu nu kuiswela nitwi.

⁴ Akazyana atumikilanga Esita, pamwi naya mutungwi yakwe, nayo yiza yamulandila umulandu uo. Namwene nawe ali pakutumila Modekai ivyakuzwala ivyakuti azwala apakuti angazula icisamu cino azwite. Nawe wakana ukutoola ivyakuzwala vivyo.

⁵ Fwandi Esita ali pakwama umonsi umwi izina lyakwe a Hataki, wenga pali yamutungwi akwisano. Amunena ati, “Yanga kuli Modekai, uye ukamuzye icintu cii muno calola nga ni calenga ukuti cicitike.”

⁶ Hataki nawe ali pakufumila ukunzi ya musolo uwali ukunzi ya mpongolo ya mwene.

⁷ Modekai nawe amulandila imilandu yonsi iyatilenga kuti vii vyonsi vicitike. Ukulunda penepo ni cipimo ca mpiya zino Hamani walavile ukulipa ku cipao ca kwisano ndi cakuti Ayuda yonsi yakomwa.

⁸ Amupeela na kalata umwambule, pali yano yasalanganyizizye umu Susa, apali impwelo ya kuyalovya. Amulangizya kuli Esita apakuti nawe atezye. Nga alino acincizya Esita nu kupapata ukuti aye uku mwene alole vino angacitila umutundu wakwe.

⁹ Hataki nawe ali pakuya landila Esita amazwi afuma kuli Modekai.

¹⁰ Esita nawe anena Hataki ivyakuti aye akanene Modekai, amutuma ati,

¹¹ “Aomvi ya mwene yonsi yamanya ukuti umonsi wensi nanti umwanaci ali wensi, uwala wingila umu musolo wakwisano umukasi, ukwaula ukuti yamwame kweneko, wiyo wene ali nu kufwa. Suka sile manye ndi cakuti umusambazi aliwe wamusonta ni nsonzo yakwe zaabu iya wene lyene angapusuka. Alino nani pano yangamile ukwiza uku musambazi, ala patipapita sile amanda amakumi yatatu.”

¹² Walanga amazwi yakwe Esita yafika kuli Modekai,

¹³ Modekai nawe aasuka Esita ati, “Utezya uwacelenganya wenga umu umwenzo wako ukuti wewe wemuno ukwikala umu ng'anda ya mwene, wemo ulapusuka sile wenga, apa Ayuda yonsi pyu.

¹⁴ Ndi cakuti wala wamyalala sile cele, apa kasita kaa, ukupusuka nu kukululwa kwa Ayuda kulafuma sile kuze. Alino wemo kumwi na amu ng'anda yakwe so yonsi, ilaya ali mpela inu. Ale lyene, uzye aweni angamanya cii icalenzile kuti wewe ufike na kuli unamwene?”

¹⁵ Esita ali pakutuma intumi zuwazuwa kuli Modekai ati,

¹⁶ “Yanga ukakonganike Ayuda yonsi amu musumba wakwe Susa, nga mumpepele kweneko. Mutaezya ukulya nanti ukumwa apa manda yatatu, usiku nanti umusanya kwene. Nani kwene kumwi na aomvi yane akazyana avino tumacita. Lino cii cacitika, lyene ndaya ku musambazi, nanti caindwa ukulingana ni sunde. Ndi cakuti indi nu kufwa, kankafwe.”

¹⁷ Modekai nawe ali pakufuma kweneko aya acita na vyonsi ndi muno Esita wamunenile.