Esita 1 - Amazwi Yakwe Leza 2013

Cimulo kwa mwene Aasuwelo

¹ Mu manda yakuteeka kwakwe Aasuwelo, umwene waku Pesya wateekanga vitungu 127 vya mpanga ukutandikila ku India mpaka ukufika nu ku Kusyi.

² Mu manda yalya kwene umwene Aasuwelo wali pa cilimba ca wene. Wene wikalanga mu musumba ukalamba wa Susa.

³ Umu mwaka wakwe citatu, uwa kuteeka kwakwe, wene wateyanyizizye vilolo vyakwe vyonsi, aomvi yakwe yonsi pamwi na yamusika ya vita vyakwe vyonsi vyaku Pesya nu ku Medya, icimulo. Ukwika penepo na yakateeka, na alasi amu miputule ya mpanga alalikwe.

⁴ Umwene walangizye cuma cakwe na maka ya wene wakwe nu lulumbi lwa usambazi wakwe apa manda 180.

⁵ Alanga manda yalya yapita, alino umwene aimula antu yonsi aikalanga mu Susa, umusumba ukalamba wa mpanga ilya. Cimulo cico cayelile mu calo cakwi sano pa manda cinimbali.

⁶ Umusolo onsi uwa mukasi kisano, yauyemvizye ni nsalu izitiswe ni zya cifungo. Yazinyepelelile ni myando uku ntambo izisuma iziyenzulukile. Yakulikila kweneko nu tumipeto twakwe siluva, tuno twali uku ncesi zya mawe atiswe nupya ayengese. Nga nupya umusolo kwene uwa walanga yaumilila nu tumawe ututiswe utuyengese. Kwali utumawe natuze utukoline wa lwili nga natuze utwa misango misango utwamutengo ukome. Nga ala yatiyateyanya nu kuluka ivilako ni vitala ivisuma ivyakulala nu kwikala penepo apa kulya. Ivintu vivyo vyali vyakwe zaabu na siluva.

⁷ Amakapu ni ngako ivyakumwelamo, vyali ivipangwe ukufuma kuli zaabu. Umwene wayapile waini umwingi wakwe cimwi.

⁸ Pi lamulo lya mwene cila muntu wamwile ukulingana na muno akulondela. Pasi pano umwene walanga watapeela ilamulo ku ntunguluzi zyonsi zyakwi sano lyakwe kuti yatiikila umuntu ali wensi icipimo cakwe waini wino angamwa.

⁹ Apa nsita kwene iyo, namwene Vasyiti ateyanyizizya yamangu akwi sano lya mwene Aasuwelo icimulo.

¹⁰ Pa wanda wakwe cinimbali lino mwene Aasuwelo wazanzile cuze apacisila ca kumwa waini, wene wapile ilamulo ku antu yaa cinimbali: Meumani, Bizita, Halibona, Bigita, Abagita, Zetaala na Kalikasi, ali yamutungwi amutumikilanga.

¹¹ Ayakonkomezya ukuyasenda namwene Vasyiti, aize muno yali. Ayanena ukuti namwene Vasyiti afume watazwala icisote ca unamwene apakuti antu ni ntunguluzi zyonsi zize zilole kuyemba kwakwe. Vasyiti wali amama umusuma sana ukulola.

¹² Lelo namwene Vasyiti akana ukuzumila ulwamo lwa mwene. Mwene pali pakusoka sana cakuti ukali wakwe iwazikimila umu mwenzo ungati umoto.

¹³ Calenzile umwene aame antu yamano yano yamanyikisye amasunde, pano ali vino umwene wacitanga pakupandwa amano ku antu amanyikisye amasunde nu upinguzi.

¹⁴ Yampandamano ya mwene yali ndi vii: Kalisyena, Syetali, Adimata, Tasyisyi, Melesi, Malisena na Memukani, ni ntunguluzi cinimbali zyaku Pesya nu ku Medya azumiliziwe kwiza lolana nu mwene. Nupya yakweti ivifulo vikulu mu wene ulya.

¹⁵ Mwene auzya ati, “Ukulingana ni lamulo, uzye namwene Vasyiti tumucite uli pano wene watakana ukuzumila ulwamo luno ne mwene Aasuwelo natintuma ukupitila muli yamutungwi yalya?”

¹⁶ Alino Memukani avwanga pa manso ya mwene na pa manso ya ntunguluzi zyuze ati, “Namwene Vasyiti atifizye sile ku mwene wenga, awe. Lelo wataifya nu ku ntunguluzi zyonsi ni mitundu yonsi ya antu yano yali mu mpanga yakwe Aasuwelo.

¹⁷ Pasi pano vino namwene watacita vimauvwika ku anaci yonsi nupya yamasausyanga yaiya. Yakaavwanga yati, ‘Mwene Aasuwelo wapile ilamulo lyakuti Vasyiti umuci wakwe azumile lwamo. Lelo wene wakanyile.’

¹⁸ Ilelo kwene lii, ndi anaci aku Pesya na aku Medya yano yatiyuvwa ivicitwa vyakwe namwene wii yamacitanga cili cimwi kuli ya iya, ale lyene kusausyanya nu kusosyanya kutalasila awe.

¹⁹ Caleka we musambazi, ndi cakuti cingazumiliziwa, wemo tuma ulwamo kuti namwene Vasyiti aize alolekele pa manso yako. Nupya leka isunde lilembwe mu lupapulo lwa masunde ya ina Pesya na ina Medya, ilitangasenulwa. Kuli kuti pa cifulo cakwe namwene Vasyiti upyanikizyepo muntu muze uwacuvwilo kuluta aliwe, aye a namwene.

²⁰ Lyene musambazi isunde kwene lino mumapanga, leka antu yume imbila mu mpanga inu yonsi itaikulila ndi muno yayela, yamangu yonsi yacindika yaiya, ukufuma pa munono ukufika nu ku mukulu kwene.”

²¹ Amazwi kwene yaa yazanzya umwene ni ntunguluzi. Acino umwene acita ndi muno Memukani wavwangile.

²² Umwene pali pakutuma yakalata ku vitungu vyonsi vya wene wakwe, cila citungu na kalata wa ciko. Nga atuma na kuli cila mutundu umu cilimi cakumwao, ukuti aonsi yonsi yaye akulu mu mang'anda yao.