Esita 3 - Amazwi Yakwe Leza 2013

Hamani wapangila ukulovya Ayuda

¹ Walanga papita akasita, umwene Aasuwelo acindamika Hamani umwana umonsi wakwe Hamedata, umwina Agagi. Amutumpula apapela nu kumupeela icifulo cikalamba ukuluta intunguluzi zyuze zino wali nazyo.

² Umwene wapile ilamulo ku yaomvi yonsi akwi sano, ilya kucindika nu kufukamila Hamani. Asyala yonsi avino yayezile ilamulo lilyo, suka sile Modekai wene wakanyile ukumufukamila nu kumupeela umucinzi.

³ Lyene aomvi akwisano yuzya Modekai yati, “Uzye pacani cino wemo wakaniile ukuyela isunde lya mwene?”

⁴ Cila wanda yamuuzikisyanga, lelo wene akanilila sile. Wayasukanga ati, “Ala nemo nene Muyuda, ali cino ntange mfukamile Hamani.” Fwandi lyene yasusile yalondolwela Hamani apakuti yalole ndi cakuti angazumilizya ica musango ndi uo.

⁵ Walanga Hamani walola ukuti Modekai wakana ukumufukamila nanti ukumupeela umucinzi, wene pasi pakusoka!

⁶ Lelo walanga calunda nu kuvwa ukuti Modekai Umuyuda, Hamani aelenganya ukumulovya kumwi na Ayuda yonsi, akazi kakwe Modekai aikalanga umu mpanga ino umwene Aasuwelo wateekanga.

⁷ Umu mwaka walenga ikumi na iili iya kuteeka kwakwe Aasuwelo, umu mwezi wakwe Nisani, alino yacisile ukupendola kuno yatangi, “Pulimu”, apakuti yapendole yalondelezye uwanda ni nsita, iyakufikilizya ipange lyakwe Hamani pali Modekai. Fwandi ali vino umu mwezi walenga ikumi na iili, wakwe Adali, uwanda uwalenga ikumi na itatu ali uno cafikiliziwe ukulingana nu kupendola kwao.

⁸ Lyene Hamani anena umwene Aasuwelo ati, “Umu antu ni mitundu ino ukateeka, mwaya mwenemo umutundu onga uno wasasantika monsi monsi umu mpanga yako yonsi. Umutundu uo wene waipaatula nu kukana londela masunde yako yano ukupeela uku antu yako. Amasunde yao yene yapusana na masunde ya antu amu mpanga ino wemo ukateeka. Caleka fwandi musambazi, ntanzi ndi cakuti wemo ungayazumilizya.

⁹ Kwene musambazi leka nkunene. Wemo pela sile ilamulo ilyakuti tuyalovye yonsi pyu! Ndi cakuti wazumila, nemo nenga ninjiteyanya ukupeela icuma cakwe siluva ukuluta apa matani 375, kuli yao apelwa umulimo wa kwangalila ivipao vyakusungilamo icuma ca kwisano.”

¹⁰ Umwene apakuvwa vivyo azula imbalaminwe, iyakufwatikilapo insimbi, aipeela kuli Hamani umwana umonsi wakwe Hamedata umwina Agagi, wiyo uwali umwanisi wa Ayuda.

¹¹ Umwene anena Hamani ati, “Nakupeela impiya zyako, pamwi nu mutundu kwene uo, ukuti uyaombele vyonsi vino ungatemwa ukuyaombela.”

¹² Walanga uwanda uwalenga ikumi na yatatu uwa mwezi wakutandika wafikila, yaama yakalemba ya kwisano nu kuyanena ukuti yalembe ivikalata ivya mpwelo, ukulingana ni lamulo lyakwe Hamani. Iya vilemba muli cila mutundu na muli cila lulimi ulukalandwa umu vitungu vyonsi ivya utesi wa ina Pesya. Alino yatuma kuli yakateeka ya vitungu vyonsi, uku alasi nu ku ntunguluzi zyonsi. Yalembile umwi zina lya mwene Aasuwelo. Yafwatikapo ni nsimbi ya mbalaminwe yakwe.

¹³ Alino yakapaso nayo iyasimuzya zuwa ivikalata vivyo nu kuvisalanganyizizya umu vitungu vyonsi pyu! Mwali amazwi akuti, “Apa wanda sile uli umwi kwene, uwanda walenga ikumi na yatatu umu mwezi uwalenga ikumi na iili, wakwe Adali, ali wanda uno yali nu kukoma Ayuda yonsi nu kuyalovya. Ukutandikila apa mwance ukufika na pa mukote, yamangu nu twana tunono, yonsi yali nu kukomwa. Yali nu kufwa ukwaula uluse alino nu kusampwa ivyuma vyao.”

¹⁴ Amazwi ali muli yakalata yayo, yali nu kusalanganyiziwa ku vitungu vyonsi ngi lamulo lya mwene, apakuti antu amitundu yonsi yaiteyanye ningo pa wanda kwene uo.

¹⁵ Apa mulandu wakuti ilamulo lyafuma uku mwene Aasuwelo, yakapaso nayo iyakalauka zuwazuwa nu kuitela apa museo. Nakuno yatandikile ukufisya ilamulo uku musumba ukalamba kwene uku Susa. Lino ilamulo likufika, ale umwene na Hamani yatiyikala na pa matebulo yakulya nu kumwa, ali cino umusumba wakwe Susa wali umu cimvulunganya cimwi iciipisye.