Esita 2 - Amazwi Yakwe Leza 2013

Esita watwalwa ku mwene

¹ Walanga papita insita ikalamba, ala ni cipyu casila uku mwene Aasuwelo, Umwene aiusya vino Vasyiti wacisile na vino umulandu wakwe waputwilwe.

² Alino lyene aomvi yamwi aombelanga ukwisano iyanena umwene iyati, “Sileka yakulondele akazyana ayembe yano yatatala yamanya umonsi.

³ Umu mpanga yonsi ino ukateeka leka yakulondele muli cila citungu, akazyana yaa yonsi ayembe sana. Yace yayakonganike muno kwene umu ng'anda yakwe yamangu umu musumba ukalamba uwa Susa, umu ng'anda ya enyi iya anaci. Wiyo alayasunga a Hegai, umuomvi uwapeelwa umulimo wakusunga akazyana. Uce uleke kuti yakafulale nu kupelwa ivyakuyayemvya vyonsi ivyalinga ukupelwa kunoyali.

⁴ Lyene pali yayo kwene, ali pano ulasolola angapyana pali Vasyiti.” Umpandamano uu uzanzya umwene, nga nawe acita vivyo kwene.

⁵ Umu musumba wa Susa mwatenzi mwenemo umuntu umwi Umuyuda. Izina lyakwe wali a Modekai, umwana umonsi wakwe Yaili, umwana umonsi wakwe Syimei, umwana umonsi wakwe Kisyi, uwamu luko lwakwe Benjamini.

⁶ Lino Nebukadineza umwene waku Babiloni wacimvizye Yeoyakini umwene uwa Ayuda umu Yelusalemu, nu kumusenda uku uzya pamwi ni umba lyakwe, Modekai wali pali yayo.

⁷ Wakweti na kaci wakwe uwamu akazi kakwe isi. Izina lyakwe kaci wakwe wali a Esita. Izina lyakwe ilya Ciyebulai wamwangwa ukuti Hadasa. Umukazyana wiyo wali ni cata cisuma sana nupya umuyembe mu kuloleka. Fwandi lino akwasi yakwe Esita yafwile, uwasile akumulela nu kumukuzya a Modekai, kwati sile ali isi kwene.

⁸ Na lino umwene wapile ilamulo lyakwama akazyana asuma uku Susa, Esita nawe apano wali. Nawe kwene yamwisile ukwisano umu ng'anda yakwe yamangu, umu makasa yakwe Hegai.

⁹ Umukazyana wiyo asuka azanzya sana Hegai cakuti wene amutemwisya, amukumbwa. Fwandi lyene, ali wino Hegai amapeelesya icakulya ni vyakuiyemvya ukuluta apa akazyana yauze. Atoola nu muputule usuma sana uwamu ng'anda yakwe yamangu, auno amupeela. Alino amupeela na aomvi cinimbali akuti yamuombela.

¹⁰ Nga lelo Esita atailondolwile ukuti uwa mutundu wa Ciyuda nanti uluko kuno watuntuka, wacisile inkama pano avino Modekai wamulesizye ukusokolola cico.

¹¹ Alino cila wanda Modekai watandalilanga nu kulyatokela uku ng'anda yakwe yamangu, kuti amanye umutende wakwe Esita nga ni vyamucitikilanga.

¹² Ulutambi lwakuyemvya akazyana ilingi lwasendanga umwaka upuma. Apa myezi mutanda akazyana yaipukusanga amafuta a vinyamuti, nga imyezi yuze mutanda yaipukusanga na mafuta acinunu cisuma amutengo ukalamba. Lyene insita ndi yafikila, akazyana yayo yayatwalanga wenga wenga uku mwene Aasuwelo.

¹³ Alino apa kufuma umu ng'anda yakwe yamangu nu kuya kwisano, cila wenga wapelwanga ivyakuzwala vino umwisikulu watemilwe.

¹⁴ Apa kuya ingila ukwi sano yalinganga lino ilanzi lyatemba. Alino akatondo ala yamamutwala uku ng'anda yuze yakwe yamangu, kuli kasunga muze uwi zina lyakwe Syasyigazi. Wene umulimo wakwe wali uwakusunga aci ya mwene nayauze. Fwandi umukazyana nga wafuma umu mwene, atali nu kuswilila nupya uku mwene. Suka sile namanye umwene ndi wamutemwa ali pakumwamila ukwi zina lyakwe ati, “Kampanda!”

¹⁵ Insita ifika yakwingizya Esita ku mwene. Esita, umwana wakwe Abiaili, isi munono wakwe Modekai, wino Modekai kwene walezile ngu mwanakwe, atamulenzile nanti cimwi. Wene walenzile sile vino Hegai mutungwi wa mwene walanga watamunena, uwangalilanga ng'anda yakwe yamangu. Lino yonsi yalola Esita, iyazanga cuze.

¹⁶ Lilyo cali umu mwaka uwalenga cinimbali uwa kuteeka kwakwe Aasuwelo. Umu mwezi walenga ikumi, umwezi ukaamwa Tebeti, ali lino Esita yamusenda ku kulola umwene Aasuwelo ukwisano.

¹⁷ Walanga umwene walola sile Esita, pasi pakumutemwa! Amutemwa ukuluta akazyana yonsi yano waweni. Ali pakumuzwika ni ingala yakwe unamwene. Amusonta ukuya namwene uwakupyanikizya pali Vasyiti.

¹⁸ Lyene umwene ateyanya cimulo calulumbi, apa kucindika Esita. Aama na alasi yonsi pamwi na atumikilanga ukwisano. Umu muputule wa mpanga yakwe yonsi ino wateekanga, uwanda uo, wacisilwe uwanda wa kupuza. Alino apeela na antu nyanya ivyawila, ukulingana na papelelile ukama wakwe ngu mwene.

Modekai watuula umwene Aasuwelo

¹⁹ Apa nsita ilya ino anaci atatala yamanya umonsi yakongine iila lyakwe ciili, alanga umwene wasonta mpiti Modekai ukuomba incito umu uteko wakwe.

²⁰ Lelo Esita nawe ala atatala wailondolola ukuti wene Umuyuda, pano walanga Modekai wamulesya. Esita nawe wamuyelanga ukulingana ndi muno Modekai wamulelile nu kumukuzya.

²¹ Apa nsita ino Modekai waombanga umulimo wakwe ukwisano, alino yamutungwi yaili aombelanga ukwisano, wenga a Bigitana nu muze nawe a Telesyi, yene yasoka nga yumana akapi kuti yakome umwene Aasuwelo.

²² Lelo Modekai auvwa amapange yao nga alandila namwene Esita. Esita nawe aya alandila umusambazi Aasuwelo vino Modekai wamunenyile.

²³ Umwene nawe alondelezya umulandu, nga azana ukuti icacumi avivyo kwene. Fwandi lyene yayo yoili iyaya yayakulikila uku cimuti. Alino umwene akonkomezya kuti yalembe umulandu uu umu lupapulo, apa manso yakwe, mumo umwalembwa imilandu ya mpanga ino yacitikanga umu nsita ni nsita.